Isa 33 - Ndebele Bible (iBhayibhili Elingcwele) 1978

INkosi izakhululula abantu bayo

1Maye kini, bachithi, elingachithwanga lina!

Lina bakhohlisi, elingakhohliswanga muntu!

Kodwa lapho seliqedile ukuchitha, lizakuchithwa lina,

lalapho seliqedile ukukhohlisa, lizakhohliswa lina.

2Nkosi, woba lomusa kithi, ulithemba lethu.

Usivikele insuku zonke,

usikhulule esikhathini sokuhlupheka.

3Ekudumeni komsindo abantu bayabaleka,

ekuziphakamiseni kwakho izizwe ziyachitheka;

4njengezintethe ezinengi zifika ziqede konke,

ngokunjalo abantu baqeda zonke impahla zezizwe zibe yimpango.

5INkosi iphakeme, ngoba ihlala phezulu,

izaligcwalisa iZiyone ngokufaneleyo langokulunga,

6ibe yinsika ezikhathini zalo;

ukuhlakanipha lokwazi kuqinisa ukusilisa kwayo;

ukwesaba iNkosi kuligugu lalo.

7Khangela, amaqhawe ahlaba umkhosi;

izithunywa ezithunyelwa ukudinga ukuthula ziyakhala kakhulu.

8Imigwaqo isisele ize,

kakuselamantu ohamba ngayo;

izivumelwano ziyaphulwa,

labafakazayo bayadelelwa,

kakho okhathalelwayo.

9Ilizwe lichithekile, lisele lize,

izihlahla zeLebanoni ziyafa;

iSharoni elivundileyo selinjengenkangala.

eBashani laseKarmeli kuvuthuka amahlamvu ezihlahla.

10INkosi ithi: Sengizavukake,

khathesi ngizatshengisa amandla ami.

11Likhulelwe ngamakhoba, selizazala izibi;

umoya wenu ungumlilo ozaliqeda.

12Abantu bazachotshozwa babe njengekalaga,

lanjengameva aganyuliweyo atshiswa ngomlilo.

13Zwanini, lina elikhatshana, engikwenzileyo;

lani eliseduze, vumani amandla ami.

14Izoni zaseZiyone ziyesaba,

ukuthuthumela kubehlele abangamesabiyo uNkulunkulu,

bathi: Ngubani phakathi kwethu ongahlala lomlilo oqothulayo?

Ngubani phakathi kwethu ongahlala lokutshisa okungapheliyo?

15Yena ohamba ngokulunga, akhulume ngobuqotho,

ozonda ukuzuza inzuzo ngokucindezela,

owala ukwamukela imali yokuthengwa,

owala ukuchitha igazi,

locimeza amehlo akhe ukuba angafumani ithuba lokwenza okubi;

16yena uzakuhlala ekuphakameni,

isivikelo sakhe sibe njengenqaba eqinileyo,

uzakuzuza ukudla okwaneleyo,

lamanzi akhe kawayikusweleka.

17Amehlo enu azayibona inkosi ebuhleni bayo,

abone ilizwe elibanzi.

18Lizakhumbula okwakulesabisa, lithi:

Bangaphi khathesi ababebala?

Bangaphi ababethelisa umthelo?

Bangaphi ababebala izinqaba na?

19Kalisayikubabona futhi abezizwe abadelelayo,

abantu bolimi olungazwakaliyo, elingaluqedisisiyo,

abakhuluma ngokugagasa elingakuzwayo.

20Khangelani iZiyone, umuzi wemikhosi yethu emisiweyo;

khangelani iJerusalema,

indawo elivikelekileyo njengethente elingelakususwa,

elizikhonkwane zalo kaziyikusitshulwa,

lezintambo zalo ezingayikuqamuka.

21Khona lapho iNkosi izasitshengisa ubukhosi bayo;

kuzaba yindawo yemifula lezifula ezibanzi,

lapho kungahambi khona imikolo yezitha,

lemikolo emikhulu engedluli khona.

22Ngoba iNkosi ingumahluleli wethu, iNkosi ingumbusi wethu,

iNkosi yinkosi yethu, izakusikhulula.

23— Ingoda zakho ziyaxega; kaziyikubamba insika yomkolo endaweni yayo,

loba ziqinise isayili ivulekile —

Ng’khonake kuzakwabiwa impango enengi,

labaqhulayo labo bazakuzuza impango.

24Kakulamuntu ohlala khona ozakuthi: Mina ngiyagula.

Abantu abahlala khona bazathethelelwa izono zabo.