1Mayelana lokunikelela abangcwele kakusweleki ukuba ngililobele;
2ngoba ngiyakwazi ukuzilungisela kwenu engizincoma ngakho ngani kwabaseMakedoniya, ngisithi iAkaya laselizilungisele kusukela nyakenye; lokutshisekela kwenu kubavusile abanengi.
3Ngithumile abazalwane ukuba ukuzincoma kwami ngani kungenziwa ize maqondana lalokhu, ukuze lihlale selilungile njengokutsho kwami,
4funa uba kufika kanye lami abaseMakedoniya, balifumane lingalungiselanga, siyangeke thina ngokulithemba kwethu, singasatsho lina phela.
5Ngakhoke ngithi kufanele ukuba ngicele abazalwane ukuba bangandulele ukuza kini, balungisele ngaphambili lesosiphiwo senu elasithembisayo, ukuze sihlale silungisiwe, sibe yisiphiwo esiphiwa ngesihle, singabi ngesokubanjwa ngamandla.
6Khumbulani ukuthi ohlanyela ingcosana uzakuvuna ingcosana, lohlanyela kakhulu uzakuvuna kakhulu.
7Ilowo lalowo kanikele njengalokhu azikhethela khona enhliziyweni yakhe, kungabi ngokudonda ingabe ngokubanjwa ngamandla, ngoba uNkulunkulu uyamthanda onikela ngokuthokoza.
8UNkulunkulu ulamandla okulinika kakhulu iziphiwo zonke zomusa, ukuze kuthi ngokwanela kwenu ezintweni zonke lasezikhathini zonke, likhule emisebenzini yonke emihle,
9njengokulotshiweyo kokuthi:
Uphene kakhulu, wabanika abayanga;
ukulunga kwakhe kuhlala kuze kube nini lanini.
10Yena onika inhlanyelo yokuhlanyela lesinkwa sokudliwa uzakulinika inhlanyelo ayandise, ukuze litshaye inala yokulunga kwenu.Isa 55:10
11Lizakunothiswa kukho konke kube khona ukuphana okuzaveza ukubongwa kukaNkulunkulu ngathi.
12Ngoba ukwenza linkonzo kakuqedi ukuswela kwabangcwele kuphela, kodwa futhi kwandisa ukubongwa kukaNkulunkulu ngabanengi.
13Ngoba ngokubona linkonzo abanengi bazakudumisa uNkulunkulu lapho bebona ukulalela kwenu ekuvumeni ivangeli likaKristu, lalapho bebona ukuphana kwenu ekusweleni kwabo lekusweleni kwabo bonke.
14Bazalilangatha belikhulekela ngenxa yenotho yomusa uNkulunkulu alinike wona.
15Kabongwe uNkulunkulu ngenxa yesipho sakhe esingakhulumekiyo.
Who We AreWhat We EelieveWhat We Do
2025 by iamachristian.org,Inc All rights reserved.
