Hubo 17 - Ndebele Bible (iBhayibhili Elingcwele) 1978

Umkhuleko wozingelwa engelacala

1Zwana ukucela kwami ngokulunga, Nkosi, ulalele ukukhala kwami;

ubeke indlebe ekukhulekeni kwami

okuphuma emlonyeni ongelankohliso.

2Ukwahlulelwa kwami kakuvele kuwe,

lamehlo akho abone okulungileyo.

3Uba ulinga inhliziyo yami,

uba ungihambela ebusuku,

uba ungihlola, kawuyikufica ububi kimi;

kangikhulumanga okubi.

4Ezenzweni zabantu ngiyazinqanda ezindleleni zababi ngelizwi lomlomo wakho.

5Izinyathelo zami zinamathele ezindleleni zakho,

lenyawo zami kazitshelelanga.

6Ngiyakhala kuwe ngoba uzakungiphendula, Nkulunkulu;

beka indlebe yakho kimi, uzwe amazwi ami.

7Akutshengise ukumangaliswa kothando lwakho olungapheliyo,

wena owophula labo abacatshela izitha zabo

esandleni sakho sokunene.

8Ngilondoloza ngibe ligugu kuwe;

ungifihle emthunzini wamaphiko akho

9kubo ababi abangilimazayo,

kuzo izitha zokuphila kwami ezingihanqileyo.

10Inhliziyo zabo bazivalela isihawu;

bayazincoma ngomlomo wabo.

11Bayangithungatha, sebengihanqile;

bafunisisa ithuba lokungiwisela phansi.

12Banjengesilwane esikhuthalele ukubamba,

njengesilwane esicathemeyo.

13Vuka, Nkosi! ubahlangabeze, ubachithe.

Ngomkhonto wakho khulula ukuphila kwami kubo ababi,

14lakubo abantu ngesandla sakho, Nkosi,

abantu basemhlabeni abasabelo sabo sikulokhukuphila.

Gcwalisa izisu zabo ngezinto zakho,

ukuze abantwana babo bazuze okwanele ukubasuthisa,

batshiyele lezingane zabo.

15Kodwa mina ngizakhangela ubuso bakho ekulungeni,

nganeliswe yisimo sakho ekuphaphameni kwami.