Eks 14 - Ndebele Bible (iBhayibhili Elingcwele) 1978

Ukuchithwa kwamaGibithe oLwandle oluBomvu

1INkosi yasikhuluma kuMose,

2yathi: Tshela abantu bakoIsrayeli ukuba baphambuke, bamise ngaphambi kwePihahirothi phakathi kweMigidoli lolwandle, ngaphambi kweBali‐Zefoni, limise maqondana layo ngasolwandle.

3UFaro uzakuthi ngabakoIsrayeli: Badidekile elizweni, bavalelwe yinkangala.

4Ngizayenza ibe lukhuni inhliziyo kaFaro, abalandele, ngizuze udumo ngoFaro langayo yonke impi yakhe, ukuba amaGibithe azi ukuthi ngiyiNkosi. Benza njalo.

5INkosi yaseGibithe yabikelwa ukuthi abantu sebebalekile; inhliziyo kaFaro lenhliziyo zezinceku zakhe zaphenduka mayelana labantu, bathi: Kuyini lokho esikwenzileyo, sabavumela abakoIsrayeli ukuba bahambe bangabe besasisebenzela na?

6UFaro wasebophela inqola yakhe, wahamba lempi yakhe.

7Wathatha inqola ezingamakhulu ayisithupha ezikhethiweyo lazo zonke inqola zaseGibithe lezinduna zazo zonke.

8INkosi yayenza yaba lukhuni inhliziyo kaFaro inkosi yaseGibithe, wabalandela ngoba baphuma bengesabi lutho.

9AmaGibithe abalandela, amabhiza wonke lezinqola zonke zikaFaro kanye labagadi bamabhiza lempi yakhe, abafica bemise ngasolwandle ngasePihahirothi ngaphambi kweBali‐Zefoni.

10Lapho uFaro esesondele, abakoIsrayeli baphakamisa amehlo abo, babona amaGibithe ebalandela, besaba kakhulu. Bakhala eNkosini;

11bathi kuMose: Kungoba kwakungekho mangcwaba eGibithe ukuthi usikhuphele ukuba sifele enkangala na? Usikhupheleni eGibithe na?

12Kasitshongo yini kuwe eGibithe ukuthi: Siyekele ukuba sisebenzele amaGibithe? Ngoba bekuzakuba ngcono kithi ukuba sisebenzele amaGibithe kulokuba sifele enkangala.

13UMose wathi ebantwini: Lingesabi; manini liqine, libone ukukhulula kweNkosi ezakulenzela khona lamuhla; ngoba amaGibithe eliwabonayo lamuhla, kalisayikuwabona futhi.

14INkosi izakulilwela, ngakho thulani lina.

15INkosi yasisithi kuMose: Wena ukhalelani kimi na? Tshela abakoIsrayeli ukuba baqhubekele phambili.

16Phakamisa intonga yakho, welulele isandla phezu kolwandle ukuba ulwahlukanise phakathi, ukuze abakoIsrayeli baluwele behamba emhlabathini owomileyo.

17Ngizazenza zibe lukhuni inhliziyo zamaGibithe ukuba abalandele. Ngizazuza udumo ngoFaro langempi yakhe langezinqola zakhe langabagadi bamabhiza.

18AmaGibithe azakwazi ukuthi ngiyiNkosi lapho sengizuze udumo ngoFaro langezinqola zakhe langabagadi bamabhiza.

19Isithunywa sikaNkulunkulu esasihamba phambi kwempi yakoIsrayeli sasuka sayahamba ngemva kwayo; lensika yeyezi yasuka phambi kwabo, yema ngemva kwabo,

20yaba phakathi kwempi yamaGibithe lempi yakoIsrayeli. Kwakukhona iyezi lomnyama; ebusuku bonke impi kayisondelelananga lempi.

21UMose waselulela isandla sakhe phezu kolwandle; iNkosi yabuyisela ulwandle emuva ubusuku bonke ngomoya olamandla wasempumalanga; amanzi ahlukana phakathi, lolwandle lwaba ngumhlabathi owomileyo.

22AbakoIsrayeli bawela ulwandle emhlabathini owomileyo; amanzi aba njengomduli ngakwesokunene sabo langakwesokhohlo sabo.1 Kor 10:1, 2; Heb 11:29

23AmaGibithe abalandela, angena olwandle exotshana labo, wonke amabhiza kaFaro lenqola zakhe labagadi bamabhiza.

24Ngomlindo wokusa, iNkosi yakhangela impi yamaGibithe isensikeni yomlilo leyeyezi, yayidunga impi yamaGibithe;

25yaqobotsha amavili ezinqola ukuba zihambe nzima, aze athi amaGibithe: Asibalekele abakoIsrayeli, ngoba iNkosi iyabalwela imelene lathi.

26INkosi yasisithi kuMose: Yelulela isandla sakho phezu kolwandle ukuba amanzi abuyele phezu kwamaGibithe lenqola zawo labagadi bamabhiza.

27UMose waseselulela isandla sakhe phezu kolwandle; ekuseni ulwandle lwabuyela endaweni yalo; amaGibithe alubalekela; iNkosi yawabhubhisela phakathi kolwandle amaGibithe.

28Amanzi abuyela, asibekela izinqola labagadi bamabhiza, layo yonke impi kaFaro eyayingene olwandle ukubalandela; kakusalanga loyedwa kubo.

29Kodwa abakoIsrayeli bawela ulwandle behamba phezu komhlabathi owomileyo; amanzi aba njengomduli ngakwesokunene sabo langakwesokhohlo sabo.

30Ngokunjaloke iNkosi yabophula abakoIsrayeli ngalolosuku ezandleni zamaGibithe; babona amaGibithe efile okhunjini lolwandle.

31Babona isenzo esikhulu eyasenzayo iNkosi kuwo amaGibithe. Abantu bayesaba iNkosi, bakholwa eNkosini, lasencekwini yayo uMose.