2 Sam 15 - Ndebele Bible (iBhayibhili Elingcwele) 1978

UAbisalomu uvukela uDavida

1Emva kwalokhu uAbisalomu wazidingela inqola yokulwa, lamabhiza, labantu abangamatshumi amahlanu ukuba bamkhaphe.

2UAbisalomu wayevuka ekuseni eme eceleni kwendlela eya esangweni lomuzi; kuthi wonke umuntu olecala eliya enkosini ukuba lithethwe, uAbisalomu ambize athi kuye: Ungowawuphi umuzi na? Kuthi lapho yena esithi: Inceku yakho ingowesinye sezizwe zakoIsrayeli;

3uAbisalomu abesesithi kuye: Indaba yakho yinhle, ilungile, kodwa kakulamuntu obekwe yinkosi ukuba akuzwe.

4UAbisalomu abesesithi: Kungathi ngabe ngibekwe umahluleli elizweni! Ng’khona bonke abaletha amacala lezindaba kimi bengizabalungisela.

5Kuthi lapho kusondela umuntu ukuba akhuleke kuye, elule isandla sakhe, ambambe, amange.

6UAbisalomu wenze njalo kubo bonke abakoIsrayeli abeza enkosini ngamacala; ngakho uAbisalomu wazithumba inhliziyo zabantu bakoIsrayeli.

7Kwathi emva kweminyaka emine uAbisalomu wathi kuDavida: Ake ngiyegcwalisa isifungo sami engasifunga eNkosini uNkulunkulu eHebroni.

8Ngoba mina nceku yakho ngafunga ngisahlala eGeshuri elaseAramu ngathi: Uba iNkosi uNkulunkulu ingibuyisela isibili eJerusalema, ngizakuyikhonza eHebroni.

9Inkosi uDavida yathi kuye: Uhambe kuhle. UAbisalomu wasesuka esiya eHebroni.

10Wasethuma izithunywa ezizweni zonke zakoIsrayeli esithi: Lapho lisizwa ukukhala kophondo, lithi: UAbisalomu uyinkosi eHebroni!

11Kwahamba loAbisalomu abantu abangamakhulu amabili abamenyiweyo besuka eJerusalema, bahamba bengesabi lutho, bengazi lutho.

12UAbisalomu esanikela umhlatshelo wabiza uAhithofeli waseGilo, umeluleki kaDavida, emzini wakhe eGilo. Ukuhlamuka kwaqina, labantu banda njalo ngakuAbisalomu.

13Kwasekufika isithunywa kuDavida, sathi: Inhliziyo zabantu bakoIsrayeli sezibuyele ngakuAbisalomu.

14Wasesithi uDavida encekwini zakhe zonke ezazilaye eJerusalema: Asibalekeni masinyane, ngoba uba singenzi njalo, kakuyikuphepha lamunye wethu kuAbisalomu. Phangisani, hlezi asifice asehlisele okubi, awuchithe umuzi ngomkhonto.

15Inceku zenkosi zathi kuyo: Thina silungele ukwenza loba kuyini inkosi ekubona kufanele.

16Yasiphuma inkosi, bayilandela bonke abendlu yayo. Inkosi yatshiya abanye abafazi bayo abalitshumi ukuba balinde indlu yayo.

17Yahambake inkosi, bonke abantu bayilandela; bafika bema endlini yokucina.

18Zonke inceku zayo zema phansi kwayo; kwathi amaKerethi lamaPelethi ayengabalindi, loIthayi kanye labantu baseGiti abangamakhulu ayisithupha, badlula phambi kwenkosi.

19Inkosi yasisithi kuIthayi waseGiti: Uhambelani lathi na? Buyela uhlale lenkosi entsha, ngoba ungowezizweni lomxotshwa elizweni lakini.

20Ufike izolo nje; pho, lamuhla uzazulazula lami na? Kangazi lapho ngiya khona. Buyela ekhaya, uhambe labakini; iNkosi uNkulunkulu ikunike uthando olungapheliyo leqiniso.

21Kodwa uIthayi wayiphendula inkosi wathi: Ngifunga iNkosi uNkulunkulu, futhi ngifunga wena nkosi yami, kuleyondawo ezakuba kiyo inkosi yami, loba kusekufeni loba kusekuphileni, izakuba khona lapho lenceku yakho.

22UDavida wasesithi kuIthayi: Kulungile, dlulake, uhambe. Wasedlulake uIthayi waseGiti kanye labantu bakhe bonke labantwana ababelaye.

23Ilizwe lonke laduma ngokukhala kwabo. Inkosi yasala imi lapho abantu bechapha isifula iKidroni ngaphambi kwayo, ngendlela eya ngasenkangala.

24UZadoki laye wayekhona lawo wonke amaLevi; babethwele umtshokotsho wesivumelwano sikaNkulunkulu, bawubeka phansi eduze loAbiyatha baze baphuma bonke abantu emzini.

25Inkosi yasisithi kuZadoki: Buyisela umtshokotsho kaNkulunkulu emzini. Uba ngifumene umusa emehlweni eNkosi, izangibuyisa ngiwubone wona kanye lendlu yawo.

26Kodwa uba isithi: Kangithokozi ngawe; nanku ngikhona, kayenze kimi ekubona kufanele.

27Inkosi yaqhubeka yathi kuZadoki umpristi: Buyela emzini, wena loAbiyatha, uhambe lensizwa zombili, uAhimazi indodana yakho loJonathani indodana kaAbiyatha.

28Minake ngizalinda ngasemazibukweni asenkangala, kuze kufike ilizwi elivela kini lokungibikela.

29Ngakhoke uZadoki loAbiyatha bawubuyisela umtshokotsho kaNkulunkulu eJerusalema, bahlala khona.

30UDavida wasekhwela intaba ethiwa yiOliveti, ehamba ekhala, embomboze ikhanda lakhe, engafakanga amanyathelo; bonke abantu ababelaye bambomboza amakhanda abo, bahamba bekhala.

31Kwabikwa kuDavida kwathiwa: UAhithofeli uphakathi kwabahlamuke loAbisalomu. UDavida wakhuleka wathi: Nkosi, ake uphendule amacebo kaAhithofeli abe yibuthutha.

32Kwathi ukuba uDavida adundubale engqongeni yentaba lapho uNkulunkulu wayekhulekwa khona, wahlangabezwa nguHushayi waseArki umngane wakhe, ibhatshi lakhe lidatshuliwe, lekhanda lakhe ligcwele inhlabathi.

33UDavida wathi kuye: Uba uhamba lami, uzakuba ngumthwalo kimi.

34Kodwa uba ubuyela emzini uthi kuAbisalomu: Ngizakuba yinceku yakho, nkosi; kade ngiyinceku kayihlo, khathesi ngizakuba yinceku yakho; uzangichithela amacebo kaAhithofeli.

35Kuzakuba khona kanye lawe abapristi uZadoki loAbiyatha; ubatshele konke okuzwayo endlini yenkosi.

36Kukhona lapho lamadodana abo amabili, uAhimazi indodana kaZadoki, loJonathani indodana kaAbiyatha; uzangitshela ngabo konke ozakukuzwa.

37UHushayi umngane kaDavida wafika emzini, uAbisalomu engena eJerusalema.