Nani 22 - Ndebele Bible (iBhayibhili Elingcwele) 1978

UBalaki loBalami

1Abantu bakoIsrayeli basuka lapho, bayamisa emagcekeni aseMowabi, ngaphetsheya kweJordani, eduze leJeriko.

2UBalaki indodana kaZipori wabona konke uIsrayeli akwenze kumaAmori.

3UMowabi wayebesaba abakoIsrayeli kakhulu, ngoba babebanengi. Watshaywa luvalo ngenxa yabo.

4UMowabi wathi kubalisa bamaMidiyani: Impi le izaqothula konke esilakho, njengenkabi edla bonke utshani edlelweni. Ngakho uBalaki indodana kaZipori, owayeyinkosi yamaMowabi ngalesosikhathi,

5wathuma izigijimi ukubiza uBalami indodana kaBeyori, owayesePethori eduze lomfula iYufrathi, elizweni lamaAmavi, wathi: Khangela, lababantu abavela eGibithe bagcwele ilizwe, futhi sebehlala maqondana lami.2 Pet 2:15–16; Juda 11

6Woza khathesi, ungiqalekisele lababantu, ngoba bayangahlula; mhlawumbe singaba lamandla okubanqoba, sibaxotshe elizweni, ngoba ngiyazi ukuthi lowo ombusisayo wena ubusisiwe, lalowo omqalekisayo uqalekisiwe.

7Abalisa bamaMowabi labalisa bamaMidiyani bahamba bephethe imali yokuvumisa; bafika kuBalami, bambikela ilizwi likaBalaki.

8Wathi kubo: Hlalani lapha lobubusuku, ngizakulitshela lokho iNkosi ezakutsho kimi. Izikhulu zamaMowabi zahlala loBalami.

9UNkulunkulu wafika kuBalami, wathi: Ngobani lamadoda akuwe na?

10UBalami waphendula wathi kuNkulunkulu: UBalaki, indodana kaZipori, inkosi yaseMowabi, uthumele ilizwi kimi esithi:

11Khangela, lababantu abaphume eGibithe bagcwele ilizwe; woza khathesi, ungiqalekisele bona; mhlawumbe ngingaba lamandla okulwa labo, ngibaxotshe.

12UNkulunkulu wathi kuBalami: Ungabohamba labo; ungabaqalekisi labobantu, ngoba babusisiwe.

13UBalami wavuka ekuseni, wathi kuzo izikhulu zikaBalaki: Buyelani elizweni lakini, ngoba iNkosi iyangalela ukuhamba lani.

14Ngakho izikhulu zamaMowabi zasuka, zaya kuBalaki, zathi: UBalami uyala ukuza lathi.

15UBalaki wabuya wathuma izikhulu ezinengi ezidumileyo kulezakuqala.

16Zafika kuBalami zathi kuye: UBalaki indodana kaZipori uthi: Ake ungavumeli lutho ukukuvimbela ukuba uze kimi.

17Ngoba isibili ngizakukunika udumo, ngikwenze lokho ozakungitshela khona. Woza, ungiqalekisele lababantu.

18Kodwa uBalami waphendula wathi encekwini zikaBalaki: Lanxa uBalaki ebezakungipha indlu yakhe igcwele isiliva legolide, bengingayikweqa ilizwi leNkosi uNkulunkulu wami lakokuncinyane nje.

19Hlalani lapha lani lobubusuku, ukuba ngazi ukuthi iNkosi izakuthini kimi futhi.

20UNkulunkulu weza kuBalami ebusuku wathi kuye: Uba amadoda efika ukukubiza, vuka uhambe lawo; kodwa wenze lokho engikutshela khona kuphela.

21UBalami wavuka ekuseni, wabophela ubabhemi wakhe, wahamba lezikhulu zamaMowabi.

22UNkulunkulu wamthukuthelela ngenxa yokuthi wayevumile ukuhamba; isithunywa seNkosi sema endleleni ukuba simvimbele. Wayegade ubabhemi wakhe, lenceku zakhe ezimbili zilaye.

23Ubabhemi wasesibona isithunywa seNkosi simi endleleni, siphethe umhedla esandleni saso; ubabhemi waphambuka endleleni, wangena ensimini. Kodwa uBalami wamtshaya ubabhemi ukumbuyisela endleleni.

24Isithunywa seNkosi sasesisima endleleni endaweni eminyeneyo phakathi kwezivini, kukhona ngapha langapha umthangala.

25Lapho ubabhemi ebona isithunywa seNkosi wagudla umthangala, walimaza unyawo lukaBalami; ngakho wabuya wamtshaya futhi.

26Isithunywa seNkosi sahamba phambili, sema endaweni eminyeneyo lapho kwakungekho khona indlela yokuphendukela ngakwesokunene langakwesokhohlo.

27Nxa ubabhemi ebona isithunywa seNkosi, walala phansi. UBalami wathukuthela, wamtshaya ubabhemi ngenduku yakhe.

28INkosi yasivula umlomo kababhemi, wathi kuBalami: Ngenzeni kuwe ukuba ungitshaye kathathu na?

29UBalami wathi kubabhemi: Kungoba udlale ngami. Kungathi ngabe ngilomhedla, bengizakukubulala.

30Ubabhemi wathi kuBalami: Angisuye ubabhemi wakho omgade konke ukuphila kwakho kuze kube lamhla na? Ngake ngenze nje kuwe na? Yena wathi, Atshi.

31INkosi yasivula amehlo kaBalami, wabona isithunywa seNkosi simi endleleni siphethe umhedla waso; wakhothamisa ikhanda lakhe, wathi mbo ngobuso phansi.

32Isithunywa seNkosi sathi kuye: Umtshayeleni ubabhemi wakho kathathu na? Khangela, ngizile ukukuvimbela, ngoba indlela yakho imbi kimi;

33ubabhemi wangibona, waphambuka phambi kwami kathathu. Uba ubengaphambukanga, ngabe ngikubulele, ngamyekela yena ukuba aphile.

34UBalami wathi kuso isithunywa seNkosi: Ngonile, ngoba bengingazi ukuthi umi endleleni ukungivimbela. Ngakhoke uba loluhambo lulubi kuwe, ngizabuyela emuva.

35Isithunywa seNkosi sathi kuye: Hamba lalawomadoda; kodwa ukhulume kuphela lelolizwi engizakukutshela lona. UBalami wasehamba lezikhulu zikaBalaki.

36UBalaki esezwile ukuthi uBalami uyeza, waphuma ukuyamhlangabeza eAri elaseMowabi ngaseArinoni elingumkhawulo welizwe lakhe, ngasekucineni komkhawulo.

37UBalaki wathi kuBalami: Kangithumelanga ilizwi ukukubiza na? Pho, kawufikanga kimi ngani na? Uthi kangilamandla okukunika udumo na?

38UBalami wathi kuBalaki: Khangela, sengifikile kuwe. Ngingakhulumani khathesi na? Ilizwi uNkulunkulu alifaka emlonyeni wami yilo engizakulikhuluma.

39UBalami wasehamba loBalaki, bafika eKiriyathi‐Huzothi.

40UBalaki wanikela ngomhlatshelo wezinkabi lezimvu, wathuma okunye kwazo kuBalami lakuzo izikhulu ezilaye.

41Kusisa uBalaki wamthatha uBalami, wamkhwelisa endaweni ephakemeyo yokukhonzela ethiwa iBamothi‐Bali, wabona lapho ingxenye yezihonqo zabakoIsrayeli.