Hos 2 - Ndebele Bible (iBhayibhili Elingcwele) 1978

INkosi ithanda abantu bayo abangathembekanga

1Bizani abafowenu lithi ngabantu bami, labodadewenu lithi ngabathandekayo.

2Solani unyoko, limsole,

ngoba kasuye umkami, lami kangisiyo indoda yakhe,

ukuba ayekele ukuwula kwakhe,

asuse izigqizo zokufeba kwakhe emabeleni akhe,

3funa ngimhlubule abe nqunu,

abe njengosukwini azalwa ngalo,

ngimenze afanane lenkangala,

ngimbeke abe njengelizwe elomileyo,

ngimbulale ngokoma.

4Kangiyikubahawukela labantwana bakhe,

ngoba bangabantwana bokufetshwa.

5Ngoba unina wabo uwulile,

owabazalayo wenzile ihlazo.

Ngoba wathi: Ngizazilandela izithandwa zami,

ezingipha ukudla lamanzi,

loboya bezimvu, lesikusha,

lamafutha lokunathwayo.

6Ngalokhoke ngizavala indlela yakhe ngameva,

ngimakhele umduli ukuba angazifumani indlela zakhe ezindala.

7Uzathungatha izithandwa zakhe, kodwa angazifici;

uzazidinga, kodwa angazifumani.

Abesesithi: Sengizabuyela endodeni yami yokuqala,

ngoba kwakungcono kimi ngalesosikhathi kulakhathesi.

8Wayengakwazi ukuba kwakuyimi engangimnika amabele lewayini elitsha lamafutha,

ngimnika isiliva esinengi legolide elinengi abakusebenzisela uBali.

9Ngakhoke ngizathatha amabele ami ngesikhathi sokuvuna,

lewayini lami ngesikhathi salo;

ngithathe loboya bami bezimvu lesikhusha sami,

okuzakwembesa ubunqunu bakhe.

10Sengizakwambula ihlazo lakhe phambi kwezithandwa zakhe,

kungabi khona omophulayo esandleni sami.

11Ngizaqeda konke ukuthokoza kwakhe,

amadili akhe, lokuthwasa kwenyanga, lamaSabatha akhe,

lemikhosi yakhe yonke emisiweyo.

12Ngizagamula izihlahla zakhe zamavini lezemikhiwa,

atsho ngazo ukuthi: Lezi zingumvuzo wami,

izithandwa zami ezinginike wona.

Ngizazenza zibe ligusu,

zidliwe zinyamazana zeganga.

13Ngizamtshaya ngenxa yezinsuku zemikhosi yaboBali,

ayebatshisela ngazo impepha,

ezicecisa ngamasongo langamangqongqo,

walandela izithandwa zakhe, wangikhohlwa, kutsho iNkosi.

14Ngalokhoke ngizamhuga, ngimuse enkangala, ngimduduze.

15Laphoke ngizambuyisela izivini zakhe,

ngenze isihotsha saseAkori, okutsho iNhlupheko, sibe nguMnyango wethemba.

Uzaphendula lapho njengasensukwini zobutsha bakhe,

njengasosukwini lokuphuma kwakhe eGibithe.

16Kuzakuthi ngalolosuku, kutsho iNkosi, ungibize uthi: Mkami; ungabe usangibiza: Bali wami.

17Ngoba ngizasusa amabizo aboBali emlonyeni wakhe, angabe esezwakala futhi.

18Ngalolosuku ngizakwenza isivumelwano lenyamazana zeganga lenyoni zaphezulu lezinto ezihahabayo ukuba zingahluphi abakoIsrayeli. Ngizakwaphula umtshoko lomkhonto, ngiqede impi emhlabeni, ngikulalise phansi uvikelekile.

19Ngizakuzimisela wena Israyeli ube ngumkami kokuphela, ngizimisele wena ngokuqotho langokulunga langothando olungapheliyo.

20Ngizazimisela wena ngeqiniso; uzangazi mina Nkosi.

21Ngalolosuku, kutsho iNkosi, ngizanika iphezulu impendulo,

lona lizaphendula ngokunisa izulu emhlabeni,

22umhlaba uphendule ngokuthela amabele lewayini lamafutha,

wona aphendule uJezereli ngokumnika ukudla.

23Ngizakumhlanyela uIsrayeli elizweni abe yisivuno sami.

Ngizamhawukela uLo‐Ruhama,

ngithi kuLo‐Ami: Lina lingabantu bami;

yena athi: Wena unguNkulunkulu wethu.