Hubo 22 - Ndebele Bible (iBhayibhili Elingcwele) 1978

Ukukhala okulosizi. Ukudumisa iNkosi

1Nkulunkulu wami, Nkulunkulu wami, ungitshiyeleni na?

Kungani ukhatshana lokungisiza,

ukhatshana lamazwi okububula kwami na?

2Nkulunkulu wami, ngiyakhala emini, kodwa kawungiphenduli,

lebusuku, kodwa kangilakho ukuphumula.

3Kanti wena ungoNgcwele,

udunyiswa ngabakoIsrayeli.

4Okhokho bathemba kuwe,

bathemba, wena wabakhulula.

5Bakhala kuwe, bakhululwa,

bathemba wena, kabayangekanga.

6Kodwa mina ngiyimpethu, kangisuye muntu,

ngihlekwa ngabantu, ngeyiswe yibo bonke.

7Bonke abangibonayo bayangihleka,

bangikhamisela imilomo, banikine amakhanda abo,

8besithi: Wathemba iNkosi; kayimkhulule,

imophule, ngoba iyamthanda.

9Impela nguwe owangikhupha esiswini,

wangilondoloza ngisemabeleni kamama.

10Nganikelwa kuwe kusukela ekuzalweni kwami,

unguNkulunkulu wami kusukela ekuzalweni kwami ngumama.

11Ungabi khatshana lami,

ngoba inhlupheko iseduze, kakho osizayo.

12Inkunzi ezinengi zingihanqile,

inkunzi ezilamandla zaseBashani zingizingelezele;

13zingikhamisela imilomo yazo

njengezilwane eziphangayo lezibhongayo.

14Ngichithiwe njengamanzi,

wonke amathambo ami anyele,

inhliziyo yami injengengcino,

incibilikile phakathi kwami.

15Umlomo wami womile njengodengezi,

lolimi lwami lunamathele emihlathini yami;

ungitshiya othulini lokufa.

16Yebo, izinja zingibuthanele,

lexuku lababi lingihanqile;

izandla zami lenyawo zami bazibhobozile.

17Ngingabala wonke amathambo ami;

bayangijolozela bengiklolodela.

18Babelana ingubo zami,

benzelana inkatho ngezambatho zami.

19Kodwa, wena Nkosi, kawungabi khatshana;

wena msizi wami, phangisa ungisize.

20Khulula umphefumulo wami kuwo umkhonto,

lokuphila kwami emandleni ezinja.

21Ngophula emlonyeni wesilwane,

lomphefumulo wami empondweni zenyathi.

22Ngizakubatshumayeza abafowethu ibizo lakho,

ngikudumise phakathi kwebandla.

23Lina elesaba iNkosi ibongeni,

lina lonke nzalo kaJakobe, idumiseni,

liyesabe lina lonke nzalo kaIsrayeli.

24Ngoba kayimdelelanga ohluphekayo,

kayinengwanga yikuhlupheka kwakhe;

kayimfihlelanga ubuso bayo,

kodwa lapho ekhala kuyo, imzwile.

25Kuvela kuwe ukudumisa kwami ebandleni elikhulu;

izithembiso zami ngizakuzigcwalisa phambi kwalabo abayesabayo.

26Abayanga bazakudla basuthe;

abafuna iNkosi bazakuyidumisa.

Inhliziyo zenu kaziphile kuze kube nininini.

27Imikhawulo yonke yomhlaba izakukhumbula, iphendukele eNkosini;

lezizukulwana zonke zezizwe zizakhonza phambi kwayo.

28Ngoba umbuso ungoweNkosi, yiyo ebusa izizwe.

29Zonke izipatsha zomhlaba zizakhuleka kuyo,

bonke abasebeseduze lokufa bazakhothama kuyo.

30Inzalo izakuyikhonza;

isizukulwana esizayo sizakutshelwa ngayo iNkosi,

31labantu abazazalwa bazatshelwa ukuba lokhu kwenziwe yiNkosi.