Jobe 28 - Ndebele Bible (iBhayibhili Elingcwele) 1978

Mayelana lokuhlakanipha

1Impela kukhona umgodi wesiliva,

lendawo lapho abantu bancibilikisa igolide khona.

2Insimbi ikhutshwa emhlabathini,

lethusi lincibilikiswa emanyeleni.

3Abantu bawukhanyisa umnyama lapho betshona phansi

ukudinga amanyele endaweni ezilomnyama omkhulu.

4Bayatshonisa imigodi ezindaweni ezikhatshana labantu,

indawo lapho kungahambi khona abantu,

basebenza khona belesizungu,

belenga ngamagoda emigodini.

5Umhlaba wona lapho kuvela khona ukudla,

ngaphansi kwawo kuyavutha umlilo.

6Phansi le amadwala alamatshe amahle,

agcwele igolide.

7Phansi le kukhona indlela engaziwayo lukhozi,

engabonwa yilinqe,

8engahanjwa yizilo ezinkulu,

engazanga ihanjwe yizilwane.

9Bayelula izandla zabo emadwaleni ayinsengentshe,

baphande izisekelo zentaba;

10bambe imisele emadwaleni,

lamehlo abo abone konke okuligugu.

11Bayavala izifula ukuze zingagelezi,

lokufihlakeleyo bayakukhuphela ekukhanyeni.

12Kodwake ukuhlakanipha kungafunyanwa ngaphi?

Lomthombo wokuqedisisa ungaphi na?

13Umuntu kayazi indlela yokuya kukho,

kakufunyaniswa elizweni labaphilayo.

14Ingaphansi komhlaba ithi: Kakukho kimi.

Lolwandle luthi: Kakukho kimi.

15Kungethengwe ngegolide,

lentengo yakho kayiyikulinganiswa yisiliva.

16Kungelingane legolide laseOfiri,

lamatshe amahle athiwa ionikse lesafire.

17Igolide lengilazi kungelingane lakho,

futhi kungenaniswe ngezinto ezinhle zegolide elihle.

18Angephathwe amatshe athiwa yikorali lekrisitali,

Intengo yokuhlakanipha ingaphezu kwamatshe aligugu.

19Ilitshe elihle laseEtiyopiya elithiwa itopazi lingelinganiswe lakho,

kungelingane legolide elihle.

20Phoke, ukuhlakanipha kuvelaphi na?

Ingaphi indawo yokuqedisisa na?

21Kusithekile emehlweni abo bonke abaphilayo,

kwafihlwa ezinyonini zaphezulu.

22UkuBhujiswa lokuFa kuthi:

Sizwile ngendlebe zethu amahungahunga ngakho.

23Kodwa uNkulunkulu uyayiqedisisa indlela yakho,

uyayazi indawo yakho.

24Ngoba uyakhangela imikhawulo yomhlaba,

abone konke okungaphansi komthunzi welanga.

25Lapho emisela umoya amandla awo,

elinganisa amanzi ngesilinganiso,

26lapho esenzela izulu isimiso,

lombane wokuduma indlela,

27wakubona, walandisa ngakho,

wakumisa, wakuhlola.

28Wathi emuntwini: Khangela,

ukuyesaba iNkosi yikho okuyikuhlakanipha,

lokusuka ebubini kuyikuqedisisa.