Zaga 29 - Ndebele Bible (iBhayibhili Elingcwele) 1978

1Umuntu okhuzwa kanengi kodwa abe lenkani,

uzakufohlozwa ngomzuzu nje, angabi lakusiliswa.

2Lapho kubusa abalungileyo, abantu bayathokoza,

kodwa lapho ababi bebusa, abantu bayabubula.

3Othanda ukuhlakanipha uthokozisa uyise,

kodwa ohamba lamawule uchitha impahla yakhe.

4Inkosi iqinisa ilizwe layo ngokulunga,

kodwa inkosi elithelisayo kakhulu iyalichitha.

5Umuntu olalisa ngolimi umakhelwana wakhe

uyazithiya yena ngembule.

6Omubi uthiywa yisono sakhe,

kodwa olungileyo uyahamba ethokoza.

7Olungileyo uyawazi amalungelo abayanga,

kodwa omubi kakuqedisisi lokhu.

8Izideleli zingadunga umuzi,

kodwa abahlakaniphileyo badedisa ulaka.

9Nxa umuntu ohlakaniphileyo emangalela isithutha,

sona siyamthuka, simhleke, kungabi lakuzwana.

10Abachitha igazi bazonda umuntu ongelacala,

kodwa abaqotho bananzelela ukuphila kwakhe.

11Isithutha sikhupha lonke ulaka lwaso,

kodwa ohlakaniphileyo uyalugodla, abekezele.

12Uba umbusi elalela amanga,

zonke izinceku zakhe zizakuba zimbi.

13Umyanga lomcindezeli bayafanana kulokhu

ukuthi iNkosi ibanika ukukhanya bobabili.

14Uba umbusi esahlulela abayanga ngeqiniso,

uzaqina abuse kokuphela.

15Ukusebenzisa uswazi lokukhuza kunika ukuhlakanipha,

kodwa umntwana oyekelwayo uthelela unina inhloni.

16Lapho kubusa ababi, ukona kuyanda,

kodwa abalungileyo bazabona ukuwa kwabo.

17Laya indodana yakho, izakukuthokozisa, ikuthabise.

18Lapho kungekho khona umbonisi, abantu bayadlubulunda;

kodwa babusisiwe abantu abagcina umlayo.

19Inceku kayilaywa ngamazwi nje,

ngoba lanxa iqedisisa, kayiyikulalela.

20Nxa ubona umuntu ephangisa ukukhuluma,

yazi ukuthi isithutha silethemba elikhulu kulaye.

21Ototoza inceku yakhe kusukela ebuntwaneni bayo

ekucineni izakumamuka konke alakho.

22Umuntu ololaka oluvuthayo ubanga ukuxabana,

lomuntu othukuthelayo kakhulu wandisa ukona.

23Ukuzigqaja komuntu kuzamehlisa,

kodwa umuntu othobekileyo uzakudunyiswa.

24Osiza isela uyazizonda yena;

uyazi ukuthi uzaqalekiswa, kodwa kavezi lutho.

25Ukwesaba abantu kuyingozi, kodwa othemba eNkosini uvikelekile.

26Abanengi bafuna ukuthandwa ngumbusi,

kodwa okufaneleyo kuvela eNkosini kuphela.

27Ongalunganga uyisinengiso kwabalungileyo,

loqotho uyisinengiso kwababi.