2 Sam 5 - Ndebele Bible (iBhayibhili Elingcwele) 1978

UDavida ubusa ilizwe lonke lakoIsrayeli

1Zonke izizwe zakoIsrayeli zeza kuDavida eHebroni, zathi: Thina siyizihlobo zakho.1 Lan 11:1–9; 14:1–7

2Esikhathini esidlulileyo, uSawuli eseyinkosi yethu, nguwe owakhokhela uIsrayeli; iNkosi uNkulunkulu yathi kuwe: Wena uzakuba ngumalusi wabantu bami uIsrayeli, uzakuba ngumbusi wabo.

3Kwafika bonke abadala bakoIsrayeli enkosini uDavida, eHebroni; yenza isivumelwano labo eHebroni phambi kweNkosi; bamgcoba, waba yinkosi koIsrayeli.

4UDavida wayeleminyaka engamatshumi amathathu ekuqaliseni kwakhe ukubusa; wabusa iminyaka engamatshumi amane.1 Kho 2:11; 1 Lan 3:4; 29:27

5EHebroni wabusa koJuda iminyaka eyisikhombisa lenyanga eziyisithupha; eJerusalema wabusa iminyaka engamatshumi amathathu lantathu koIsrayeli wonke lakoJuda.

UDavida uthatha inqaba yaseZiyone

6Inkosi uDavida labantu bayo baya eJerusalema ukulwa lamaJebusi ayehlala khona; wona atsho kuDavida athi: Kawuyikungena lapha, uzaxotshwa layiziphofu labaqhulayo; ecabanga ukuba uDavida angeke angene lapho.Josh 15:63; Hlu 1:21

7Kodwa uDavida wayithatha inqaba yaseZiyone esithiwa ngumuzi kaDavida.

8UDavida wathi ngalolosuku: Yilowo lalowo ohlasela umJebusi kakhwele ngomgelo wamanzi, ahlasele abaqhulayo leziphofu abazondwa nguDavida. Ngalokhoke kuthiwa: Iziphofu labaqhulayo kabayikungena endlini yeNkosi.

9UDavida wahlala enqabeni, wayibiza ngokuthi ngumuzi kaDavida. UDavida wakha umuzi inxa zonke, kusukela edundulwini elithiwa yiMilo kusiya phakathi.

10UDavida waqhubeka njalo esiba lamandla, ngoba iNkosi, uNkulunkulu wamabandla, yayilaye.

11UHiramu inkosi yaseTire wathuma izithunywa kuDavida, lemikusu, lababazi bezigodo labamatshe ukumakhela uDavida indlu.

12UDavida wabona ukuthi iNkosi yayimmisile ukuba abe yinkosi koIsrayeli, lokuthi uwuphakamisile umbuso wakhe ngenxa yabantu bayo uIsrayeli.

Abantwana bakaDavida abazalelwa eJerusalema

13UDavida wathatha abanye abafazi eJerusalema, esesukile eHebroni, wazala amanye amadodana lamadodakazi.

14Nanka amabizo alabo abazalela eJerusalema, oShamuwa, loShobabi, loNathani, loSolomoni,

15loIbihari, loElishuwa, loNefegi, loJafiya,

16loElishama, loEliyada, loElifeleti.

UDavida unqoba amaFilistiya

17Kwathi amaFilistiya esezwile ukuba uDavida ugcotshiwe ukuba abe yinkosi yakoIsrayeli, wonke amaFilistiya enyuka ukuyamdinga uDavida; uDavida wakuzwa lokho, wehlela enqabeni.1 Lan 14:8–17

18AmaFilistiya esefikile agcwala isihotsha saseRefayimi.

19UDavida wasebuza eNkosini esithi: Ngiyewahlasela amaFilistiya na? Uzawanikela esandleni sami na? INkosi yathi kuDavida: Yebo, hamba, ngoba ngizawanikela impela esandleni sakho amaFilistiya.

20UDavida wafika eBali‐Perazimi, wawahlula khona amaFilistiya, wathi: INkosi izifohlile izitha zami phambi kwami njengokufohla kwamanzi. Ngakhoke leyondawo yasithiwa yiBali‐Perazimi.

21AmaFilistiya abaleka atshiya izithombe zawo lapho, uDavida labantu bakhe bazithatha.

22AmaFilistiya abuya futhi, agcwala isihotsha saseRefayimi.

23Lapho uDavida ebuza iNkosi, yona yathi: Ungayi; bhoda ngemuva kwawo, uwasukele maqondana lezihlahla zebhalisamu.

24Kuzakuthi lapho usizwa umsindo wokuhamba phezu kwezihlahla uphangiseke, ngoba ngizabe ngihamba phambi kwakho ukunqoba impi yamaFilistiya.

25UDavida wenza njengokulaywa kwakhe yiNkosi, wawaxotsha amaFilistiya kusukela eGeba kwaze kwafika eGezeri.