Hubo 86 - Ndebele Bible (iBhayibhili Elingcwele) 1978

Umkhuleko wokucela isihawu sikaNkulunkulu

1Nkosi, beka indlebe yakho, ungiphendule,

ngoba ngiyahlupheka, ngiyaswela.

2Londoloza ukuphila kwami, ngoba ngingoqotho;

siza inceku yakho ekuthembayo, wena Nkulunkulu wami.

3Woba lesihawu kimi, Nkosi,

ngoba ngikhala kuwe usuku lonke.

4Thokozisa umphefumulo wenceku yakho,

ngoba kuwe, Nkosi, ngiyawuphakamisela umphefumulo wami.

5Ngoba wena, Nkosi, ulungile, uyathethelela;

uthando lwakho olungapheliyo lukhulu kubo bonke abakhuleka kuwe.

6Nkosi, lalela umkhuleko wami,

zwana ilizwi lokunxusa kwami.

7Ngosuku lokuhlupheka kwami ngikhuleka kuwe,

ngoba uzakungiphendula.

8Phakathi kwabonkulunkulu kakho ofana lawe, Nkosi,

kayikho lemisebenzi efana leyakho.

9Izizwe zonke ozenzileyo zizakuza zikhothame phambi kwakho, Nkosi,

zidumise ibizo lakho.

10Ngoba wena umkhulu, wenza izinto ezimangalisayo,

unguNkulunkulu wena wedwa.

11Nkosi, ngifundisa indlela yakho,

ukuze ngihambe eqinisweni lakho;

yenza inhliziyo yami iqonde ntonye,

yesabe ibizo lakho.

12Ngiyakubonga, Nkosi Nkulunkulu wami, ngenhliziyo yami yonke;

ngizakulidumisa ibizo lakho kuze kube nininini.

13Ngoba lukhulu kimi uthando lwakho olungapheliyo;

wakhulula umphefumulo wami enzikini yendawo yabafileyo.

14Nkulunkulu, abazigqajayo bangivukele,

ixuku labantu abalesihluku lifuna ukungibulala,

abantu abangakukhatheleliyo wena.

15Kodwa wena, Nkosi, unguNkulunkulu olesihawu, olomusa,

ophuza ukuthukuthela,

ogcwele uthando olungapheliyo lobuqotho.

16Ngikhangela ungihawukele;

uyiphe inceku yakho amandla akho,

uyisize indodana yencekukazi yakho.

17Ngitshengisa isibonakaliso somusa wakho;

labo abangizondayo babone bayangeke,

ukuthi wena, Nkosi, ungisizile wangiduduza.