1 Lan 14 - Ndebele Bible (iBhayibhili Elingcwele) 1978

1UHiramu inkosi yaseTire wathuma izithunywa kuDavida, lemikusu, lababazi bamatshe labezigodo ukumakhela uDavida indlu.2 Sam 5:11–16

2UDavida wabona ukuthi iNkosi yayimmisile ukuba abe yinkosi koIsrayeli, lokuthi iwuphakamisile umbuso wakhe ngenxa yabantu bayo uIsrayeli.

Abantwana bakaDavida abazalelwa eJerusalema

3UDavida wathatha abanye abafazi eJerusalema, wazala amanye amadodana lamadodakazi.

4Nanka amabizo alabo abazalelwa eJerusalema; oShamuwa, loShobabi loNathani, loSolomoni,

5loIbihari, loElishuwa, loElipeleti

6loNoga loNefegi, loJafiya

7loElishama, loBeyeliyada loElifeleti.

UDavida unqoba amaFilistiya

8Kwathi amaFilistiya esezwile ukuba uDavida ugcotshiwe ukuba abe yinkosi yabo bonke abakoIsrayeli, wonke amaFilistiya enyuka ukuyamdinga; uDavida wakuzwa lokhu, waphuma ukuyakulwa lawo.2 Sam 5:17–25

9AmaFilistiya ayefikile ukuhlasela esihotsheni saseRefayimi.

10UDavida wasebuza kuNkulunkulu esithi: Ngiyewahlasela amaFilistiya na? Uzawanikela esandleni sami na? INkosi yathi kuye: Yebo, hamba, ngoba ngizawanikela esandleni sakho.

11UDavida waya eBali‐Perazimi, wawahlula khona amaFilistiya, wathi: UNkulunkulu uzifohlile izitha zami ngesandla sami njengamanzi afohlayo. Ngakhoke leyondawo yasithiwa yiBali‐Perazimi.

12AmaFilistiya abaleka atshiya onkulunkulu bawo lapho, uDavida wathi kabatshiswe.

13AmaFilistiya abuya ahlasela esihotsheni futhi.

14Lapho uDavida ebuza futhi kuNkulunkulu, yena wathi kuye: Ungayi; bhoda ngemva kwawo, uwasukele maqondana lezihlahla zebhalisamu.

15Kuzakuthi lapho usizwa umsindo wokuhamba phezu kwezihlahla uwahlaseleke, ngoba ngizabe ngihamba phambi kwakho ukunqoba impi yamaFilistiya.

16UDavida wenza njengokulaywa kwakhe nguNkulunkulu, wawaxotsha amaFilistiya kusukela eGibeyoni kwaze kwafika eGezeri.

17Udomo lukaDavida lwafinyelela kuwo wonke amazwe; iNkosi yenza zonke izizwe ukuba zimesabe.