Hez 21 - Ndebele Bible (iBhayibhili Elingcwele) 1978

Umkhonto weNkosi

1Ilizwi leNkosi lafika kimi lathi:

2Ndoda, khangela ngaseJerusalema, utshumayele ngezindawo zakhona ezingcwele, utshumayele ngelizwe lakoIsrayeli,

3uthi kilo: INkosi ithi: Ngimelene lawe, ngizahwatsha umkhonto wami esambeni sawo, ngibhubhise kuwe abalungileyo lababi.

4Njengoba ngizaqeda kuwe abalungileyo lababi, umkhonto wami uzahwatshelwa bonke abantu, kusukela eningizimu kuze kufike enyakatho.

5Bonke abantu bazakwazi ukuba mina Nkosi ngiwuhwatshile umkhonto wami esambeni sawo, kawusayikubuyiselwa kuso futhi.

6Bubula, ndoda, ububule ngenhliziyo edabukileyo langosizi olukhulu phambi kwabo.

7Nxa besithi kuwe: Ububulelani na? wena uthi: Kungenxa yezindaba ezizayo. Lapho sezifikile, zonke inhliziyo zizagcwala ukwesaba, lezandla zibe buthakathaka, lemimoya yonke ihlupheke, lamadolo wonke atshayane. Nanzoke, sezifikile, zizagcwaliseka, kutsho iNkosi uNkulunkulu.

8Ilizwi leNkosi lafika kimi lathi:

9Ndoda, tshumayela amazwi eNkosi, uthi:

Umkhonto, umkhonto uloliwe, wabuya walolongwa,

10ulolelwe ukubulala,

walolongelwa ukuphazima njengombane.

Intonga iyagwetshwa, ndodana yami,

ukudelela zonke izithombe zesigodo.

11Umkhonto unikelwe ukulolongwa ukuba uphathwe,

uyalolwa ulolongwe ukunikelwa esandleni sombulali.

12Khala ulile, ndoda, ngoba lumkhonto ngowokulwa labantu bami, ngowokulwa lazo zonke izikhulu zakoIsrayeli; zinikelwe kuwo kanye labantu bami. Ngakho tshaya isifuba sakho ngenxa yosizi,

13ngoba kuyikuhlolwa — phoke, kuzakuba njani uba kungesiyo sibili intonga yokudelela na? kutsho iNkosi uNkulunkulu.

14Tshumayela, wena ndoda,

uqakeze izandla zakho,

umkhonto uzagwaza kabili lakathathu,

ungumkhonto wokubulala,

umkhonto wokubulawa okukhulu obahanqayo,

15ukuba inhliziyo zabo zigcwale ukwesaba.

Sengibasongela ngomkhonto emasangweni abo wonke,

umkhonto okhazimulayo njengombane,

walolongelwa ukubulala.

16Wena mkhonto, gwaza ngakwesokunene langakwesokhohlo,

lalapho ungaqonda khona.

17Lami ngizaqakeza izandla zami,

ngiphelelise ukufutheka kwami.

Mina Nkosi, sengikhulumile.

18Ilizwi leNkosi lafika kimi futhi lathi:

19Ndoda, dweba indlela ezimbili zokufika kwenkosi yaseBabiloni, ilomkhonto wayo, zombili zisuke elizweni linye. Umise isiqondiso sendlela, usimise ekuhlanganeni kwezindlela.

20Dweba indlela yokufika kwayo eRaba elakoAmoni lakoJuda laseJerusalema elibiyelweyo.

21Ngoba inkosi yaseBabiloni isimi ekwahlukaneni kwendlela, ekuhlanganeni kwendlela ezimbili, ukuvumisa khona; ikhahlazisa imitshoko, ibuza izithombe ezithiwa ngamaterafi, ihlole izibindi zomhlatshelo.

22Umtshoko wokuvumisa obhalwe ukuthi iJerusalema uwele ngakwesokunene sayo; kulapho okufanele imemeze khona, ihlabe umkhosi wempi, imise izigodo zokudiliza amasango, lamadundulu okuvimbezela, yakhe lezinqaba.

23Ebantwini kuzakhanya kuyikuvumisa kwamanga, kanti kuzangikhumbuza izenzo zabo ezimbi, bazawela ezandleni zezitha zabo.

24Ngakhoke iNkosi uNkulunkulu ithi: Ngoba lingikhumbuze ukona kwenu ngokubeka obala iziphambeko zenu, ukuze kuvele izono zenu ekwenzeni kwenu konke, langoba selikhunjulwa, lizatshaywa ngenxa yazo.

25Wenake, sikhulu sakoIsrayeli oyisixhwali esibi, usuku lwakho selufikile, isikhathi sokutshaywa kwakho kokucina;

26iNkosi uNkulunkulu ithi: Susa iqhiye lakho, wethule umqhele; izinto kaziyikuhlala zinjalo. Phakamisa labo abehliselwe phansi, wehlisele phansi abaphakanyisiweyo.

27Ukuchitheka, ukuchitheka, ngizaletha ukuchitheka emzini okungazanga kube khona ngaphambili, kuze kufike umuntu onguye okhethiweyo ukuba awuthonisise.

28Wena, ndoda, tshumayela uthi: INkosi uNkulunkulu ithi ngamaAmoni ahleka uIsrayeli:

Umkhonto, umkhonto usuhwatshelwe ukubulala,

walolongwa ukuba ukhazimule,

uphazime njengombane.

29— usabona imibono yamanga, uvumise amanga —

ubekwe ezintanyeni zezixhwali ezimbi,

ezilensuku esezifikile, isikhathi sokutshaywa kwazo kokucina.

30Ubuyisele endaweni yawo.

Endaweni lapha wadalelwa khona,

elizweni owadabuka kilo,

ngizakukuthonisisa khona;

31ngehlisele ukuthukuthela kwami phezu kwakho,

ngikuthungele ngomlilo wolaka lwami,

ngikunikele ezandleni zabantu abalolunya,

abakwaziyo ukubulala.

32Uzakuba zinkuni zomlilo,

legazi lakho lichithekele phakathi kwezizwe,

ungabe usakhunjulwa;

ngoba mina Nkosi ngikhulumile.