Hubo 92 - Ndebele Bible (iBhayibhili Elingcwele) 1978

Ukubonga iNkosi ngokulunga kwayo

1Kuhle ukukubonga, Nkosi,

lokudumisa ibizo lakho, wena

oPhezukonke;

2ukutshumayela uthando lwakho olungapheliyo ekuseni,

lobuqotho bakho ebusuku,

3ngokutshaya ichacho elilentambo ezilitshumi,

langechacho elikhala kamnandi.

4Ngoba wena, Nkosi, ungithokozisile ngomsebenzi wakho;

ngomsebenzi wezandla zakho ngiyahlabela ngokujabula.

5Yeka ubukhulu bemisebenzi yakho, Nkosi!

Imicabango yakho izikile kakhulu.

6Isiphukuphuku singeke sikwazi,

lesithutha singeke sikuqedisise lokhu

7ukuthi, loba ababi behluma njengotshani,

labenza okubi bephumelela,

bazakubhujiswa kokuphela;

8kodwa wena, Nkosi, uphakeme kuze kube nininini.

9Ngoba khangela, Nkosi, izitha zakho,

zizakubhubha;

bonke ababi bazakuchitheka.

10Kodwa uphakamisile uphondo lwami njengolwenyathi,

ungigcobile ngamagcobo amatsha.

11Amehlo ami akubonile ukuwa kwezitha zami,

lendlebe zami zakuzwa ukuchitheka kwabangivukelayo.

12Abalungileyo bayakhahlela njengelala,

bakhule njengezihlahla zeLebanoni.

13Bagxunyekiwe endlini yeNkosi,

bayakhahlela emagumeni ethempeli likaNkulunkulu wethu.

14Basathela izithelo lasebudaleni babo,

bayahluma babe luhlaza,

15ukuze batshengise ukuthi iNkosi iqondile;

yona ilidwala lami, kakukho ukungalungi kiyo.