Jobe 38 - Ndebele Bible (iBhayibhili Elingcwele) 1978

INkosi iyamphendula uJobe: uJobe kaqedisisi

1INkosi yasimphendula uJobe isesivunguzaneni isithi:

2Ngubani lo ofiphaza iseluleko sami ngamazwi angelakwazi na?

3Qina njengendoda,

ngizakukubuza, lawe ungiphendule.

4Wawungaphi lapho ngimisa izisekelo zomhlaba na?

Ngitshela uba ulokuqedisisa.

5Ngubani owamisa izilinganiso zawo,

ngoba uyakwazi phela!

Ngubani owelulela intambo yokulinganisa phezu kwawo na?

6Izisekelo zawo zabekwa phezu kwani na?

Ngubani owabeka ilitshe lawo lengonsi,

7lapho inkanyezi zokusa zahlabela kanyekanye,

lamadodana wonke kaNkulunkulu ajabula na?

8Ngubani owavalela ulwandle ngezivalo,

lapho lubhoboka kungathi luphuma esiswini na?

9Yimi engenza amayezi aba yisambatho salo,

lomnyama omkhulu waba yimbeleko yalo,

10ngalumisela umkhawulo,

ngaluvalela ngemigoqo langezivalo,

11ngathi: Uzafika lapho, kodwa ungadluli,

amavinqo akho azigqajayo azaphelela lapha.

12Lokhu wena waba khona wake walawula ukusa,

wenza ukudabuka kokusa ukuba kuyazi indawo yakho,

13ukuba kubambe imiphetho yomhlaba,

kuthintithe ababi kuwo na?

14Umhlaba uphenduke njengebumba liphenduka ngaphansi kophawu lokunamathisela,

imibala yawo ikhanye njengelembu.

15Ababi okwabo ukukhanya kuyasuswa,

lengalo ephakanyiselwe ukutshaya yaphulwa.

16Wake wangena emithonjeni yolwandle,

wahamba phansi enzikini na?

17Amasango okufa wawavulela,

wabona amasango ethunzi lokufa na?

18Ubuqedisisile ububanzi bomhlaba na?

Tshono uba ukwazi konke lokhu.

19Ingaphi indlela eya lapho kuhlala khona ukukhanya,

ingaphi lendawo yomnyama,

20ukuze ikuse elizweni lakho,

uyazazi indlela eziya emzini wakho na?

21Uyazi phela, ngoba wawusuzelwe,

lensuku zakho zinengi.

22Wake wangena eziphaleni zikangqoqwane,

wabona iziphala zesiqhotho,

23engizibekele isikhathi sokuhlupheka,

losuku lokulwa lolwempi na?

24Yiphi indlela eya lapho ukukhanya kwabiwa khona,

lalapho umoya wasempumalanga uhlakazwa khona emhlabeni na?

25Ngubani ogebhe imisele yezihlambo zezulu,

lendlela yokuduma lombane,

26ukuba anise izulu emhlabeni lapho kungelamuntu khona,

lasenkangala engahlali muntu,

27ukugcwalisa inkangala logwadule,

ukuba utshani buhlume emhlabeni na?

28Izulu liloyise yini,

futhi ngubani owazala amathonsi amazolo na?

29Ungqoqwane wavela esiswini sikabani,

leliqhwa laphezulu lazalwa ngubani na?

30Amanzi aphenduka abe lukhuni njengelitshe,

lolwandle lujiye phezulu.

31Ungawabopha amaketane esiLimela,

uthukulule izintambo zenkanyezi ezithiwa yiziNja na?

32Ungakhupha izinkanyezi ngesikhathi sazo,

ukhokhele inkanyezi ezithiwa ziNgulube kanye labantwana bazo na?

33Uyazazi izimiso zasezulwini na?

Ungazimisa emhlabeni na?

34Ungawalawula amayezi amnyama ukuba akunethise ngamanzi awo amanengi na?

35Ungakulawula ukuphazima kombane ukuba kuze kuwe,

kufike kuthi: Sesifikile, na?

36Ngubani owabeka ukuhlakanipha enzikini zomnyama,

wafihla ukuqedisisa ensitha na?

37Ngubani ongabuthanisa amayezi ezulu,

athulule imithombo yasezulwini,

38ukuba uthuli lubuthane lube yizigaqa,

lamagade abumbane?

39Ungasizingelela isilwane ukudla,

ungayisuthisa imidlwane yesilwane,

40lapho zilele ezikhundleni zazo,

zicatheme emihomeni yazo na?

41Ngubani onika iwabayi ukudla kwalo,

lapho amatsiyane alo ekhala kuNkulunkulu,

ezulazula ngokuswela ukudla na?