Zaga 4 - Ndebele Bible (iBhayibhili Elingcwele) 1978

Ukuhlakanipha kuletha inzuzo ethile

1Bantwana bami, zwanini ukufundisa kukayihlo,

lilalele ukuba lizuze ukuqedisisa;

2ngoba ngiyalinika izifundiso ezinhle;

lingakutshiyi ukufundisa kwami.

3Lapho ngangingumntwana kababa,

ngingumntwanyana oyedwa kamama,

4wangifundisa wathi kimi:

Bambelela emazwini ami ngenhliziyo yakho,

ugcine imilayo yami, uphile;

5ungawakhohlwa amazwi ami, futhi ungawafulatheli.

Zuza ukuhlakanipha, ube lokuqedisisa.

6Ungakulahli ukuhlakanipha, kuzakukulondoloza;

ukuthande, kuzakukulinda.

7Ukuhlakanipha kudlula konke;

zuza ukuhlakanipha;

uzuze ukuqedisisa ngakho konke olakho;

8ukuthande kakhulu, kuzakukuphakamisa,

ukugone, kuzakukulethela udumo.

9Kuzakwethwesa umqhele omuhle ekhanda lakho,

kukuthwalise umqhele wodumo.

10Zwana, mntanami, wamukele amazwi ami,

ukuba uphile iminyaka eminengi.

11Ngikufundisile indlela yokuhlakanipha,

ngikuholile endleleni zobuqotho.

12Ekuhambeni kwakho kawuzukutshelela,

ekugijimeni kwakho kawuyikukhubeka.

13Bambelela kulokho okufundileyo,

ungakuyekeli ukuba kuphunyuke,

ukugcine kuhle, ngoba kuyikuphila kwakho.

14Ungangeni emkhondweni wababi,

ungahambi endleleni yabonayo.

15Ixwaye, ungahambi ngayo,

uyinqwethe, udlulele phambili.

16Ngoba kabalali uba bengenzanga okubi,

baswela ubuthongo uba bengakhubekisanga muntu.

17Ububi buyikudla kwabo,

lesihluku siliwayini labo.

18Indlela yabalungileyo injengovivi lokusa

oluqhubeka ngokukhanya njalo kuze kube semini;

19kodwa indlela yababi injengomnyama omkhulu,

kabazi ukuthi kuyini okubakhubekisayo.

20Mntanami, zwana lokho engikukhulumayo,

ulalele amazwi ami.

21Kawangaphunyuki phambi kwakho,

uwagcine enhliziyweni yakho;

22ngoba ayikuphila kuye owafumanayo,

lempilo yomzimba wakhe wonke.

23Phezu kwakho konke gcina inhliziyo yakho,

ngoba kuvela kiyo ukuphila.

24Nqanda umlomo wakho emazwini amabi,

lendebe zakho ekukhulumeni okukhohlisayo.

25Amehlo akho kawakhangele phambili,

ujolozele okuphambi kwakho.

26Qaphelisa indlela ehanjwa zinyawo zakho,

ukuba konke ukuhamba kwakho kuqine.

27Ungaphambukeli kokubi,

unganyatheli lapho kukhona okubi.