Hlu 3 - Ndebele Bible (iBhayibhili Elingcwele) 1978

INkosi itshiya izizwe ezithile ukuba ihlole uIsrayeli ngazo

1Lezi yilezozizwe iNkosi eyazitshiya ukuba ihlole uIsrayeli ngazo labo ababengazilwanga izimpi zaseKanani,

2yayiqonde ukufundisa izizukulwana zabakoIsrayeli ezizayo, ikakhulu labo abangafundanga ukulwa esikhathini esingaphambili, ukulwa impi.

3Yilezike izizwe; amakhosi amahlanu amaFilistiya, lawo wonke amaKanani, lamaSidoni, lamaHivi ayehlala entabeni zaseLebanoni, kusukela entabeni yaseBali‐Hermoni kuze kufike ngasekungeneni kweHamathi.

4Zazingezokuhlola uIsrayeli ukuze kwaziwe ukuba uIsrayeli uzayilalela yini imilayo yeNkosi eyabalaya yona oyise ngoMose.

5AbakoIsrayeli bahlala phakathi kwamaKanani lamaHethi lamaAmori lamaPerizi lamaHivi lamaJebusi;

6bathatha amadodakazi azo aba ngomkabo, amadodakazi abo bawendisela amadodana abo, bakhonza onkulunkulu bazo.

UOthiniyeli

7AbakoIsrayeli benza okubi phambi kweNkosi, bayikhohlwa iNkosi uNkulunkulu wabo, bakhonza oBali laboAshera.

8Ngakho ulaka lweNkosi lwavutha kuIsrayeli, yabanikela esandleni sikaKushani‐Rishathayimi inkosi yaseAramu eliphakathi kwemifula emibili; abakoIsrayeli bayisebenzela inkosi uKushani‐Rishathayimi iminyaka eficaminwembili.

9Kodwa kwathi lapho abakoIsrayeli bekhala eNkosini, iNkosi yabalethela umkhululi owabakhululayo, uOthiniyeli indodana kaKenazi umnawakhe kaKalebi.

10Umoya weNkosi wehlela kuye, waba ngumahluleli koIsrayeli, waphuma impi, iNkosi yanikela esandleni sakhe uKushani‐Rishathayimi inkosi yaseAramu, wamnqoba.

11Kwaba khona ukuthula elizweni iminyaka engamatshumi amane. UOthiniyeli indodana kaKenazi wasesifa.

UEhudi

12AbakoIsrayeli babuya benza okubi phambi kweNkosi. INkosi yasimnika amandla uEgiloni inkosi yaseMowabi ukulwa loIsrayeli, ngoba babenzile okubi phambi kwayo.

13Wahlangana lamaAmoni lamaAmaleki, bamahlula uIsrayeli, bawuthumba umuzi waMalala.

14AbakoIsrayeli babengaphansi kukaEgiloni inkosi yaseMowabi iminyaka elitshumi leficaminwembili.

15Kodwa kwathi lapho abakoIsrayeli bekhala eNkosini, iNkosi yabalethela umkhululi, uEhudi indodana kaGera, owakoBenjamini owayelinxele. AbakoIsrayeli bathumela umthelo wabo kuEgiloni inkosi yaseMowabi ngaye.

16UEhudi wazenzela umhedla obukhali inxa zombili, ubude bawo buyingalonye, wawuhloma ngaphansi kwezigqoko zakhe ngasethangazini langasokunene.

17Wamnika uEgiloni inkosi yaseMowabi lowomthelo. UEgiloni wayengumuntu oqatha.

18UEhudi eseqedile ukumnika umthelo, waseyekela abantu ababethwele umthelo ukuba bahambe.

19Kodwa yena wabuyela emuva ngasematsheni abaziweyo phansi kweGiligali, wathi: Nkosi, ngilendaba eyimfihlo kuwe. UEgiloni wasebathulisa, wabakhupha bonke ababelaye.

20UEhudi wasondela kuye ehlezi yedwa endlini yakhe epholileyo esophahleni. UEhudi wathi kuye: Ngilendaba evela kuNkulunkulu kuwe. UEgiloni wasesukuma esihlalweni sakhe;

21uEhudi waseselula isandla sakhe sekhohlo, wahwatshwa umhedla ngasethangazini lakhe langasokunene, wamhlaba ngawo esiswini,

22kwaze kwatshona lesilanda, amahwahwa awugubuzela umhedla, kawuncothulanga esiswini sakhe, kwaphuma lomswane.

23UEhudi wasephumela phandle, wavala iminyango yendlu esophahleni, wayikhiya.

24Esehambile, kwafika izinceku; kwathi lapho zibona iminyango yendlu esophahleni ikhiyiwe, zathi mhlawumbe uye ngaphandle endlini epholileyo.

25Zalinda zaze zaphelelwa yikwazi; kodwa lapho elokhu engayivuli iminyango yendlu esophahleni, zathatha ikhiye zayivula, zabona inkosi yazo ilele phansi isifile.

26UEhudi wabaleka zisalibele, wedlula ematsheni ebaziweyo, waya eSeyira.

27Kwathi esefikile wakhalisa uphondo ezintabeni zakoEfrayimi. AbakoIsrayeli behla laye ezintabeni ebahola.

28Wathi kibo: Ngilandelani, ngoba iNkosi inikele izitha zenu amaMowabi ezandleni zenu. Ngakhoke bamlandela, bawavalela amaMowabi ukuba angachaphi ngamazibuko eJordani, kabavumelanga muntu ukuchapha.

29Babulala ngalesosikhathi amaMowabi angaba zinkulungwane ezilitshumi, amadoda empi aqinileyo lalamandla, kakuphunyukanga muntu.

30AmaMowabi anqotshwa mhlalokho ngabakoIsrayeli. Kwaba khona ukuthula elizweni iminyaka engamatshumi eficaminwembili.

UShamigari

31Ngemva kukaEhudi kwaba khona uShamigari indodana kaAnathi, owabulala amaFilistiya angamakhulu ayisithupha ngocijo lwenkabi; laye wamkhulula uIsrayeli.