Jobe 23 - Ndebele Bible (iBhayibhili Elingcwele) 1978

Impendulo kaJobe: ufisa ukulandisa indaba yakhe phambi kukaNkulunkulu

1UJobe wasephendula esithi:

2Imicabango yami lamhla iyalwa,

ngoba isandla sikaNkulunkulu sinzima phezu kwami ekuhluphekeni kwami.

3Kungathi ngabe ngiyazi lapho ngingamfumana khona,

ukuba ngiye enkundleni yakhe,

4ngilandise indaba yami phambi kwakhe,

ngilandise ngokugcweleyo ukusola kwami,

5ngizwe ukuphendula kwakhe,

ngizwe ukuthi uzakuthini kimi!

6UNkulunkulu ubezakuphikisana lami ngamandla akhe amakhulu na?

Atshi, ubezakungilalela.

7Lapho oqotho angakhulumisana laye,

lami bengizakukhululwa ngokupheleleyo ngumahluleli wami.

8Uba ngisiya phambili, kakho lapho.

Uba ngisiya emuva, kangimfumani.

9Nxa ngiphendukela ngakwesokhohlo, kangimboni,

ngikhangele ngakwesokunene, kodwa lalapho kangimboni.

10Kanti uyayazi indlela yami,

nxa esengihlolile, ngizaphuma nginjengegolide.

11Unyawo lwami lunamathele ezinyathelweni zakhe,

ngiyigcinile indlela yakhe, kangiphambukelanga eceleni.

12Kangisukanga emlayweni wezindebe zakhe,

ngawalondoloza amazwi akhe enhliziyweni yami.

13Yena usekhethile, ngubani ongamsusa na?

Lokho akufisayo uyakwenza.

14Ngoba uzaphelelisa lokho angimisele khona;

lezinto ezinengi ezinjalo zisengqondweni yakhe.

15Ngalokho ngitshaywa luvalo ngokuba khona kwakhe;

nxa ngicabanga, ngiyamesaba.

16UNkulunkulu uyidanisile inhliziyo yami,

uSomandla ungethusile.

17Ngoba kakusiwo umnyama ongethusayo,

lanxa ithunzi lokufa lingigubuzele.