2 Kor 12 - Ndebele Bible (iBhayibhili Elingcwele) 1978

UPawuli wamukela izambulo kuJesu

1Kumele ukuba ngizincome lanxa kungasizi lutho; sengizakulandisa ngemibono langezambulo zeNkosi.

2Ngiyamazi umuntu ekuKristu, sekudlule iminyaka elitshumi lane, owahluthulwa wasiwa kwelesithathu izulu; loba wayesemzimbeni, loba wayengaphandle komzimba, kangazi, nguNkulunkulu owaziyo.

3Yebo, ngiyamazi umuntu onjalo; loba wayesemzimbeni, loba wayengekho emzimbeni, kangazi, nguNkulunkulu owaziyo;

4ukuthi wahluthulwa wasiwa eParadise, wezwa amazwi angakhulumekiyo, okungavunyelwa ukuba umuntu awakhulume.

5Ngizakuzincoma ngonjalo, kodwa ngami uqobo kangiyikuzincoma, kuphela ngobuthakathaka bami.

6Uba bengingathanda ukuzincoma, bengingazukuba yisithutha; ngoba bengizabe ngikhuluma iqiniso, kodwa ngiyakuyekela lokho, ngoba kangithandi ukuba umuntu acabange ngami okungaphezu kwalokho angibona ngiyikho lakuzwa ngami.

7Futhi ukuze ngingaziphakamisi kakhulu ngobukhulu bezambulo, nganikwa ameva enyameni, isithunywa sikaSathane, ukungidutshuza, ukuze ngingaziphakamisi kakhulu.

8Ngalokhoke nganxusa iNkosi kathathu ukuba asuswe kimi.

9Kodwa yathi kimi: Umusa wami ukwanele; ngoba amandla ami apheleliswa ebuthakathakeni. Ngakhoke ngizakujabulela ukuzincoma ngobuthakathaka bami, ukuze amandla kaKristu ahlale phezu kwami.

10Ngakhoke ngikholiwe yibuthakathaka, lokuhlekwa, lobunzima, lokuzingelwa, lokukhathazeka, ngenxa kaKristu; ngoba nxa ngibuthakathaka, kung’khona ngilamandla.

Ukusolwa kwakhe libandla kakukho eqinisweni

11Sengize ngaba yisithutha, kodwa yini elingicindezele kukho. Bekufanele ukuba ngivezwe yini. Ngoba kangisilele ngalutho kulabo abaphostoli abakhulu, loba ngingesilutho lwalutho.

12Impela impawu zobuphostoli obuqotho zenziwa phakathi kwenu ngokubekezela konke, langezibonakaliso, langezimangaliso, langemisebenzi yamandla.

13Kambe lancitshwani kulamanye amabandla ngaphandle kokuthi mina uqobo kangibanga ngumthwalo kini na? Ngithethelelani lokhukuphosisa!

14Sengilungele ukuza kini ngokwesithathu; kangizukuba ngumthwalo kini, ngoba kangifuni okwenu, ngifuna lina. Ngoba abantwana kabafanele ukudlinzekela abazali, kodwa abazali bafanele ukudlinzekela abantwana.

15Minake ngijabulela kakhulu ukunikela konke, yebo, ngizinikela mina uqobo ngenxa yenu. Uba ngilithanda kakhulu, kanti mina ngifanele ukuthandwa kancinyane na?

16Kangibanga ngumthwalo kini mina uqobo, kodwa lithi ngiyisihlakaniphi, ngalahlula ngobuqili.

17Ngaliqilibizela yini ngomunye walabo engabathuma kini na?

18Ngacela uTitosi ukuza kini, ngathuma kanye laye umzalwane; uTitosi waliqilibizela na? Kasihambanga ngoMoya munye langandlelanye na?

Izeluleko zokucina zikaPawuli kwabaseKorinte

19Belikade licabanga ukuthi siyaziphendulela kini na? Atshi, thina besikhuluma phambi kukaNkulunkulu sikuKristu; konke kwenzelwa ukwakhiwa kwenu, bathandwayo.

20Ngilovalo lokuthi ekufikeni kwami mhlawumbe ngizakulifumana lingenjengalokho engikuthandayo, lami lingifumane ngingenjengalokho elikuthandayo. Ngilovalo lokuthi mhlawumbe kungaba khona ukuxabana, lomona, lokuthukuthela, lombango, lokuhleba, lokunyeya, lokuzazisa, leziphithiphithi.

21Ngilovalo lokuthi ekufikeni kwami futhi uNkulunkulu wami angithobise phambi kwenu, ngililele abanengi abonileyo ngaphambili, abangaphendukanga kukho ukungcola lobufebe lamanyala abakwenzileyo.