Hubo 45 - Ndebele Bible (iBhayibhili Elingcwele) 1978

Ihubo elihayelwe inkosi lomlobokazi wayo

1Inhliziyo yami iyaphuphuma ngendaba enhle;

ngikhuluma ngehubo engilihayele inkosi;

ulimi lwami lulungele ukuhaya njengombhali ophangisayo.

2Umuhle wena kulabantu bonke;

mahle amazwi akho;

ngakho uNkulunkulu ukubusisile insuku zonke.

3Hloma ngomkhonto wakho wena qhawe,

ulobukhosi lobukhulu.

4Ebukhosini bakho unqobe ekuphumeni kwakho,

usiyakulwela iqiniso lokuvikela ukulunga;

isandla sakho sokunene sikufundise izinto ezesabekayo.

5Imitshoko yakho ibukhali,

ihlaba inhliziyo zezitha zakho;

izizwe ziyawa phambi kwakho.

6Isihlalo sakho sobukhosi osinikwe nguNkulunkulu simi kuze kube nininini,

lentonga yakho yobukhosi iyintonga yokulunga.

7Uthanda ukulunga, uyazonda okubi;

ngakhoke uNkulunkulu, uNkulunkulu wakho,

ukwenze waba mkhulu

kulabanakwenu ngokukugcoba ngamagcobo entokozo.

8Izambatho zakho zonke ziqholiwe ngemure langenhlaba langekasiya;

ezigodlweni eziceciswe ngempondo zendlovu ukukhala kwamachacho kuyakuthokozisa.

9Amadodakazi amakhosi aphakathi kwabesifazana bakho abadumileyo;

ngasesandleni sokunene kumi inkosikazi ececiswe ngegolide laseOfiri.

10Zwanake, ntombi, uqaphele, ubeke indlebe yakho;

ukhohlwe abantu bakini lendlu kayihlo;

11ng’khona inkosi izakubuthanda ubuhle bakho;

ngoba yona iyinkosi yakho, khothama kuyo.

12Abantu baseTire bazakuncenga umusa wakho ngeziphiwo,

labanothileyo ebantwini bawuncenge ngenhlobo zonke zenotho.

13Indodakazi yenkosi icecisiwe endlini yayo ngezambatho ezilegolide;

14yambethe izambatho ezilemibala eminengi iyasiwa enkosini,

lezintombi ezingabangane bayo ziyayilandela.

15Ngokuthaba langokujabula ziyahamba,

zingena esigodlweni senkosi.

16Amadodana akho nkosi,

azakuthatha isikhundla sabokhokho bakho,

uzakuwabeka abe yizikhulu emhlabeni wonke.

17Ibizo lakho ngizakulenza likhunjulwe ezizukulwaneni zonke;

ngakhoke izizwe zizakukubonga kuze kube nini lanini.