2 Kor 4 - Ndebele Bible (iBhayibhili Elingcwele) 1978

UPawuli utshumayela ivangeli ngesibindi

1Ngakhoke, lokhu siyinikiwe linkonzo ngobubele bukaNkulunkulu, kasidinwa.

2Sizilahlile izindlela zonke ezifihliweyo leziletha ihlazo; kasihambi ngobuqili, kasiliphambanisi ilizwi likaNkulunkulu, kodwa ngokukhuluma obala iqiniso senza abantu bonke basibuke ngezazela zabo phambi kukaNkulunkulu.

3Uba ivangeli lethu limbonjoziwe, limbonjoziwe kuphela kulabo ababhubhayo.

4Unkulunkulu walesisikhathi uphumputhekisile ingqondo yabangakholwayo, ukuze bangakuboni ukukhanya kwevangeli lenkazimulo kaKristu ongumfanekiso kaNkulunkulu.

5Ngoba kasizitshumayeli thina, kodwa sitshumayela ukuthi uKristu Jesu uyiNkosi, lokuthi thina siyizinceku zenu ngenxa yakhe.

6Ngoba uNkulunkulu owathi: Kakuvele ukukhanya emnyameni, kukhanye; wenzile ukuba lokhukukhanya kukhanye phakathi kwethu, kusinike ukukhanya kokwambulwa, ukwambulwa kwenkazimulo kaNkulunkulu kuJesu Kristu.Amandla avela kuNkulunkulu ayaqinisa ezinhluphekweni

7Kodwa silayo linotho ezitsheni zebumba, ukuze ubukhulu bamandla amakhulu bube ngobukaNkulunkulu, bungabi ngobethu.

8Siyabandezelwa inxa zonke, kodwa kasihlifizeki; siyadideka, kodwa kasilahli ithemba;

9siyazingelwa, kodwa kasihlanyukwa; siwiselwa phansi, kodwa kasibhujiswa;

10sithwele njalonjalo emzimbeni wethu ukufa kukaJesu, ukuze ukuphila kukaJesu kubonakaliswe emizimbeni yethu.

11Ngoba nxa sisaphila sinikelwa njalonjalo ekufeni ngenxa kaJesu, ukuze ukuphila kukaJesu kubonakaliswe emizimbeni yethu efayo.

12Ngakho ukufa kuyasebenza kithi, kodwa kini kusebenza ukuphila.

13Umbhalo uthi: Ngakholwa, ngakhoke ngakhuluma. Lathi ngalokhokukholwa siyakholwa, ngakho siyakhuluma,Hubo 116:10

14ngoba siyazi ukuthi lowo owayivusayo iNkosi uJesu uzakusivusa lathi kanye loJesu. Sonke sizakuma phambi kwakhe.

15Konke kwenziwa ngenxa yenu, ukuthi njengoba umusa ukhula wande ebantwini, kuzakwanda ukubonga, adunyiswe uNkulunkulu.

Ukulangathela ikhaya lasezulwini

16Ngakhoke kasidinwa. Loba umuntu wethu wangaphandle ebhubha, umuntu wethu wangaphakathi wenziwa abe mutsha insuku zonke.

17Inhlupheko yethu elula engeyomzuzwana iyasivezela ubukhosi obungapheliyo, obungelakulinganiswa;

18ngoba kasikhangeli okubonwayo kodwa sikhangela okungabonwayo. Ngoba okubonwayo kungokwesikhatshana nje, kodwa okungabonwayo kakulakuphela.