Nani 31 - Ndebele Bible (iBhayibhili Elingcwele) 1978

Ukuphindisela kwabakoIsrayeli kumaMidiyani

1INkosi yathi kuMose:

2Baphindiselele abakoIsrayeli kumaMidiyani, andubana ulandele abakini.

3UMose wathi ebantwini: Abanye benu kabahlomele impi ukuba balwe lamaMidiyani, baphindiselele iNkosi kumaMidiyani.

4Thumelani empini abayinkulungwane kuleso lalesosizwe sakoIsrayeli.

5Kwasekuphuma ezigidini zakoIsrayeli abazinkulungwane ezilitshumi lambili zihlomile, kwaba yinkulungwane kuleso lalesosizwe.

6UMose wabathumela empini, kwaba yinkulungwane kuleso lalesosizwe, kanye loFiniyasi indodana kaEleyazare umpristi, owayephethe izitsha zendlu engcwele lempondo zokuhlaba umkhosi.

7Balwa lamaMidiyani, njengokutsho kweNkosi kuMose, babulala bonke abesilisa.

8Babulala njalo lamakhosi amahlanu aseMidiyani, oEvi loRekemi loZuri loHuri loReba; loBalami indodana kaBeyori bambulala ngomkhonto.

9AbakoIsrayeli bathumba abesifazana bamaMidiyani labantwana babo lenkomo zawo zonke, lezimvu zawo, lempahla yawo yonke, kwaba yimpango yabo.

10Batshisa ngomlilo yonke imizi ayehlala kiyo, lazo zonke izihonqo zawo.

11Bathatha yonke impango layo yonke impahla, abantu lezifuyo,

12baletha abathunjiweyo, lempango, lempahla kuMose lakuEleyazare umpristi, lakulo ibandla labakoIsrayeli, ezihonqweni emagcekeni aseMowabi, ngaseJordani eduze leJeriko.

13UMose loEleyazare umpristi lezikhulu zonke zebandla baphuma ukuyabahlangabeza ngaphandle kwezihonqo.

14UMose wathukuthelela izinduna zempi, izinduna zezinkulungwane lezinduna zamakhulu ezazivela empini.

15UMose wathi kuzo: Liyekele abesifazana bonke ukuba baphile na?

16Kanti yibo abenza abakoIsrayeli benze okubi eNkosini endabeni yasePeyori ngeseluleko sikaBalami, kwaze kwafika umkhuhlane phakathi kwebandla leNkosi.Nani 25:1–9

17Ngakhoke bulalani bonke abantwana besilisa, libulale labo bonke abesifazana abalele lamadoda;

18kodwa wonke amankazana angalalanga lamadoda liwayekele ukuba aphile, abe ngawenu.

19Lizahlala ngaphandle kwezihonqo insuku eziyisikhombisa, lina lonke elibulele abantu, lani elithinte isidumbu, lizihlambulule lina labathunjiweyo benu ngosuku lwesithathu langosuku lwesikhombisa,

20lihlambulule zonke ingubo, lezinto zonke ezenziweyo ngesikhumba, lakho konke okwenziweyo ngoboya bembuzi, lezinto zonke ezenziweyo ngesihlahla.

21UEleyazare umpristi wathi kumabutho ayephumile impi: Lokhu kuyisimiso somlayo iNkosi emlaye ngaso uMose yathi:

22Kuphela igolide lesiliva lethusi lensimbi lethini lomnuso,

23konke okungelakutshiswa ngumlilo, lizakukufaka emlilweni, kuhlambuluke; kodwa ezinye izinto zizahlanjululwa ngamanzi. Konke okungatshiswa ngumlilo lizakukufaka emanzini.

24Gezisani ingubo zenu ngosuku lwesikhombisa, lihlambuluke, andubana lingene ezihonqweni.

Ukwahlukaniswa kwempango

25INkosi yathi kuMose:

26Wena, loEleyazare umpristi, lezinhloko zezindlu zebandla, balani impango ethunjiweyo, abantu lezifuyo;

27liyahlukanise ngokulinganayo phakathi kwamabutho aphuma impi lebandla lonke.

