Levi 26 - Ndebele Bible (iBhayibhili Elingcwele) 1978

Izibusiso zokulalela

1Lingazenzeli izithombe, lingamisi izithombe ezibaziweyo lensika yokukhonzela, lingamisi elizweni lakini ilitshe elilemifanekiso ukuba likhothamele kulo; ngoba ngiyiNkosi uNkulunkulu wenu.Dute 7:12–24; 28:1–14

Eks 20:4; Levi 19:4; Dute 5:8; 16:21–22; 27:1

2Gcinani amaSabatha ami, lihloniphe indlu yami engcwele. NgiyiNkosi.

3Uba lihamba ngezimiso zami, ligcine imilayo yami, liyenze,Dute 11:13–15

4ngizakulinisela izulu ngesikhathi salo, lelizwe lizathela izithelo, lezihlahla zeganga zithele izithelo zazo.

5Lizakubhula kuze kufike isikhathi sokuvuna amavini, livune amavini kuze kufike isikhathi sokuhlanyela; lizakudla ukudla kwenu, lisuthe, lihlale livikelekile elizweni lakini.

6Ngizakulinika ukuthula elizweni, lilale lingethuswa muntu, ngisuse inyamazana ezimbi elizweni, lempi kayiyikuhlasela elizweni lakini.

7Lizakuxotsha izitha zenu, ziwe phambi kwenu empini.

8Abahlanu benu bazaxotsha abalikhulu, labalikhulu benu bazaxotsha abazinkulungwane ezilitshumi; izitha zenu zizakubulawa phambi kwenu empini.

9Ngizakuba lomusa kini, ngilenze ukuba lizale, lande, ngimise isivumelwano sami lani.

10Lizakudla okwesivuno esidala, likhuphe esidala ukuba lifake esitsha.

11Ngizahlala phakathi kwenu, kangiyikunengwa yini.

12Ngizakuhamba phakathi kwenu, ngibe nguNkulunkulu wenu, libe ngabantu bami.2 Kor 6:16

13NgiyiNkosi uNkulunkulu wenu owalikhupha elizweni laseGibithe ukuba lingabi yizigqili zabo; ngephule izikeyi zejogwe lenu, ngenza ukuba lihambe liqondile.

Lokhu okuzakwenziwa ngenxa yokungalaleli

14Kodwa uba lingangilaleli, lingagcini imilayo le yonke,Dute 28:15–68

15uba lilahla izimiso zami, lidelele izahlulelo zami, ukuze lingenzi imilayo yami yonke, leqe isivumelwano sami,

16ngizakwenza kini lokhu, ngehlisele phezu kwenu ukwesaba okukhulu, lofuba, lomkhuhlane ozakufiphaza amehlo, liphele amandla. Lizakuhlanyelela inhlanyelo yenu ize, ngoba izitha zenu zizakuyidla.

17Ngizakumelana lani, lichithwe yizitha zenu. Abalizondayo bazakulibusa, libaleke lingaxotshwa muntu.

18Kodwa loba kunjalo, uba lingangilaleli, ngizabuya ngilitshaye kasikhombisa ngenxa yezono zenu,

19ngiqede amandla enu aziphakamisileyo, ngenze amazulu enu abe njengensimbi ukuze izulu lingani, lomhlabathi wenu ube njengethusi;

20lamandla enu azakuchithelwa ize, ngoba ilizwe lenu kaliyikuthela izithelo zalo, lezihlahla zelizwe kaziyikuthela izithelo zazo.

21Uba lihamba ngokuphambene lami, lingangilaleli, ngizakwehlisela kini ezinye inhlupheko, ziphindwe kasikhombisa ezonweni zenu.

22Ngizathuma phakathi kwenu izilo ezizakulamuka abantwana benu, zibulale inkomo zenu, zilenze libe balutshwana, lezindlela zenu zibe yinkangala.

23Uba lingavumi ukuxwayiswa yimi ngalezizinto, kodwa lihamba ngokuphambene lami,

24lami ngizahamba ngokuphambene lani, ngilitshaye kasikhombisa ngenxa yezono zenu.

