Jer 9 - Ndebele Bible (iBhayibhili Elingcwele) 1978

1Kungathi ngabe ikhanda lami lingamanzi,

lamehlo ami angumthombo wenyembezi,

ukuba ngikhalele ababuleweyo ebantwini bami emini lebusuku.

2Kungathi ngabe ngilendawo yokuhlala enkangala,

ukuba ngisuke ebantwini bami, ngibatshiye;

ngoba bonke bayizifebe, balixuku labantu abakhohlisayo.

3Balungele ukuqamba amanga;

amanga akhulile kuleqiniso elizweni;

basuka kokubi baye kokubi,

minake kabangazi, kutsho iNkosi.

4Ilowo lalowo kaxwaye umakhelwana wakhe,

lingabathembi abafowenu,

ngoba bonke abafowenu bayaphica,

labo bonke omakhelwana benu bathanda ukunyeya.

5Yilowo lalowo ukhohlisa umakhelwana wakhe,

kakho okhuluma iqiniso,

bazifundisile inlimi zabo ukuqamba amanga,

bazidinisa ngokwenza okubi, baze behluleke ukuphenduka.

6Bandisa ububi phezu kokubi,

lenkohliso phezu kwenkohliso,

bayala ukungazi mina, kutsho iNkosi.

7Ngakhoke, iNkosi yamabandla ithi:

Ngizabancibilikisa ngibahlole;

ngoba kuyini okunye engingakwenza ngenxa yabantu bami?

8Ulimi lwabo lungumtshoko obulalayo,

lukhuluma inkohliso;

yilowo lalowo ukhuluma kuhle ngomlomo wakhe lomakhelwana wakhe,

kodwa enhliziyweni yakhe wenza amacebo okumcathamela.

9Kangiyikubatshaya ngenxa yalezizinto na? kutsho iNkosi.

Kangiyikuphindisela esizweni esinje na?

10Ngizakhala ngililele izintaba, lamadlelo asenkangala,

ngoba kuchithiwe, kakusekho ohamba khona,

kakusezwakali ukukhala kwezinkomo,

inyoni zaphezulu lenyamazana zibalekile zahamba.

11Ngizalenza iJerusalema libe lunxiwa oludilikileyo lendawo yamakhanka,

ngenze imizi yakoJuda ibe yinkangala engelamuntu.

Ilizwe liyachitheka labantu bayakhala

12Ngubani umuntu ohlakaniphileyo ongaqedisisa lokhu na? INkosi ikhulume lobani ukuba akubike lokhu na? Ilizwe lichithelweni latshiswa laba yinkangala, ukuba kungahambi muntu khona na?

13INkosi yathi: Kungoba belahlile umlayo wami engawubeka phambi kwabo, bengalilalelanga ilizwi lami, bengahambanga ngalo,

14belandela inhliziyo zabo ezilenkani bedinga oBali, njengokufundiswa kwabo ngoyise.

15Ngakhoke iNkosi yamabandla, uNkulunkulu kaIsrayeli, ithi: Ngizabanika lababantu umhlonyane ukuba bawudle, banathe amanzi abulalayo.

16Ngizabachithela ezizweni abangazanga bazazi bona labokhokho babo, ngibalandisele ngempi, ngize ngibaqede.

17INkosi yamabandla ithi:

Qaphelani, libize abesifazana bokulila ukuba beze,

libize abesifazana abangamagabazi ukuba bafike,

18baphangise ukusililela,

ukuze amehlo ethu ehlise inyembezi,

lenkophe zethu zimpompoze amanzi.

19Ngoba ilizwi lokukhala liyezwakala liphuma eZiyone lisithi:

Yeka ukuchitheka kwethu!

Silenhloni kakhulu, ngoba silitshiyile ilizwe,

ngoba babhidlizile izindlu zethu.

20Yebo, zwanini ilizwi leNkosi, lina besifazana,

lendlebe zenu zilamukele ilizwi layo;

lifundise amadodakazi enu ukukhala,

kube yilowo lalowo afundise umakhelwana wakhe ukulila.

21Ngoba ukufa kungenile ngamawindi ethu,

kwangena ezigodlweni zamakhosi ethu,

kwaqeda abantwana ezindleleni, lamajaha emagumeni.

22Khuluma uthi: INkosi ithi:

Izidumbu zabantu zizagcwala njengamalongwe egangeni,

lanjengezithungo ezitshiywe emuva ngumvuni, kungekho ozibuthayo.

Wonke umuntu kazibonge ngokwazi uNkulunkulu

23INkosi ithi: Ohlakaniphileyo angazincomi ngokuhlakanipha kwakhe, leqhawe lingazincomi ngobuqhawe balo, lonothileyo angazincomi ngokunotha kwakhe;

24kodwa ozincomayo kazincome ngalokhu, ukuthi uyangiqedisisa, futhi uyazi ukuba mina ngiyiNkosi elothando olungapheliyo, lokulunga, lobuqotho emhlabeni; ngoba lezizinto ngiyezithanda, kutsho iNkosi.1 Kor 1:31; 2 Kor 10:17

25Khangela, insuku ziyeza, kutsho iNkosi, lapho ngizatshaya bonke abasokileyo kodwa bengasokanga enhliziyweni;

26ngitsho iGibithe loJuda loEdoma loAmoni loMowabi, labo bonke abahlala enkangala abagela inwele zabo emaceleni; ngoba zonke lezizizwe kazisokanga, layo yonke indlu kaIsrayeli kayisokanga enhliziyweni.