1INkosi yathi: Wena, ndoda, thatha isitina, usibeke phambi kwakho, udwebe kiso umfanekiso womuzi, umuzi waseJerusalema;
2udwebe indawo zokuwuvimbezela, lomduli wokuwuvimbezela, ledundulu; udwebe lezihonqo futhi, lezigodo zokudiliza inxa zonke.
3Uthathe umganu wensimbi, uwumise phakathi kwakho lomuzi, ube ngumduli wensimbi; wena ukhangele ngakuwo umuzi, umuzi ube ngovinjezelweyo, wena ube ngumvimbezeli. Lokhu kuzakuba yisibonakaliso kwabakoIsrayeli.
4Ubusulala ngomhlubulo wakho wangasekhohlo, ngizabeka phezu kwakho isono sikaIsrayeli; uzathwala isono sabo insuku zonke zokulala kwakho ngalowomhlubulo.
5Usuku olulodwa luzamela umnyaka wokona kwabo, ngimisile ukuba ukuthwale insuku ezilikhulu lamatshumi aficamunwemunye. Ngokunjaloke uzathwala ukona kwakoIsrayeli.
6Lapho usuziphelelisile lezonsuku, uzalala phansi ngokwesibili, kodwa ngomhlubulo wangakwesokunene, uthwale ukona kwakoJuda insuku ezingamatshumi amane; usuku olulodwa ngilumisele umnyaka.
7Uzakhangela ngasekuvinjezelweni kweJerusalema, ingalo yakho yambuliwe, utshumayele ngawo umuzi.
8Khangela, ngizakukubopha ngamagoda ukuze ungaphendukeli emhlubulweni omunye lomunye kuze kuphelele insuku zokuvinjezelwa kwakho.
9Uthathe amabele lebhali lendumba lendlubu lonyawuthi lophoko, ukuhlanganise esitsheni sinye, wenze ngakho ukudla. Insuku olala ngazo ngomhlubulo wakho ezingamakhulu amathathu lezificamunwemunye uzakudla khona.
10Uzalinganisa ukudla kwakho, udle amashekeli angamatshumi amabili ngelanga, ukudle ngesikhathi ngesikhathi.
11Amanzi akho okunatha lawo uwalinganise, unathe ingxenye yesithupha yehini, uwanathe ngesikhathi ngesikhathi.
12Ukudla kwakho uzakukudla kwenziwe njengezinkwa zebhali, ukupheke ngamalongwe abantu, ukuphekele lapho abantu bangakubona khona.
13INkosi yathi: Ngokunjaloke abakoIsrayeli bazakudla ukudla okungcolileyo ezizweni engizakubaxotshela kizo.
14Ngasengisithi: O Nkosi Nkulunkulu! Kangizanga ngingcoliswe. Kusukela ebutsheni bami kuze kube lamuhla kangizanga ngidle ingcuba lokubulewe zinyamazana, lenyama engcolileyo kayizanga ingene emlonyeni wami.
15Yasisithi kimi: Khangela, ngikunika amalongwe enkomo endaweni yamalongwe abantu ukuba upheke ngawo ukudla kwakho.
16Yathi futhi kimi: Ndoda, ngizanciphisa ukudla kwabo kwensuku zonke eJerusalema; abantu bazalinganisa ukudla abakudlayo benqineka, balinganise lamanzi abawanathayo benqineka.
17Ukudla kwabo lamanzi abo kuzancipha, baze baphelelwe ngamandla lapho bebonana, baphele nya ngenxa yezono zabo.
Who We AreWhat We EelieveWhat We Do
2025 by iamachristian.org,Inc All rights reserved.
