Zaga 26 - Ndebele Bible (iBhayibhili Elingcwele) 1978

1Njengokuba ungqoqwane engafanelanga ehlobo

lezulu ngesikhathi sokuvuna,

ngokunjalo udumo kalusifanelanga isithutha.

2Njengentaka lenkonjane ezibhubhuzelayo zingehli zihlale,

sinjalo isiqalekiso esingelasizatho kasihlali.

3Isiswepu ngesokutshaya ibhiza,

lamatomu ngawokufaka ubabhemi,

loswazi lungolokutshaya isithutha.

4Ungaphenduli isithutha ngokobuthutha baso,

funa lawe ufane laso;

5phendula isithutha ngokobuthutha baso,

ukuba singathi sihlakaniphile.

6Othuma ilizwi ngesithutha

unjengoquma inyawo zakhe, uzahlupheka kakhulu.

7Isaga esikhulunywa yisithutha

sinjengemilenze yesiqhuli, kayisizilutho.

8Ukudumisa isithutha kakusizi,

kunjengokubophela ilitshe esavutheni.

9Isaga esikhulunywa yisithutha

sinjengogatsha olulameva oluphethwe ngodakiweyo.

10Oqatsha umuntu oyisithutha loba odakiweyo

unjengomtshoki ociba bonke abadlulayo.

11Isithutha esiphinda ubuthutha baso

sinjengenja ebuyela emahlanzweni ayo.

12Uyabona lowomuntu othi uhlakaniphile na?

Isithutha silethemba elikhulu kulaye.

13Olivila uthi: Kukhona isilwane ngaphandle;

yebo, sikhona endleleni.

14Njengesivalo siphenduka ngamabhanti,

ngokunjalo ivila liphenduka lisembhedeni walo.

15Ivila lithatha ukudla emganwini,

kodwa lehluleke ukukufaka emlonyeni walo ngoba livilapha.

16Ivila lithi lihlakaniphile kakhulu

ukwedlula abayisikhombisa abangaphendula ngokuhlakanipha.

17Ongena ekuxabaneni okungesikho okwakhe

unjengomuntu obamba inja edlulayo ngendlebe zayo.

18Njengohlanya oluphosa izikhuni ezivuthayo lemitshoko, izinto eziyingozi,

19unjalo umuntu okhohlisa omunye, abesesithi: Bengisoma nje.

20Uba kungelankuni umlilo uyacima;

lalapho kungekho ukunyeya, ukuxabana kuyaphela.

21Njengemvutho emalahleni lenkuni emlilweni

unjalo umuntu oxabanisayo ekuvuseni inkani.

22Amazwi omuntu onyeyayo anjengezibondlo,

aginywa, angene phakathi komuntu.

23Amazwi athabisayo afihla inhliziyo embi

anjengamanyele esiliva akhazimulayo asetshenziswa ukubhada ukhamba.

24Ozonda umuntu angawakhuluma amazwi amnandi,

kodwa afihle inkohliso enhliziyweni yakhe;

25lapho ekhuluma amazwi amahle, ungamthembi,

ngoba kukhona enhliziyweni yakhe okubi okunengi;

26angasibekela inzondo yakhe ngobuqili,

kodwa ububi bakhe buzakwambulwa phakathi kwabantu.

27Ombayo umgodi uzakuwela kuwo,

logiqa ilitshe, lizabuyela phezu kwakhe.

28Oqamba amanga ngabanye uyabazonda,

lolalisa ngolimi uyaletha ukuchitheka.