Eks 16 - Ndebele Bible (iBhayibhili Elingcwele) 1978

UNkulunkulu unika abakoIsrayeli imana

1Basebesuka eElimi; yonke impi yakoIsrayeli yafika enkangala yaseSini, ephakathi kweElimi leSinayi, ngosuku lwetshumi lanhlanu lwenyanga yesibili emva kokuphuma kwabo eGibithe.

2Lonke ibandla lakoIsrayeli labasola oMose loAroni enkangala,

3lathi kubo: Kungathi ngabe safa ngesandla seNkosi elizweni laseGibithe lapho sasihlezi khona ngasezimbizeni zenyama, sisidla sisutha; ngoba lisilethe kulinkangala ukuba libulale lonke lelibandla ngendlala.

4INkosi yasisithi kuMose: Ngizakulehlisela isinkwa sivela ezulwini; abantu bazaphuma insuku ngensuku babuthe isabelo esilingene usuku, ukuze ngibalinge, ngibone ukuthi bazakuhamba ngomlayo wami yini.Joha 6:31

5Kuzakuthi ngosuku lwesithupha balungise lokho abakubuthileyo, kuphindwe kabili kulokho abakubuthayo insuku ngensuku.

6UMose loAroni bathi kubo bonke abakoIsrayeli: Kusihlwa lizakwazi ukuthi yiNkosi elikhuphileyo elizweni laseGibithe;

7kusasa lizabona inkazimulo yeNkosi, ngoba izwile ukuyisola kwenu. Thina siyini ukuba lisisole na?

8UMose wathi: INkosi izalinika inyama ibe yikudla kwenu kusihlwa, ilinike isinkwa ekuseni ukuba lidle lisuthe; ngoba iNkosi izwile ukusola kwenu eliyisola ngakho. Ngoba thina siyini? Ukusola kwenu kakungathi, kodwa kungeNkosi.

9UMose wasesithi kuAroni: Tshono kulo lonke ibandla lakoIsrayeli uthi: Sondelani phambi kweNkosi, ngoba izwile ukusola kwenu.

10Kwathi uAroni esakhuluma lebandla lonke lakoIsrayeli, bakhangela ngasenkangala, babona inkazimulo yeNkosi ibonakala eyezini.

11INkosi yakhuluma kuMose,

12yathi: Sengizwile ukusola kwabakoIsrayeli; batshele uthi: Kusihlwa lizakudla inyama, ekuseni lisuthe isinkwa, lazi ukuthi ngiyiNkosi uNkulunkulu wenu.

13Kwathi kusihlwa kwafika izagwaca, zahlala indawo yonke; kusisa kwalala khona amazolo inxa zonke.

14Esenyamalele amazolo, kwabonakala phansi enkangala inhlamvu ezincinyane ezifana longqoqwane emhlabathini.

15Bathi bezibona abakoIsrayeli babuzana besithi: Kuyini lokhu? Ngoba babengazi ukuthi kuyini. UMose wathi kubo: Kuyisinkwa elinike sona iNkosi ukuba lidle.1 Kor 10:3

16Lokhu yikho iNkosi elilaye ngakho yathi: Ilowo lalowomuntu kakubuthe okulingene ukudla kwakhe, athathe iyomeri ngomuntu, abuthe okulingene abantu abasethenteni lakhe.

17Abantu bakoIsrayeli benza njalo, abanye babutha okunengi labanye okuyingcosana.

18Lapho sebelinganise ngeyomeri, lowo owayebuthe okunengi kabanga lokusalayo, lowayebuthe okuyingcosana kaswelanga; ilowo lalowo wayebuthe okulingene ukudla kwakhe.2 Kor 8:15

19UMose wathi kubo: Kungatshiywa lutho kukho kuze kube sekuseni.

20Kodwake kabamlalelanga uMose; abanye babo batshiya okunye kwaze kwaba sekuseni, kwagcwala impethu, kwanuka. UMose wabathukuthelela.

21Insuku ngensuku bakubutha ekuseni, kwaba yilowo lalowomuntu wabutha okulingene ukudla kwakhe. Kodwa lapho ilanga selitshisa, kwancibilika.

22Ngosuku lwesithupha babutha isinkwa esiphindwe kabili, kwaba ngamayomeri amabili ngomuntu. Zonke izinduna zabantu zaya kuMose, zamtshela lokhu.

23Wathi kuzo: Yikho iNkosi ekutshiloyo ukuthi: Kusasa kulusuku lokuphumula, iSabatha elingcwele leNkosi. Yosani lokho okufanele ukosiwa, lipheke lokho okufanele ukuphekwa, lizibekele lokho okuseleyo ukuba kugcinwe kuze kube sekuseni.Eks 20:8–11

24Bakubeka kwaze kwaba sekuseni njengokulaya kukaMose. Kakunukanga, kakubanga lampethu.

25UMose wasesithi: Dlanini lokhu lamuhla, ngoba lamuhla kuliSabatha leNkosi; kaliyikukuthola egangeni lamuhla.

26Lizakukubutha insuku eziyisithupha; kodwa ngosuku lwesikhombisa oluliSabatha kakuyikuba khona.

27Kanti ngosuku lwesikhombisa kwaphuma abanye abantu ukukubutha, kodwa kabakutholanga.

28INkosi yathi kuMose: Koze kube nini lisala ukugcina imilayo yami lemithetho yami na?

29Njengoba iNkosi ilinikile iSabatha, iyalinika ngosuku lwesithupha isinkwa sensuku ezimbili; hlalani kube yilowo lalowo endaweni yakhe, kungaphumi muntu endaweni yakhe ngosuku lwesikhombisa.

30Ngakho abantu baphumula ngosuku lwesikhombisa.

31Indlu yakoIsrayeli yakubiza ngokuthi yiMana; kwakunjengenhlanyelo emhlophe, kwezwakala emlonyeni njengezinkwa ezilenyosi.Nani 11:7, 8

32UMose wathi: Lokhu yikho iNkosi elaye ngakho ukuthi: Kakugcinelwe izizukulwana zenu iyomeri eligcwele lokhu, ukuba zibone isinkwa engalinika sona enkangala ekulikhupheni kwami elizweni laseGibithe.

33UMose wathi kuAroni: Thatha inqayi, ufake kuyo imana elingena leyomeri eligcweleyo, uyibeke phambi kweNkosi, igcinelwe izizukulwana zenu.Heb 9:4

34Njengokutsho kweNkosi kuMose, uAroni wayibeka phambi komtshokotsho ukuba igcinwe.

35AbakoIsrayeli badla imana iminyaka engamatshumi amane baze bafika elizweni elakhiweyo. Badla imana baze bafika emikhawulweni yaseKanani.Josh 5:12

36Iyomeri liyingxenye yetshumi yehefa.