1 Sam 26 - Ndebele Bible (iBhayibhili Elingcwele) 1978

UDavida uyekela uSawuli ngokwesibili

1AbaseZifi beza kuSawuli eGibeya, bathi: UDavida ucatsha entabeni yaseHakila engasempumalanga kwaseJeshimoni.

2USawuli wasesuka esiya enkangala yaseZifi elabantu abakhethiweyo bakoIsrayeli abayizinkulungwane ezintathu, ukuba adinge uDavida enkangala yaseZifi.

3USawuli wamisa entabeni yaseHakila emgwaqweni ngempumalanga kwaseJeshimoni, kodwa uDavida wahlala enkangala. Kwathi esebonile ukuthi uSawuli uyamdinga enkangala,

4wasethuma inhloli ukuba azi ukuthi uSawuli ufikile impela.

5UDavida wasesuka esiya endaweni lapho uSawuli amise khona; wabona indawo uSawuli ahlala kuyo, eloAbineri indodana kaNeri, induna yempi yakhe. USawuli wayelele phakathi kwezihonqo, lempi yayimisile imhanqile.

6UDavida wasesithi kuAhimeleki umHethi, lakuAbishayi indodana kaZeruya, umfowabo kaJowabi: Ngubani ozahamba lami kuSawuli ezihonqweni na? UAbishayi wathi: Ngizahamba lawe.

7Ngakho uDavida loAbishayi baya emabuthweni ebusuku; uSawuli wayelele ubuthongo ezihonqweni, umkhonto wakhe wawugxunyekiwe phansi ngasekhanda lakhe; uAbineri lamabutho akhe belele bemhanqile.

8UAbishayi wathi kuDavida: UNkulunkulu unikele isitha sakho esandleni sakho lamuhla; kahle ngimgwazele phansi ngomkhonto, ngimjuqe kanye.

9Kodwa uDavida wathi kuAbishayi: Ungambulali; ngoba ngubani ongaphakamisela isandla sakhe kogcotshiweyo weNkosi angabi lacala na?

10UDavida wasesithi: Ngifunga iNkosi, iNkosi izamtshaya; loba kufike nje usuku lwakhe lokufa; kumbe aye empini afele khona.

11INkosi kayingivimbele ukuba ngiphakamisele isandla sami kogcotshiweyo weNkosi; kodwa thatha umkhonto lowo ongekhanda lakhe, lesigxingi samanzi, sihambe.

12UDavida wasethatha umkhonto lesigxingi samanzi ngekhanda likaSawuli; bahamba. Kakubonanga muntu, kakwazanga muntu, kakuvukanga muntu; ngoba babelele bonke, behlelwe yibuthongo obunzima obuvela eNkosini.

13UDavida wasewelela ngaphetsheya, wema engqongeni yentaba khatshana, kukhona ummango omkhulu phakathi kwabo.

14UDavida wasememeza ibutho loAbineri indodana kaNeri, wathi: Kawusabeli, Abineri na? UAbineri wasephendula esithi: Ungubani wena obiza inkosi na?

15UDavida wathi kuAbineri: Lembala uthi uyindoda wena na? Ngubani onjengawe koIsrayeli na? Kungani ungayilindanga inkosi yakho na? Ngoba kwafika umuntu ukubulala uSawuli inkosi yakho.

16Kakukuhle lokhu okwenzileyo. Ngifunga iNkosi, ufanele ukubulawa, ngoba kawuyilindanga inkosi yakho, ogcotshiweyo weNkosi. Ake liboneke ukuba umkhonto wenkosi ungaphi lesigxingi samanzi ebesingekhanda layo.

17USawuli walazi ilizwi likaDavida wathi: Yilizwi lakho lelo, mntanami, Davida na? UDavida wathi: Yilizwi lami, nkosi yami.

18Wasesithi: Inkosi yami ixotshanelani lenceku yayo na? Ngenzeni na? Ngilobubi bani na?

19Ngakhoke, nkosi yami, ake uzwe amazwi, ami. Uba kuyiNkosi uNkulunkulu ekuqubula ngami, kayamukele umnikelo; kodwa uba kungabantu, kabaqalekiswe ngebizo leNkosi uNkulunkulu; ngoba bangixotshile lamuhla ukuba ngingabi lasabelo elizweni leNkosi uNkulunkulu, bathi: Hamba, uyekhonza abanye onkulunkulu.

20Ngakhoke igazi lami kalingachithekeli emhlabathini ngikhatshana leNkosi uNkulunkulu; ngoba inkosi yakoIsrayeli iphumele ukudinga ukuphila kwami, njengomuntu ezingela inkwali ezintabeni.

21USawuli wasesithi: Ngonile; buya, mntanami Davida, ngoba kangisayikukulimaza, ngoba ukuphila kwami bekuligugu kuwe lamuhla. Ngenze ubuphukuphuku, ngaduha kakhulu.

22UDavida wathi: Nanku umkhonto wakho, nkosi! Kayize enye insizwa, iwulande.

23INkosi uNkulunkulu iyamnika umvuzo wonke umuntu ngokulunga kwakhe langokuthembeka kwakhe; ngoba ibikunikele esandleni sami lamuhla, kodwa kangivumanga ukuphakamisela isandla sami phezu kogcotshiweyo weNkosi.

24Futhi njengoba ukuphila kwakho kube ligugu kimi lamuhla, ukuphila kwami kakube ligugu eNkosini uNkulunkulu, ingophule ekuhluphekeni konke.

25USawuli wasesithi kuDavida: Ubusisiwe, wena mntanami Davida. Uzakwenza izinto ezinengi, uphumelele kuzo. UDavida wasehamba ngendlela yakhe, uSawuli wabuyela endaweni yakhe.