1 Kho 1 - Ndebele Bible (iBhayibhili Elingcwele) 1978

Ukuzibeka kukaAdonija ukuba abe yinkosi

1Inkosi uDavida yayisiluphele kakhulu; loba beyembesa ngezingubo, kayikhudumalanga.

2Inceku zayo zasezisithi: Inkosi yethu kayidingelwe intombazana, ukuba iyilondoloze, iyonge, ilale esifubeni sayo ukuba ikhudumale.

3Zasezidinga intombazana enhle elizweni lonke lakoIsrayeli, zazuza uAbishagi waseShunami, zayiletha enkosini.

4Intombazana yayinhle kakhulu, yaba ngumongi wenkosi, yayilondoloza; kodwa inkosi kayingenanga layo engutsheni.

5UAdonija indodana kaHagithi wayezibula esithi: Mina ngizakuba yinkosi. Wasezilungiselela inqola zokulwa labagadi bamabhiza, lamadoda angamatshumi amahlanu ukugijima phambi kwakhe.2 Sam 3:4

6Uyise wayengazanga amdanise lakanye ngokubuza ukuthi: Ukwenzeleni lokhu na? Futhi uAdonija wayemuhle kakhulu, eselama uAbisalomu.

7Wacebisana loJowabi indodana kaZeruya loAbiyatha umpristi, bona bamlandela bamsiza.

8Kodwa uZadoki umpristi, loBenaya indodana kaJehoyada, loNathani umprofethi, loShimeyi loReyi, lamaqhawe kaDavida kabamlandelanga uAdonija.

9UAdonija wanikela imihlatshelo yezimvu lezinkabi lamathole anonisiweyo ngaselitsheni laseZohelethi eliseceleni kweEni‐Rogeli, wamema bonke abafowabo, amadodana enkosi, labo bonke abakoJuda abazinceku zenkosi;

10kodwa kabamemanga oNathani umprofethi loBenaya lamaqhawe loSolomoni umfowabo.

11UNathani wasesithi kuBathisheba unina kaSolomoni: Kawuzwanga yini ukuthi uAdonija indodana kaHagithi useyinkosi, loDavida inkosi yethu ingakwazi na?2 Sam 12:24

12Ngakhoke lalela ngikweluleke, ukuze uzisilise wena loSolomoni indodana yakho.

13Ngena masinyane enkosini uDavida uthi kuyo: Wena nkosi yami, kawufunganga yini kuncekukazi yakho ukuthi uSolomoni indodana yami uzabusa emva kwakho, abe yinkosi na? Phoke, kungani uAdonija eseyinkosi na?

14Kuzakuthi lapho usakhuluma lenkosi uDavida, ngingene lami ngikulandela, ngelekelele amazwi akho.

15UBathisheba wasesiya enkosini endlini yayo. Yayisiluphele kakhulu, uAbishagi waseShunami wayeyilondoloza.

16UBathisheba wasekhothama ekhuleka enkosini; inkosi yathi: Ufunani?

17Yena wathi kuyo: Nkosi yami, wafunga ngeNkosi uNkulunkulu wakho kuncekukazi yakho ukuthi uSolomoni indodana yami uzabusa emva kwakho, abe yinkosi.

18Kodwa nangu uAdonija useyinkosi, lanxa wena, nkosi yami, ungakwazi lokhu.

19Usenikele imihlatshelo yezinkabi lamathole anonisiweyo lezimvu ezinengi, wamema wonke amadodana enkosi loAbiyatha umpristi loJowabi induna yempi; kodwa uSolomoni inceku yakho kammemanga.

20Wenake, nkosi, bonke abakoIsrayeli bakhangele kuwe ukuba ubatshele ukuthi ngubani ozakuba yinkosi emva kwakho,

21funa kuthi lapho inkosi yami isibhubhile, mina lendodana yami uSolomoni sethweswe icala.

22Kwathi lapho esakhuluma lenkosi, kwafika uNathani umprofethi.

23Bayibikela inkosi bathi: Nangu uNathani umprofethi. Yena esefikile phambi kwenkosi wathi mbo ngobuso phansi.

24Wasesithi: Nkosi yami, utshilo yini ukuthi uAdonija uzabusa emva kwakho, abe yinkosi na?

25Ngoba wehlile lamhla, wanikela imihlatshelo yezinkabi lamathole anonisiweyo lezimvu ezinengi, wamema wonke amadodana enkosi, loJowabi induna yempi, loAbiyatha umpristi; bayadla benatha phambi kwakhe, bayamemeza besithi: Bayethe, nkosi Adonija!

26Kodwa mina nceku yakho loZadoki umpristi loBenaya indodana kaJehoyada lenceku yakho uSolomoni kasimemanga.

27Lokhu kwenziwe yinkosi yami, kayaze yatshela inceku zayo ukuba ngubani ozakuba yinkosi emva kwayo na?

