Hubo 10 - Ndebele Bible (iBhayibhili Elingcwele) 1978

Ukucela ukuba ababi bachithwe

1Nkosi, umeleni khatshana na?

Ucatshelani ezikhathini zokuhlupheka kwethu na?

2Ekuzigqajeni kwabo ababi bayazingela abayanga;

kababanjwe ngamacebo abawaqambileyo.

3Ngoba omubi uyazikhukhumeza ngezifiso zenhliziyo yakhe,

loyisihwaba uyayithuka ayeyise iNkosi.

4Ekuzigqajeni kwakhe omubi uthi: Kangilandaba leNkosi;

yonke imicabango yakhe ithi: Kakho uNkulunkulu.

5Indlela zakhe ziyaphumelela izikhathi zonke;

izahlulelo zakho, Nkosi, ziphakeme kakhulu kulokubona kwakhe;

izitha zakhe zonke uyazidelela.

6Uthi enhliziyweni yakhe: Kangizukunyikinywa;

kangisoze ngehlelwa yingozi.

7Umlomo wakhe ugcwele ukuthuka lenkohliso lokuhlupha;

ngaphansi kolimi lwakhe kukhona ukona lokubi.

8Uyacathama phakathi kwemizi,

ekusithekeni ubulala abangelacala;

ulamehlo amabi kubo abangelamandla.

9Uyacatsha ekusithekeni njengesilwane sicatshe esikhundleni saso;

ucatshela ukumbamba ongumyanga,

uyabamba ongumyanga ngembule lakhe.

10Ongelamandla uyakhothanyiswa,

awiswe ngamandla akhe.

11Omubi uthi enhliziyweni yakhe: UNkulunkulu ulibele,

ufihle ubuso bakhe, kasoze abone.

12Vuka, Nkosi! Nkulunkulu, phakamisa isandla sakho,

ungabakhohlwa abahluphekayo.

13Kungani ukuba omubi adelele uNkulunkulu na?

Uthi enhliziyweni yakhe: Kawuyikuba landaba.

14Uyabona wena, yebo, uyabona ukukhathazeka lenhlupheko

ukuze ukubeke ezandleni zakho.

Ongelamandla uyazinikela kuwe;

wena ungumsizi wezintandane.

15Qeda amandla omubi longalunganga,

ubufunisise ububi bakhe ukuze bungabe busafunyanwa.

16INkosi yinkosi kuze kube nininini;

izizwe zizakubhubha emhlabeni wayo.

17Nkosi, uzakukuzwa ukukhala kwabamnene,

uzakuqinisa inhliziyo zabo,

indlebe yakho uyibeke kibo,

18ukuba wahlulele izintandane labacindezelweyo,

ukuze umuntu wasemhlabeni angabe esesabeka.