Josh 15 - Ndebele Bible (iBhayibhili Elingcwele) 1978

Ilizwe elanikwa isizwe sakoJuda

1Ilizwe lesizwe sakoJuda ngosendo lwaso lalifika eningizimu emngceleni waseEdoma, enkangala yaseZini ngaseningizimu.

2Umngcele walo waseningizimu wawusuka ngasekupheleni koLwandle lweTshwayi, ngaseningizimu kwalo,

3uqonda eningizimu udlula umqanso waseAkirabimi, udlulela eZini; wasukhwela usuka eningizimu kweKadeshi‐Barneya, wagudla eHezironi waya eAdari, wasuphenduka eKarika,

4waya eAzimoni, wafika esifuleni saseGibithe, waphelela olwandle. Lo wawuyiwo umngcele walo ngaseningizimu.

5Umngcele wasempumalanga wawuluLwandle lweTshwayi, kusiya ekungeneni kweJordani. Umngcele wasenyakatho wasuka ngasolwandle, ekungeneni kweJordani,

6waya ngaseBeti‐Hogila, wagudla enyakatho kweBeti‐Araba, wasukhwela uqonda ilitshe likaBohani indodana kaRubeni,

7wasukela esihotsheni saseAkori waqonda iDebiri, wasuphendukela enyakatho uqonda elizweni maqondana lomqanso waseAdumimi, ngaseningizimu kwesihotsha; wasudlula usiya ngasemanzini aseEni‐Shemeshi, waphelela eEni‐Rogeli;

8wasukhwela ngesihotsha saseBeni‐Hinomu usiya eningizimu kwewatha lamaJebusi, okutsho iJerusalema. Wasukhwela usiya engqongeni yentaba ekhangelene lesihotsha saseBeni‐Hinomu ngasentshonalanga, ngasenyakatho ekupheleni kwesihotsha saseRefayimi,

9wasuka engqongeni yentaba waya emthonjeni wamanzi aseNefitowa, wasukela lapho waya emizini yasentabeni eEfroni; wasuphenduka uqonda eBala, okutsho iKiriyathi‐Jeyarimi,

10wasuka ngasentshonalanga kweBala waya entabeni yaseSeyiri, wadlula waya ngasenyakatho kwentaba yaseJeyarimi, okutsho iKesaloni, wehlela eBeti‐Shemeshi, wadlula eTimina,

11wasuphuma uqonda iwatha lentaba ngasenyakatho kweEkroni, waphendukela eShikeroni, wadlula waqonda intaba yaseBala, waya eJabineli, wayaphelela ngasolwandle.

12Umngcele wasentshonalanga wawuluLwandle olukhulu. Yiwo lowo umngcele ogombolozele isizwe sakoJuda losendo lwaso.

UKalebi unqoba iHebroni leDebiri

13Njengokulaya kweNkosi kuJoshuwa wamnika uKalebi indodana kaJefune isabelo phakathi kwabakoJuda, iKiriyathi‐Arba, okutsho iHebroni; uArba wayenguyise kaAnaki.