Seb 21 - Ndebele Bible (iBhayibhili Elingcwele) 1978

UPawuli useKesariya

1Kwathi sesahlukene labo, sasuka ngomkolo, sahamba ngendlela eqondileyo saya eKosi, kusasa saya eRodesi; sasuka lapho saya ePathara.

2Sesifumene lapho umkolo oya eFenekiya, sangena kuwo, sahamba.

3Kwathi sesiqhamuka eKuprosi, sayitshiyela ngakwesokhohlo, saqonda eSiriya, sehlikela eTire, ngoba umkolo wawuzakwethulela khona impahla zawo.

4Sesibadingile abafundi, sahlala khona insuku eziyisikhombisa; bona bamtshela uPawuli ngoMoya ukuba angayi eJerusalema.

5Kwathi seziphelile insuku zethu lapho, sasuka sahamba; bonke basiphelekezela kanye labomkabo labantwana, baze basifikisa ngaphandle komuzi. Saguqa ngasokhunjini, sakhuleka,

6savalelisana, sangena emkolweni, kodwa bona babuyela ekhaya.

7Sesiqedile ukuhamba ngomkolo sisuka eTire, safika ePetolemayi, sabingelela abazalwane, sahlala labo usuku lwaba lunye.

8Kusasa sasuka sahamba safika eKesariya, sangena endlini kaFiliphu umvangeli, owayengomunye wabayisikhombisa, sahlala laye.Seb 6:5; 8:5

9Yenake wayelamadodakazi amane ayengendanga, intombi ezaziselayo.

10Kwathi sesihlezi khona insuku ezithile, kwafika umprofethi othiwa nguAgabusi, evela eJudiya;Seb 11:28

11yena efika kithi, wathatha uzwezwe lukaPawuli, wazibopha inyawo lezandla esithi: Utsho njalo uMoya oNgcwele, uthi: Umuntu olungolwakhe loluzwezwe abaJuda baseJerusalema bazakumbopha kanje bamnikele ezandleni zabezizwe.

12Sesikuzwile lokhu samncenga thina kanye labantu ababelapho ukuba angayi eJerusalema.

13UPawuli wasephendula esithi: Lenzani likhala lidabula inhliziyo yami na? Ngoba sengilungele, kungesikho ukubotshwa kuphela, kodwa lokufa eJerusalema ngenxa yebizo leNkosi uJesu.

14Sesahlulekile ukumvumisa ukuba angayi, sathula sathi: Ayenziwe intando yeNkosi.

UPawuli useJerusalema

15Emva kwalezinsuku sabopha impahla zethu, sakhuphukela eJerusalema.

16Abathile kubafundi baseKesariya bahamba lathi, basisa endlini kaMnasoni waseKuprosi, umfundi omdala, ebesizangenisa kuye.

17Sesifikile eJerusalema, abazalwane basamukela ngokuthokoza.

18Kusasa uPawuli waya lathi kuJakobe; labadala bonke babekhona.

19Esebabingelele, wabalandisela ngakunye ngazo zonke izinto uNkulunkulu abezenzile phakathi kwabezizwe ngomsebenzi wakhe.

20Sebekuzwile lokhu bamdumisa uNkulunkulu, bathi kuye: Uyabona, mzalwane, ukuthi zinengi kangakanani izigidi zabakholwayo phakathi kwabaJuda, futhi bonke batshisekela umlayo;

21sebetsheliwe ngawe ukuba ufundisa bonke abaJuda abaphakathi kwabezizwe ukuba badele uMose, ubatshela ukuba bangasoki abantwana babo lokuba bangahambi ngamasiko.

22Phoke, sizakwenza njani na? Bazakuzwa impela ukuthi usufikile.

23Ngakhoke yenza lokhu esikutsho kuwe. Kukhona amadoda amane lapha kithi azibophe ngesifungo;Nani 6:13–21

24athathe lawomadoda, uzihlambulule kanye lawo, uhlawule indleko zawo, ukuze aphuce amakhanda awo; kung’khona bazakwazi bonke ukuthi kakukho ulutho kulokho abakutshelwe ngawe, kodwa ukuthi lawe uhamba ngokulondoloza umlayo.

25Kodwa mayelana labezizwe abakholwayo sesilobile saquma ukuthi kabazile okuhlatshelwe izithombe, legazi, lokukhanyiweyo, lokufeba.Seb 15:29

26UPawuli wasewathatha lawomadoda, kusasa wazihlambulula kanye lawo, waya ethempelini ukubika ukuphela kwensuku zokuhlanjululwa, ukuze kulethwe umnikelo wabo bonke.

AbaJuda bavusa umsindo; uPawuli uyabotshwa

27Kwathi sezizakuphela lezinsuku eziyisikhombisa, abaJuda abavela eAsiya ababembonile uPawuli ethempelini, bavusa lonke ixuku, bambamba,

28bamemeza bathi: Madoda akoIsrayeli, sizani! Nguye lumuntu ofundisa bonke endaweni zonke okuphambene lesizwe sakoIsrayeli, lomlayo, lalindawo; futhi ungenisile amaGriki ethempelini, wayingcolisa lindawo engcwele.

29Ngoba babebonile ngaphambili uTrofimu waseEfesu elaye emzini, bakhumbula ukuthi uPawuli umngenisile ethempelini.Seb 20:4

30Umuzi wonke wanyakazela, abantu bagijimela ndawonye, bamdumela uPawuli, bamhudulela ngaphandle kwethempeli; iminyango yavalwa masinyane.

31Kuthe besafuna ukumbulala, ilizwi lafika enduneni enkulu yesigaba ukuba lonke iJerusalema liyaphithizela;

32yahle yathatha amabutho lezinduna zekhulu, yagijimela kubo; sebebona induna enkulu lamabutho bayekela ukumtshaya uPawuli.

33Kwathi induna enkulu yasondela, yambopha uPawuli, yalaya ukuba abotshwe ngamaketane amabili, yabuza ukuba ungubani lokuba wenzeni.

34Kodwa abanye exukwini bamemeza okunye, labanye okunye; yathi ukuba ingelakulazi iqiniso ngenxa yomsindo, yalaya ukuba asiwe endlini yamabutho.

35Esefikile esikhwelweni, wathwalwa ngamabutho ngenxa yokufutheka kwexuku;

36ngoba ixuku labantu lalandela limemeza lisithi: Kabulawe!

37UPawuli esezakungeniswa endlini yamabutho wathi enduneni enkulu: Ngingake ngikhulume lawe na? Yona yathi: Uyasazi isiGriki na?

38Kanti kawusuye yini lowomGibithe osand’ukuvukela umbuso, waholela enkangala amadoda azinkulungwane ezine angababulali na?

39UPawuli waphendula wathi: Mina ngingumJuda waseTarsusi elaseKilikhiya, ngingumuntu womuzi odumileyo; ngiyakuncenga ake ungivumele ngikhulume ebantwini.

40Esemvumele, uPawuli wema esikhwelweni, waqhweba abantu ngesandla; sekuthe cwaka, wakhuluma labo ngolimi lwamaHeberu, wathi: