Hez 40 - Ndebele Bible (iBhayibhili Elingcwele) 1978

Umbono womprofethi ngethempeli elitsha

1Ngomnyaka wamatshumi amabili lanhlanu wokuthunjwa kwethu, ekuqaliseni komnyaka, ngosuku lwetshumi lwenyanga, ngomnyaka wetshumi lane emva kokuthunjwa komuzi, ngalolosuku, isandla seNkosi saba phezu kwami.

2Ngombono uNkulunkulu wangisa elizweni lakoIsrayeli, wangibeka phezu kwentaba ende kakhulu, lapho engabona khona okwakungathi yizindlu zomuzi kuphambi kwami.Isam 21:10

3Lapho angiletha khona, kwakukhona umuntu olesimo esifana lethusi, ephethe intambo ephothiweyo lomhlanga wokulinganisa, emi esangweni.Isam 11:1; 21:15

4Lowomuntu wathi kimi: Ndoda, khangela ngamehlo akho, uzwe ngendlebe zakho, ubeke ingqondo yakho kulokho konke engizakukutshengisa khona, ngoba ulethelwe ukuba ngikutshengise khona, utshumayele koIsrayeli konke lokho ozakukubona.

5Kwakukhona umduli ngaphandle ozingelezele indawo yethempeli, ubude bomhlanga wokulinganisa owawuphethwe ngulowomuntu babuzingalo eziyisithupha, ubude bengalo inye buyingalo lesandla. Waselinganisa ubuqatha bomduli, balingana lomhlanga munye, lobude balingana lomhlanga munye.1 Kho 6:1–38; 2 Lan 3:1–9

6Wasesiya esangweni elikhangele impumalanga, wakhwela ngezinyathelo, walinganisa umbundu wesango, walingana lomhlanga munye ukutshona kwawo.

7Walinganisa izindlu eziseceleni, zaba ngumhlanga munye ubude, lomhlanga munye ububanzi. Walinganisa umkhandlo ophakathi kwezindlu eziseceleni, waba zingalo ezinhlanu. Umbundu wesango ongasendlini engasekungeneni kwesango langaphakathi waba ngumhlanga munye.

8Waselinganisa indlu engasekungeneni, yaba zingalo ezificaminwembili,

9lensika zayo zaba zingalo ezimbili. Indlu esesangweni yayisekucineni ngaphakathi.

10Kwakukhona izindlu ezintathu ngapha langapha kwesango langasempumalanga, zontathu zazilingana, lensika zangapha langapha zazilingana.

11Waselinganisa ububanzi besango, baba zingalo czilitshumi, lobude besango baba zingalo ezilitshumi lantathu.

12Kwakukhona umnxibo phambi kwezindlu eziseceleni, uyingalo ngapha langapha. Izindlu eziseceleni zazizingalo eziyisithupha ngapha langapha.

13Waselinganisa isango kusukela ngasemva kwenye indlu kusiya ngasemva kwenye, kwaba zingalo ezingamatshumi amabili lanhlanu ububanzi, kusukela emnyango kusiya emnyango.

14Waselinganisa indlu esekungeneni, yaba zingalo ezingamatshumi amabili; kwakukhona iguma elizingelezele indlu engasekungeneni kwesango.

15Kusukela ngaphambi kwesango ekungeneni kuze kube ngasekucineni ngaphakathi endlini esekungeneni kwesango kwaba zingalo ezingamatshumi amahlanu.

16Emaceleni womabili esango kwakulamawindi, ezindlini eziseceleni emkhandlweni ophakathi kwazo; kwakukhona amawindi indawo zonke zendlu engasekungeneni kwesango, lezihlahla zelala zicecise izinsika.

17Wasengisa egumeni elingaphandle, kwakukhona lapho izindlwana lendawo egandelweyo kuzingelezele iguma, izindlwana ezingamatshumi amathathu zingaphambi kwendawo egandelweyo.

18Indawo egandelweyo yayingasemasangweni, ilingana lobude bamasango, yayiyindawo engaphansi.

19Waselinganisa ububanzi beguma, kusukela ngaphambi kwesango elingaphansi kusiya ngaphandle kwesango elingaphakathi, kwaba zingalo ezilikhulu. Wasengisa ngasenyakatho,

20kwakukhona lapho isango elalikhangele inyakatho, lilisango leguma langaphakathi. Walinganisa ubude balo lobubanzi balo.

21Lezindlu zalo ezintathu ngapha langapha lensika zalo lendlu yazo engasekungeneni kwakulingana lokwesango lokuqala. Ubude balo babuzingalo ezingamatshumi amahlanu, lobubanzi balo babuzingalo ezingamatshumi amabili lanhlanu.

22Amawindi alo, lendlu yalo engasekungeneni, lezihlahla zalo zamalala kwakulingana lokwesango elikhangele impumalanga. Kwakulezinyathelo eziyisikhombisa eziya kilo, lendlu esekungeneni yayingaphakathi.

23Maqondana lesango ngasenyakatho, njengasempumalanga, kwakukhona isango leguma, walinganisa kusukela esangweni kusiya esangweni, kwaba zingalo ezilikhulu.

24Wasengisa ngaseningizimu, kwakukhona isango ngaseningizimu; walinganisa insika zalo lendlu yalo esekungeneni, kwakulingana lezinye.

25Kwakukhona kilo amawindi inxa zonke lasendlini yalo esekungeneni, ayefana lamanye amawindi. Ubude balo babuzingalo ezingamatshumi amahlanu, lobubanzi balo buzingalo ezingamatshumi amabili lanhlanu.

26Kwakukhona izinyathelo eziyisikhombisa eziya kilo, lendlu esekungeneni yayiphakathi; kwakulezihlahla zamalala ensikeni zalo, ngapha langapha kwalo.

27Kwakukhona isango ngaseningizimu kweguma elingaphakathi; walinganisa kusukela esangweni kusiya esangweni ngaseningizimu, kwaba zingalo ezilikhulu.

28Wasengiletha egumeni elingaphakathi ngesango laseningizimu, walinganisa isango laseningizimu, lalilingana lamanye.

29Izindlu zalo eziseceleni lensika zalo lendlu yalo esekungeneni zazilingana lezinye. Kwakukhona kilo amawindi inxa zonke lasendlini yalo esekungeneni. Ubude balo babuzingalo ezingamatshumi amahlanu, lobubanzi balo buzingalo ezingamatshumi amabili lanhlanu.

30Kwakukhona izindlu ezisekungeneni inxa zonke, ubude bazo buzingalo ezingamatshumi amabili lanhlanu, lobubanzi bazo buzingalo ezinhlanu.

31Indlu yalo esekungeneni yayikhangele iguma elingaphandle, kukhona izihlahla zamalala ensikeni zalo; kwakukhona izinyathelo ezificaminwembili zokuya kilo.

32Wasengisa egumeni elingaphakathi ngasempumalanga, walinganisa isango, lalilingana lamanye.

33Izindlu zalo eziseceleni, lensika zalo, lendlu yalo esekungeneni zazilingana lezinye; kwakukhona kilo amawindi inxa zonke lasendlini yalo esekungeneni. Ubude balo babuzingalo ezingamatshumi amahlanu, lobubanzi balo buzingalo ezingamatshumi amabili lanhlanu.

34Indlu yalo esekungeneni yayikhangele iguma elingaphandle, kukhona izihlahla zamalala ensikeni zalo, ngapha langapha kwalo; kwakukhona izinyathelo ezificaminwembili zokuya kilo.

35Wasengisa ngasesangweni elingasenyakatho, walilinganisa, lalilingana lamanye.

36Izindlu zalo eziseceleni, lensika zalo, lendlu yalo esekungeneni zazilingana lezinye; lalilamawindi inxa zonke; ubude balo babuzingalo ezingamatshumi amahlanu, lobubanzi balo buzingalo ezingamatshumi amabili lanhlanu.

37Indlu yalo esekungeneni yayikhangele iguma elingaphandle, kwakukhona izihlahla zamalala ensikeni zalo, ngapha langapha kwalo, kwakukhona izinyathelo ezificaminwembili zokuya kilo.

38Kwakukhona indlu eyayilomnyango ongasendlini esekungeneni kwesango, lapho okwakuzageziselwa khona umnikelo wokutshiswa.

39Endlini esekungeneni kwesango kwakukhona amatafula amabili ngapha langapha, okwakuzahlatshelwa kiwo umnikelo wokutshiswa lomnikelo wesono lomnikelo wecala.

40Ngaphandle kwendlu esekungeneni, ngasekungeneni kwesango elingasenyakatho, kwakukhona amatafula amabili, langaphakathi kwendlu esekungeneni kwesango kwakukhona amatafula amabili.

41Amatafula amane ayengaphakathi, lamatafula amane ayengaphandle, eceleni kwesango, wonke ayeficaminwembili lapho kwakuzahlatshelwa khona umhlatshelo.

42Kwakukhona futhi amatafula amane ayenziwe ngamatshe abaziweyo, angawomnikelo wokutshiswa, ubude bawo buyingalo lengxenye, lobubanzi bawo buyingalo lengxenye, lokuphakama kwawo kuyingalo, okwakuzabekwa kiwo izinto zokuhlaba umnikelo wokutshiswa leminye iminikelo.

43Imibundu, ubude bayo bungangesandla, yayifakiwe ngaphakathi inxa zonke. Ematafuleni kwakuzabekwa inyama yomnikelo.

44Wasengingenisa egumeni elingaphakathi, kwakukhona egumeni elingaphakathi izindlu ezimbili, enye ingasesangweni elingasenyakatho, ikhangele iningizimu, lenye ingasesangweni elingaseningizimu, ikhangele inyakatho.

45Wasesithi kimi: Lindlu ekhangele iningizimu ngeyabapristi abaphethe ithempeli,

46lendlu ekhangele inyakatho ngeyabapristi abaphethe ialtare. Ngitsho amadodana kaZadoki okuyiwona wodwa phakathi kwamadodana kaLevi angasondela eNkosini ukuyikhonza.

47Waselinganisa iguma, ubude balo baba yizingalo ezilikhulu, lobubanzi balo buzingalo ezilikhulu, inxa zonke. Ialtare laliphambi kwethempeli.

48Wasengiletha endlini esekungeneni kwethempeli, walinganisa insika zendlu, zaba zingalo ezinhlanu inxa zonke; ububanzi besango baba zingalo ezilitshumi lane; lobubanzi bemiduli eseceleni kwesango baba zingalo ezintathu ngapha langapha.

49Ubude bendlu esekungeneni babuzingalo ezingamatshumi amabili, lobubanzi bayo buzingalo ezilitshumi lambili; kwakukhona izinyathelo ezilitshumi eziya kilo; kwakukhona insika ekungeneni kwesango inxa zombili.