Isa 38 - Ndebele Bible (iBhayibhili Elingcwele) 1978

Ukugula kukaHezekiya

1Ngalezonsuku uHezekiya wagula, waphos’ukufa. UIsaya umprofethi indodana kaAmozi wafika kuye wathi: INkosi ithi: Lungisa indlu yakho, ngoba uzakufa, kawuyikusila.2 Kho 20:1–11; 2 Lan 32:24–26

2UHezekiya wasephenduka ekhangela emdulini, wakhuleka eNkosini,

3esithi: Nkosi, ake ukhumbule, ngiyakuncenga, ukuba ngihambe phambi kwakho ngobuqotho langenhliziyo epheleleyo, ngenza okulungileyo emehlweni akho. UHezekiya wakhala kakhulu.

4Kwasekufika ilizwi leNkosi kuIsaya,

5lisithi: Yana kuHezekiya uthi: Ithi iNkosi uNkulunkulu kaDavida ukhokho wakho: Ngiwuzwile umkhuleko wakho, ngabona lenyembezi zakho; ngizakwengezelela iminyaka elitshumi lanhlanu ekuphileni kwakho;

6ngizakukukhulula wena lalumuzi esandleni senkosi yaseAsiriya, ngiwuvikele lumuzi.

7Yilesi isibonakaliso kuwe esivela eNkosini esokuthi iNkosi izakukwenza lokhu ekuthembisileyo.

8Ngizabuyisela emuva ngezinyathelo ezilitshumi umthunzi owenziwa yikukhothama kwelanga ezinyathelweni zikaAhazi. Ngakho ilanga laselibuyisela emuva ezinyathelweni zikaAhazi, inyathelo ezilitshumi elaselikhotheme ngazo.

9La ngamazwi kaHezekiya inkosi yakoJuda emva kokusila kwakhe ekuguleni.

10Ngathi: Ngisephakathi kokuphila kwami ngizadlula,

ngingene emasangweni endawo yabafileyo,

ngilahlekelwe yiminyaka yami esaseleyo.

11Ngathi: Kangiyikubona iNkosi elizweni labaphilayo;

kangisayikubona labantu abahlala emhlabeni.

12Indlu yami ikhutshuliwe, yasuswa kimi, njengethente lomalusi;

ukuphila kwami kugoqiwe njengelembu lomaluki;

ngaqunywa esalukweni;

kusukela emini kuze kube sebusuku ngiyaqedwa.

13Ngikhala kuze kube sekuseni, ngicela ukusizwa;

njengesilwane uyaphula amathambo ami wonke,

kusukela emini kuze kube sekuseni uyangiqeda.

14Ngiyatshiyoza njengenkonjane, ngikhale njengejuba,

amehlo ami adiniwe ngokukhangela ngaphezulu.

Nkosi, ngicindezelwe; woba yisibambiso sami.

15Kodwa, ngingathini na?

Ngoba yona iNkosi ikhulumile kimi,

yona uqobo isikwenzile.

Ngiyahluleka ukulala, ngenxa yokudabuka komoya wami.

16Nkosi, inhliziyo izaphilela wena,

lomoya wami uphilele wena wedwa.

Uzakungelapha, ngiphile.

17Ubuhlungu bami babenzelwe ukungisiza mina;

nguwe olondoloze ukuphila kwami ukuba ngingayi emgodini wokuchitheka,

ngoba uziphosele ngemva kwakho zonke izono zami.

18Indawo yabafileyo ingeke ikubonge,

lokufa kungeke kukudumise,

labo abehlela emgodini bangethembe ubuqotho bakho.

19Abaphilayo yibo abakudumisayo,

njengoba ngikudumisa lamuhla;

oyise bayatshela abantwana babo ngobuqotho bakho.

20INkosi izakungisiza,

sizahlabela ngamachacho endlini yeNkosi insuku zonke zokuphila kwethu.

21UIsaya wayethe: Kabamthathele isigaqa somkhiwa, basifake ethumbeni, uzakusila.

22UHezekiya laye wayethe: Isibonakaliso yisiphi sokuthi ngizakuya ethempelini na?