Zaga 24 - Ndebele Bible (iBhayibhili Elingcwele) 1978

1Ungabi lamhawu ngabantu ababi,

ungafisi ubungane babo;

2ngoba benza amacebo amabi kuphela,

bekhuluma ngokwenza okubi.

3Umuzi uyakhiwa ngokuhlakanipha,

uqiniswe ngokuqedisisa;

4langokwazi izindlu zawo ziyagcwaliswa ngezinto ezinengi ezinhle

ezibiza imali enengi.

5Ukuhlakanipha kukhulu kulobuqhawe,

lokwazi kukhulu kulamandla;

6ngoba ngezeluleko ezihlakaniphileyo umuntu angalwa impi,

lapho kukhona abeluleki abanengi, kukhona ukunqoba.

7Ukuhlakanipha kuphakeme kakhulu koyisithutha;

enkundleni kakhulumi lutho.

8Oceba ukwenza okubi uzakuthiwa ngumcebi omubi.

9Amacebo esithutha mabi,

umuntu oyisideleli uyisinengiso ebantwini,

10Uba uphela amandla ngosuku lokuhlupheka,

ubuthakathaka.

11Nxa ubona abantu besiwa ekubulaweni, bakhulule, ubasize.

12Uba usithi: Manje bengingakwazi lokho;

uNkulunkulu ohlola inhliziyo kayikukubona lokho na?

Yena okulondolozayo uyakwazi;

uzaphindisela bonke abantu ngokwemisebenzi yabo.

13Mntanami, dlana inyosi ngoba zilungile,

loluju lumnandi emlonyeni wakho.

14Lokuhlakanipha kulungile kuwe;

uba ukuthola, uzakuphila eminyakeni ezayo,

kungapheli masinyane ukuphila kwakho.

15Ungachathameli umuzi wolungileyo,

ungenzi okubi kuwo;

16lanxa olungileyo esiwa ngokuphindwe kasikhombisa, uyavuka futhi;

kodwa ababi bawiselwa phansi yikuhlupheka.

17Ungathokozi ngokuwa kwesitha sakho,

ungajabuli ngokukhubeka kwaso;

18funa iNkosi ikubone lokho, ikuthukuthelele wena,

iyekele ukusithukuthelela isitha sakho.

19Ungazikhathazi ngabenza okubi,

ungabi lamhawu ngababi;

20ngoba omubi kayikuphila eminyakeni ezayo;

ukukhanya kwababi kuzakucitshwa.

21Mntanami, yesaba iNkosi, wesabe lombusi,

ungahlangani lababavukelayo,

22ngoba bazakwehlelwa yikuchitheka masinyane;

ngubani okwazi ukuchitheka okuzavela eNkosini lakumbusi na?

Amanye amazwi abahlakaniphileyo

23Nanka amanye amazwi abahlakaniphileyo.

Ubandlululo ekwahluleleni kalulunganga.

24Umahluleli othi kolecala: Wena kawulacala;

uzaqalekiswa ngabantu bonke, azondwe yibo bonke;

25kodwa labo ababalahla abalecala bazaphumelela,

babusiswe ngokuhle.

26Impendulo eqotho iyisibonakaliso sobungane obuqotho.

27Qala ulungise ngaphandle,

futhi ulungise konke emasimini,

andubana wakhe umuzi wakho.

28Ungafakazi ngomakhelwana wakho kungelasizatho,

ungafakazi amanga ngaye.

29Ungathi: Ngizakwenza kuye njengokwenza kwakhe kimi;

ngizamphindisela.

30Ngadlula ensimini yevila,

lesivinini somuntu ongelangqondo;

31ngabona kugcwele ameva,

kukhona imbabazane endaweni zonke,

lomthangala waso wamatshe usudilikile.

32Ngakukhangela, nganakana ngakho;

ekunakaneni kwami ngafunda lesisifundo

33esokuthi: Uzalala ubuthongo obuncinyane, uwozele kancinyane,

usonge izandla ukuba uphumule okwesikhatshana,

34ubususehlelwa yibuyanga njengomphangi,

lokuswela njengesikliwi.