Isa 46 - Ndebele Bible (iBhayibhili Elingcwele) 1978

Izithombe zaseBabiloni kazilakusiza

1UBeli uyaguqa, uNebo uyakhothama;

izithombe zabo sezingumthwalo wezifuyo;

ziyaphakanyiswa, zithwaliswe izifuyo ezidiniweyo.

2Bayaguqa, bakhothame kanyekanye,

kabalakuzisiza, kodwa bona uqobo bayathunjwa.

3INkosi ithi: Ngilalela, wena ndlu kaJakobe,

bonke abaseleyo endlini kaIsrayeli,

ababengumthwalo wami kusukela ekuzalweni kwabo.

4Lize liguge nginguye;

yebo, lize libe yizimpunga ngizakulithwala;

sengikwenzile lokho, ngilithwele;

yebo, ngizakulithwala, ngilikhulule.

5Lizakungifanisa, lingilinganise lobani;

lizakungilinganisa lobani ukuze sifanane na?

6Lalabo abathulula igolide esikhwameni,

balinganise isiliva esilinganisweni,

basebeqatsha umkhandi ukuba abenzele unkulunkulu

basebeguqa kukho, bekukhonza.

7Bakuthwala ngamahlombe abo,

bakubeke endaweni yakho, kuhlale khona lapho,

kungasuki kiyo.

Uba umuntu ekhuleka kukho, kakuphenduli,

kungamsizi enkathazweni yakhe.

8Khumbulani lokhu liqaphele,

kukhumbulisiseni, lina abenza okubi,

9khumbulani izinto zakuqala zasendulo;

ngoba nginguNkulunkulu, kakho omunye;

yebo, nginguNkulunkulu, kakho ofana lami,

10ngibikezela ngaphambili okuzakwenzeka,

lasendulo izinto ezingakenziwa,

ngisithi: Icebo lami lizakuma njalo,

ngizaphelelisa konke engikufunayo;

11ngibize ilinqe empumalanga,

lomuntu wecebo lami elizweni elikhatshana;

sengikhulumile, ngizakukwenza;

sengikumisile, ngizakugcwalisa.

12Ngilalelani, lina abalenhliziyo ezilukhuni,

lina elikhatshana lokukhululwa;

13ngiyasondeza ukukhulula kwami, kakusekhatshana;

ukukhulula kwami kakuyikuphuza;

nginika ukukhulula kwami eZiyone lodumo lwami koIsrayeli.