Isa 51 - Ndebele Bible (iBhayibhili Elingcwele) 1978

INkosi iyaduduza iZiyone

1INkosi ithi: Ngilalelani, lina elilandela ukulunga,

lina elingidingayo;

khangelani kulo idwala elacezulwa kilo,

lakulo igodi elambiwa kulo.

2Khangelani kuAbrahama ukhokho wenu lakuSara owalizalayo;

ngoba uAbrahama eseyedwa ngambiza, ngambusisa, ngamandisa.

3Ngoba iNkosi izakuliduduza iZiyone,

iduduze wonke amanxiwa alo,

izakwenza inkangala yalo ifane leEdeni,

lomhlaba walo olugwadule ufane lensimu yeNkosi;

injabulo lentokozo kuzafunyanwa khona,

lokubonga lelizwi lokuhlabelela.

4Ngizwani, bantu bami,

lingilalele, lani sizwe sami;

ngoba kuzakuphuma kimi umlayo,

lokulunga kwami ukuba kukhanyisele izizwe.

5Ukukhulula kwami kuyasondela masinyane,

lokusiza kwami kuyeza,

ngizakubusa izizwe;

amazwe angasolwandle angilindele, athembe amandla ami.

6Khangelani phezulu, likhangele lasemhlabeni phansi;

ngoba iphezulu lizakunyamalala njengentuthu,

lomhlaba uguge njengengubo,

labakhileyo kuwo bafe njengemiyane;

kodwa ukukhulula kwami kuzakuma kuze kube nininini,

lokulunga kwami kakuyikuphela.

7Ngilalelani, lina elazi ukulunga,

abantu abalomlayo wami enhliziyweni zabo;

lingesabi ukusola kwabantu,

lingapheli amandla ngenxa yokuthuka kwabo.

8Ngoba inondo izakubadla njengengubo,

lempethu ibadle njengoboya bezimvu;

kodwa ukukhulula kwami kuzakuma kuze kube nininini,

lokusilisa kwami ezizukulwaneni zonke.

9Vuka, Nkosi,

vuka usebenzise amandla akho njengasezinsukwini zendulo.

Kawumqumanga kabili uRahabi,

wagwaza lumgobho na?

10Kakusuwe owomisa ulwandle lamanzi amanengi,

wenza inziki yolwandle yaba yindlela yokuwela abahlengiweyo na?

11Abahlengiweyo beNkosi bazakubuya,

bangeneeZiyone behlabela;

lokuthokoza okungapheliyo kube ngumqhele wamakhanda abo;

bazazuza ukuthokoza lokujabula,

usizi lokububula kuzakuphela.

12INkosi ithi: Minake nginguye oliduduzayo;

phoke, wena ungamesabelani umuntu ofayo,

lendodana yomuntu eyenziwa yafana lotshani na?

13Usuyikhohliwe yini iNkosi, uMenzi wakho,

eyendlala iphezulu, yamisa izisekelo zomhlaba,

ukuba uthuthumele usuku lonke

ngenxa yokuvutha kwentukuthelo yomcindezeli

ozimisele ukukuchitha na?

Kungaphi ukuthukuthela komcindezeli na?

14Abayizibotshwa bazakhululwa masinyane,

kabayikufa baye kwabaphansi,

kabayikuswela ukudla.

15Ngoba ngiyiNkosi uNkulunkulu wakho

ovusa ulwandle ukuze amavinqo alo ahlokome;

ngibizwa ngokuthi yiNkosi yamabandla.

16Ngifakile amazwi ami emlonyeni wakho,

ngakufihla emthunzini wesandla sami,

ngendlala iphezulu, ngamisa izisekelo zomhlaba,

ngatsho kulo iZiyone ukuthi: Lina lingabantu bami.

17Vuka, vuka, usukume, wena Jerusalema,

wena onathileyo esandleni seNkosi inkezo yolaka lwayo,

wayinatha wayiminya, weze wasala eyendezela.

18Kakho ongalikhokhela phakathi kwawo wonke amadodana azelwe yilo;

kakho ongalibamba ngesandla kuwo amadodana eliwakhulisileyo.

19Lokhu kokubili kukwehlele,

ngubani ozakukukhalela na?

ngitsho ukuchitheka lokubhujiswa, indlala, lempi;

ngubani ozakukududuza na?

20Amadodana akho aphelelwe ngamandla,

alele ezindleleni zonke njengenyamazana ebanjwe ngumjibila;

agcwele ulaka lweNkosi lokukhuza kukaNkulunkulu wakho.

21Ngakhoke ake uzwe lokhu, wena ohluphekayo lodakiweyo,

kodwa ungadakwanga liwayini.

22INkosi yakho, iNkosi uNkulunkulu wakho emela indaba yabantu bayo,

ithi: Ngisusile esandleni sakho inkezo edakisayo;

umganu wolaka lwami kawusayikuwunatha;

23ngizakuyinika abakuhluphayo, abathi kuwe;

Cambalala, ukuze sidlule phezu kwakho;

wasusenza umhlane wakho ube njengomhlabathi,

lanjengendlela yokuba bahambe ngayo.