Seb 9 - Ndebele Bible (iBhayibhili Elingcwele) 1978

Ukuphenduka lokubhaphathizwa kukaSawuli

1USawuli esafutheka ngokusongela lokubulala abafundi beNkosi, waya kumpristi omkhulu,

2wacela incwadi zokuya eDamaseko emasinagogeni, ukuze kuthi uba efumana abantu baleyoNdlela, abesilisa labesifazana, abalethe eJerusalema bebotshiwe.

3Kwathi ekuhambeni kwakhe, esesondele eDamaseko, kwaphazima masinyane inxa zonke ukukhanya okuvela ezulwini.

4Wawela phansi, wezwa ilizwi lisithi kuye: Sawuli, Sawuli, ungizingelelani na?

5Wathi: Ungubani, Nkosi? Yathi: NginguJesu omzingelayo;

6kodwa sukuma ungene emzini, uzakutshelwa lokhu omele ukukwenza.

7Amadoda ayehamba laye ayemi engelakukhuluma, ngoba ezwa ilizwi kodwa engaboni muntu.

8USawuli wasevuka phansi; kwathi esevule amehlo akhe, kabe esabona. Ngakho basebembamba ngesandla, bamusa eDamaseko.

9Kwaba zinsuku ezintathu engaboni, engadli, enganathi.

10Kwakukhona eDamaseko umfundi othile, othiwa nguAnaniya; iNkosi yathi kuye ngombono: Ananiya! Yena wathi: Ngikhona, Nkosi.

11INkosi yathi kuye: Suka uye endleleni ethiwa iQondile, udinge endlini kaJudasi umuntu othiwa nguSawuli waseTarsusi; uzamfumana ekhuleka;

12ubonile ngombono umuntu, othiwa nguAnaniya, engena, ebeka izandla zakhe phezu kwakhe ukuba abone.

13Kodwa uAnaniya wathi: Nkosi, ngizwile ngabanengi ngalowomuntu konke okubi akwenzileyo kwabangcwele bakho abaseJerusalema;

14lalapha ulamandla avela kubapristi abakhulu okubopha bonke labo abakhuleka ebizweni lakho.

15Kodwa iNkosi yathi kuye: Hamba, ngoba lowo uyisitsha sami esikhethiweyo sokuphatha ibizo lami phambi kwezizwe, lamakhosi, labakoIsrayeli;

16ngoba mina ngizakumtshengisa konke amele ukuhlutshwa ngakho ngenxa yebizo lami.

17Ngakho uAnaniya wasuka, wangena endlini, wabeka izandla zakhe phezu kwakhe esithi: Sawuli, mzalwane, iNkosi uJesu ebonakele kuwe endleleni oze ngayo, ungithumile ukuba ubuye ubone, ugcwaliswe ngoMoya oNgcwele.

18Kwahle kwawa emehlweni akhe kwangathi zinkwethu, wabona, wasukuma, wabhaphathizwa;

19esedlile wathola amandla.

USawuli utshumayela eDamaseko laseJerusalema

Wahlala labafundi baseDamaseko insuku ezithile.

20Masinyane emasinagogeni abo watshumayela ngoJesu esithi uyiNdodana kaNkulunkulu.

21Bonke abezwayo bamangala besithi: Lo kayisuye yini owachitha eJerusalema bonke labo abakhuleka kulelibizo, lalapha uzele khona lokho ukuba abathathe abase kubapristi abakhulu bebotshiwe na?

22Kodwa uSawuli wakhula kakhulu emandleni, wabehlula abaJuda abakhileyo eDamaseko eqinisa ukuthi uJesu unguKristu.

23Sekudlule insuku ezinengi, abaJuda benza icebo ukuba bambulale.2 Kor 11:32, 33

24Kodwa icebo labo laziwa nguSawuli. Babemlindele emasangweni emini lebusuku ukuba bambulale.

25Kodwa abafundi bamthatha ebusuku, bamehlisela ngaphandle komthangala ngesilulu.

26Esefikile eJerusalema wazama ukuzihlanganisa labafundi; kodwa bonke bamesaba, bengakholwa ukuba ungumfundi.

27Kodwa uBarnabasi wamthatha, wamusa kubaphostoli, wabalandisela ukuthi uyibonile iNkosi endleleni, lokuthi ikhulumile kuye, lokuthi eDamaseko utshumayele ngesibindi ngebizo likaJesu.

28Wahlala labo eJerusalema, ephuma engena phakathi kwabo etshumayela ngesibindi ngebizo leNkosi,

29ekhuluma ephikisana labaJuda abakhuluma isiGriki; bona bazama ukumbulala.

30Abazalwane sebekwazi lokho bamehlisela eKesariya, bamthumela eTarsusi.

31Ngakho ibandla laba lokuthula kulo lonke elaseJudiya, lelaseGalili, lelaseSamariya, lakheka, lihamba ngokwesaba kweNkosi, landa ngokuqiniswa nguMoya oNgcwele.

UPetro usilisa uEneya

32Kwathi uPetro ehambela izindawo zonke, wafika lakwabangcwele abahlala eLida.

33Wafumana khona indoda ethiwa nguEneya, eyayiyisilima isilele ecansini iminyaka eficaminwembili.

34UPetro wathi kuye: Eneya, uJesu Kristu uyakusilisa; vuka, wendlule icansi lakho. Wasevuka masinyane.

35Bambona bonke abakhileyo eLida leSaroni, baphendukela eNkosini.

UPetro uvusa uTabitha kwabafileyo

36Kwakukhona eJopha umfundikazi othiwa nguTabitha okuyikuthi uDorkasi; wayelemisebenzi emihle lokusiza abayanga.

37Kulezonsuku wagula, wafa; sebemgezisile bamlalisa endlini ephezulu.

38Njengoba iLida laliseduze leJopha, abafundi sebezwile ukuthi uPetro ukhona lapho, bathumela amadoda amabili kuye bemncenga besithi: Ake uze kithi ungaphuzi.

39UPetro wasesuka, wahamba labo. Esefikile, bamthatha bamusa endlini ephezulu; bonke abafelwakazi bema laye bekhala, bemtshengisa izambatho lengubo uDorkasi ayezenzile eseselabo.

40UPetro wasebakhuphela phandle bonke, eguqa ngamadolo wakhuleka. Wasephendukela esidunjini esithi: Tabitha, vuka! Wasevula amehlo akhe, wabona uPetro, walulama.

41Yena wambamba ngesandla, wamsukumisa, wasebiza abangcwele labafelwakazi, wambeka phambi kwabo esilile.

42Kwezwakala kulo lonke iJopha; abanengi bakholwa eNkosini.

43Wahlala eJopha insuku ezinengi loSimoni umkhuhli.