25Ngizakwehlisela impi phezu kwenu ezakuphindisela isivumelwano. Uba libuthana emizini yenu, ngizakuthuma umkhuhlane phakathi kwenu, linikelwe ezandleni zezitha.

26Lapho nginciphisa ukudla kwenu, abesifazana abalitshumi bazapheka izinkwa zenu eziko linye, balinike izinkwa ngobunzima bazo; lizakudla, kodwa lingasuthi.

27Kodwa uba lingangilaleli, lanxa izinto lezo zinjalo, lihambe ngokuphambene lami,

28lami ngizakuhamba ngokuphambene lani ngilolaka, ngilitshaye kasikhombisa ngenxa yezono zenu.

29Lizakudla imizimba yamadodana enu leyamadodakazi enu.

30Ngizakuvala indawo zenu eziphakemeyo zokukhonzela, ngidilize ama‐altare enu empepha, ngiphosele izidumbu zenu phezu kwezidumbu zezithombe zenu, nginengwe yini.

31Ngizakwenza imizi yenu ibe ngamanxiwa, ngidilize izindlu zenu ezingcwele; kangiyikwamukela iphunga elimnandi leminikelo yenu.

32Ngizakuchitha ilizwe ukuba izitha zenu ezihlala kulo zimangaliswe yilo.

33Ngizakulihlakazela ezizweni, ngihwatshe umhedla ngilixotshe; ilizwe lakini lizakuba yincithakalo, lemizi yenu ichitheke.

34Ng’khona ilizwe lizakuthokoza ngamaSabatha alo nxa lihlala lichithekile, lina lisekhona elizweni lezitha zenu; ilizwe lizakuphumula, lithokoze ngamaSabatha alo.

35Ngesikhathi sonke elihlala lichithekile ngaso lizakuphumula, ukuphumula elalingelakho ngamaSabatha enu nxa lalihlala kilo.

36Mayelana lalabo abaseleyo phakathi kwenu, ngizakwenza inhliziyo zabo zesabe emazweni ezitha zabo; lapho besizwa ihlamvu linyikinyeka, bazakubaleka, babaleke njengomuntu obalekela impi, bawe bengaxotshwa muntu.

37Bazakugwenxana kungathi babalekela impi, bengaxotshwa muntu. Kaliyikuba lamandla okumelana lezitha zenu.

38Lizakubhubhela ezizweni, lelizwe lezitha zenu lizakulidla.

39Abaseleyo phakathi kwenu bazakubhubha emazweni ezitha zabo ngenxa yobubi babo, babhubhe langenxa yobubi baboyise.

40Bazakuvuma ububi babo lobubi baboyise, ububi ababenzayo kimi, futhi abahamba ngabo ngokuphambene lami.

41Lami ngizahamba ngokuphambene labo, ngibase elizweni lezitha zabo; ng’khona inhliziyo zabo ezingcolileyo zizakuzithoba, bavume ukutshaywa ngenxa yobubi babo.

42Ngizakukhumbula isivumelwano sami loJakobe, lesivumelwano sami loIsaka, lesivumelwano sami loAbrahama, ngilikhumbule lelizwe.Gen 28:13–14; 26:3–4; 17:7–8

43Kodwa ilizwe lizakutshiywa yibo, lithokoze ngamaSabatha alo lisahlezi lichithekile, lingelabo. Bazakutshaywa ngenxa yobubi babo, ngoba balahla izahlulelo zami, badelela izimiso zami.

44Kantike, lapho sebefikile elizweni lezitha zabo, kangiyikubalahla, futhi kangiyikunengwa yibo ukuze ngibaqothule, ngeqe isivumelwano sami labo, ngoba ngiyiNkosi uNkulunkulu wabo.

45Ngenxa yabo ngizakhumbula isivumelwano labokhokho babo engabakhupha elizweni laseGibithe emehlweni ezizwe, ukuba ngibe nguNkulunkulu wabo. NgiyiNkosi.

46Lezi yizimiso lezahlulelo lemilayo iNkosi eyakwenzayo ngoMose phakathi kwayo labantu bakoIsrayeli entabeni yaseSinayi.