28Theliselani iNkosi amabutho ayephumile impi, kube kunye emakhulwini wonke amahlanu awabantu lawezinkomo lawabobabhemi lawezimvu,

29likuthathe engxenyeni yawo, likunike uEleyazare umpristi kube ngumnikelo weNkosi.

30Thathani engxenyeni yabakoIsrayeli kube kunye ematshumini wonke amahlanu, awabantu lawezinkomo lawabobabhemi lawezimvu lawezifuyo zonke, likunike amaLevi alondoloza iTabernakeli leNkosi.

31UMose loEleyazare umpristi benza njengokulaya kweNkosi kuMose.

32Impango eyayisele kulokho okwathathwa ngamabutho yayiyizimvu ezizinkulungwane ezingamakhulu ayisithupha lamatshumi ayisikhombisa lanhlanu,

33lenkomo ezizinkulungwane ezingamatshumi ayisikhombisa lambili,

34labobabhemi abazinkulungwane ezingamatshumi ayisithupha lanye,

35labantu abazinkulungwane ezingamatshumi amathathu lambili, ngitsho abesifazana abangalalanga lamadoda.

36Ingxenye eyisabelo sababephumile impi yayiyizimvu ezizinkulungwane ezingamakhulu amathathu lamatshumi amathathu lesikhombisa, lamakhulu amahlanu;

37isabelo seNkosi sezimvu sasingamakhulu ayisithupha, lamatshumi ayisikhombisa lanhlanu.

38Inkomo zazizinkulungwane ezingamatshumi amathathu lesithupha; isabelo seNkosi kuzo sasingamatshumi ayisikhombisa lambili.

39Obabhemi babezinkulungwane ezingamatshumi amathathu, lamakhulu amahlanu; isabelo seNkosi kubo sasingamatshumi ayisithupha lanye.

40Abantu babezinkulungwane ezilitshumi lesithupha; isabelo seNkosi kubo sasingamatshumi amathathu lambili.

41UMose wamnika uEleyazare umpristi isabelo seNkosi esasingumnikelo wayo, njengokutsho kwayo kuye.

42Ingxenye yabakoIsrayeli, uMose ayehlukanise leyamabutho ayephumile impi,

43leyongxenye, eyebandla, yayiyizimvu ezizinkulungwane ezingamakhulu amathathu lamatshumi amathathu lesikhombisa, lamakhulu amahlanu,

44lezinkomo ezizinkulungwane ezingamatshumi amathathu lesithupha,

45labobabhemi abazinkulungwane ezingamatshumi amathathu, lamakhulu amahlanu,

46labantu abazinkulungwane ezilitshumi lesithupha.

47Kuyo ingxenye yabakoIsrayeli uMose wathatha kwaba kunye ematshumini wonke amahlanu, awabantu lawezifuyo, wakunika amaLevi ayelondoloza iTabernakeli leNkosi, njengokutsho kweNkosi kuye.

48Izinduna ezaziphethe amabutho empi, izinduna zezinkulungwane lezinduna zamakhulu, zasezisondela kuMose,

49zathi kuye: Thina zinceku zakho sesibalile amabutho esiwaphathayo; kakulamuntu ongekho.

50Futhi silethile izinto zegolide, ilowo lalowomuntu azifumeneyo, zibe ngumnikelo weNkosi, izigqizo, lamasongo lezindandatho, lamacici, lamangqongqo, ukuba sizenzele indlela yokubuyisana phambi kweNkosi.

51UMose loEleyazare umpristi bamukela igolide lelo, zonke izinto eziligugu.

52Lonke igolide lalokho okwanikelwa eNkosini yizinduna zezinkulungwane lezinduna zamakhulu lalingamashekeli azinkulungwane ezilitshumi lesithupha, lamakhulu ayisikhombisa, lamatshumi amahlanu.

53Wonke amadoda ayethethe impango.

54UMose loEleyazare umpristi bamukela igolide ezinduneni zezinkulungwane lezinduneni zamakhulu, baliletha ethenteni lokuhlangana, laba yisikhumbuzo sabakoIsrayeli phambi kweNkosi.