28Inkosi uDavida yasiphendula isithi: Ngibizelani uBathisheba. Yena wasengena enkosini, wema phambi kwayo.

29Yasifunga isithi: Ngifunga iNkosi uNkulunkulu engophule kuzo zonke inhlupheko,

30njengoba ngafunga kuwe ngayo iNkosi, uNkulunkulu kaIsrayeli, ngisithi: USolomoni indodana yakho uzabusa emva kwami, abe yinkosi esikhundleni sami; ngiyaphinda futhi lamhla.

31UBathisheba wathi mbo ngobuso phansi, wakhuleka enkosini esithi: Bayethe, nkosi yami uDavida!

Ukubekwa kukaSolomoni abe yinkosi

32Inkosi uDavida yasisithi: Ngibizelani uZadoki umpristi, loNathani umprofethi, loBenaya indodana kaJehoyada. Basebesiza enkosini.

33Inkosi yathi kibo: Thathani inceku zami, ligadise uSolomoni indodana yami eyami imbongolo, limuse eGihoni;

34uZadoki umpristi loNathani umprofethi bamgcobe lapho abe yinkosi yakoIsrayeli; beselikhalisa impondo lisithi: Bayethe, nkosi Solomoni!

35Beselimlandela, yena uzangena ahlale esihlalweni sami sobukhosi, ngoba uzakuba yinkosi esikhundleni sami, ngimbekile ukuba abe ngumbusi wakoIsrayeli lakoJuda.

36UBenaya indodana kaJehoyada waseyiphendula inkosi esithi: Kakube njalo. Kungathi iNkosi, uNkulunkulu wenkosi yami, ingaqinisa okutshoyo!

37Njengoba iNkosi uNkulunkulu ibilawe, kungathi ingaba loSolomoni, iwenze umbuso wakhe ube mkhulu kulowenkosi yami uDavida.

38Ngakho uZadoki umpristi, loNathani umprofethi, loBenaya indodana kaJehoyada, lamaKerethi lamaPelethi ayengabalindi, basuka bamgadisa uSolomoni imbongolo yenkosi uDavida, bamusa eGihoni.

39UZadoki umpristi wathatha uphondo lwamafutha ethenteni, wamgcoba uSolomoni. Basebekhalisa uphondo, bonke abantu bamemeza besithi: Bayethe, nkosi Solomoni!

40Bonke abantu basebemlandela, bekhalisa imihlanga bethokoza kakhulu, waze waduma wonke umhlaba.

41UAdonija labo bonke ababelaye bawuzwa umsindo sebeqeda ukudla. Kwathi lapho uJowabi esizwa ukukhala kophondo wathi: Ngowani umsindo wokuxokozela phakathi komuzi na?

42Lapho esakhuluma, kwafika uJonathani indodana kaAbiyatha umpristi; uAdonija wathi kuye: Ngena, ngoba uyindodana ethembekileyo, ngiyabona usilethele indaba ezinhle.

43UJonathani wamphendula uAdonija wathi: Atshi bo, ngoba inkosi yethu uDavida isimbekile uSolomoni waba yinkosi;

44ithume uZadoki umpristi, loNathani umprofethi, loBenaya indodana kaJehoyada, lamaKerethi lamaPelethi ayengabalindi, bamgadisa imbongolo yenkosi;

45uZadoki umpristi loNathani umprofethi bamgcobile eGihoni waba yinkosi, basuka lapho bethokoza; yikho umuzi uxokozela. Yiwo lowomsindo owuzwileyo.

46USolomoni usehlezi esihlalweni sobukhosi.

47Futhi inceku zenkosi zifikile ukuyihalalela inkosi yethu uDavida, zisithi: UNkulunkulu wakho alenze ibizo likaSolomoni libe lodumo oludlula olwakho, lombuso wakhe ube mkhulu kulowakho. Inkosi uDavida yakhothama embhedeni wayo.

48Futhi ithe: Kayibongwe iNkosi, uNkulunkulu kaIsrayeli, ebeke indlalifa esihlalweni sami sobukhosi lamuhla ngisekhona.

49Bonke abamenyiweyo bakaAdonija bathuthumela, basuka, kwaba yilowo lalowo wahamba ngendlela yakhe.

50UAdonija wamesaba uSolomoni; ngokwesaba wasuka waya ealtareni, wabamba impondo zalo.

51Wabikelwa uSolomoni ukuthi: UAdonija uyayesaba inkosi uSolomoni; usebambe impondo zealtare uthi: Inkosi uSolomoni kayifunge kimi kuqala ukuba kayiyikuyibulala inceku yayo.

52USolomoni wathi: Uba eyindoda ethembekileyo, kayikulinyazwa lutho. Kodwa uba kukhona okubi kuye, uzakubhubha.

53Inkosi uSolomoni yasithumela ilizwi, bamehlisa ealtareni. Weza wakhuleka enkosini uSolomoni; uSolomoni wathi kuye: Hamba emzini wakho.