Hubo 66 - Ndebele Bible (iBhayibhili Elingcwele) 1978

Ukumdumisa uNkulunkulu lokumbonga

1Mhubeleni ngokuthokoza uNkulunkulu, mhlaba wonke;

2hlabelani ngodumo lwebizo lakhe,

libabaze ukudunyiswa kwakhe.

3Tshonini kuNkulunkulu lithi: Yeka ukwesabeka kwezenzo zakho!

Ngenxa yobukhulu bamandla akho izitha zakho ziyaququbala phambi kwakho.

4Umhlaba wonke uyakukhonza,

uhlabela izibongo zakho,

uhlabela ukubonga ibizo lakho.

5Wozani libone izenzo zikaNkulunkulu;

kuyesabeka ukwenza kwakhe phakathi kwabantu.

6Ulwandle waluphendula lwaba ngumhlaba owomileyo,

abantu bawela umfula ngenyawo.

Lapho sathokoza kuye.

7Ubusa ngamandla akhe kuze kube nininini,

omehlo akhe ayazilinda izizwe;

abalenkani kabangaziphakamisi.

8Bongani uNkulunkulu lina zizwe,

lizwakalise ukudunyiswa kwakhe,

9yena osilondoloze phakathi kwabaphilayo,

ongavumanga ukuba inyawo zethu zitshelele.

10Ngoba wena, Nkulunkulu, usihlolile,

wasihlola njengesiliva.

11Wasingenisa embuleni,

wabeka imithwalo enzima emihlana yethu,

12wavumela abantu ukukhwela phezu kwamakhanda ethu;

sadabula phakathi komlilo lamanzi,

kodwa wasiletha endaweni ebanzi.

13Ngizakungena endlini yakho ngileminikelo yokutshiswa,

ngizakugcwalisa kuwe izifungo zami,

14ezakhulunywa ngomlomo wami,

zathenjiswa ngomlomo wami ngisekuhluphekeni.

15Ngizakunikela kuwe iminikelo yokutshiswa yezinonileyo,

kanye lephunga lomnikelo wezinqama;

ngizakunikela umnikelo wezinkunzi lezimbuzi.

16Wozani lizwe lina lonke elimesabayo uNkulunkulu,

ngizakulitshela lokho angenzele khona.

17Ngakhala kuye,

ngamdumisa ngolimi lwami.

18Uba bengiqonde ububi enhliziyweni yami,

ibingayikuzwa iNkosi.

19Impela uNkulunkulu ungizwile,

walalela ilizwi lomkhuleko wami.

20Kabongwe uNkulunkulu,

ngoba kawalanga umkhuleko wami,

futhi kalususanga kimi uthando lwakhe olungapheliyo.