2 Sam 16 - Ndebele Bible (iBhayibhili Elingcwele) 1978

1Kwathi uDavida esedlule kancinyane engqongeni yentaba, wahlangabezwa nguZiba inceku kaMefiboshethi eqhuba obabhemi ababili ababotshelweyo, bethwele izinkwa ezingamakhulu amabili, lamahlukuzo alikhulu ezithelo ezomisiweyo zevini, lamahlukuzo alikhulu omkhiwa, lomgodla wewayini.2 Sam 9:9–10

2UDavida wathi kuZiba: Uzakwenzani ngalezizinto na? UZiba waphendula wathi: Obabhemi ngabokugadwa ngabendlu yenkosi, izinkwa lomkhiwa ngokokudliwa yizinsizwa, lewayini ngelokunathwa ngabaphelelwa ngamandla enkangala.

3Inkosi yasisithi: Ungaphi umzukulu wenkosi yakho na? UZiba wathi enkosini: Usele eJerusalema, ngoba uthe: Lamuhla uIsrayeli uzabuyisela kimi umbuso kababamkhulu.

4Inkosi yasisithi kuZiba: Khangela, konke obekungokukaMefiboshethi sekungokwakho. UZiba wasesithi: Ngiyakhuleka; kangifumane umusa kuwe kokuphela, nkosi yami.

5Kwathi lapho inkosi uDavida efika eBahurimi, kwaphuma khona umuntu wosendo lwendlu kaSawuli, ibizo lakhe linguShimeyi indodana kaGera; weza ehamba ethuka.

6Wajikijela uDavida ngamatshe kanye lenceku zakhe zonke, labo bonke abantu lamaqhawe wonke ayengasesandleni sakhe sokunene langasekhohlo.

7Yilokhu akutshoyo uShimeyi lapho ethuka, wathi: Hamba, hamba, wena muntu wegazi, muntu omubi!

8INkosi uNkulunkulu yehlisele phezu kwakho lonke igazi lendlu kaSawuli obukade ubusa esikhundleni sakhe; inikele umbuso kuAbisalomu indodana yakho. Khangela, ububi bakho sebukuficile, ngoba wena ungumuntu wegazi.

9UAbishayi indodana kaZeruya wasesithi enkosini: Linja efileyo iyithukelani inkosi yami na? Ngivumela ngiyeyiquma ikhanda.

10Kodwa inkosi yathi: Kulihlupha ngani lokhu, lina madodana kaZeruya na? Uba engithuka ngoba iNkosi uNkulunkulu ithe kuye: Thuka uDavida; ngubani ongathi: Ukwenzeleni lokho na?

11UDavida wasesithi kuAbishayi lakuzo zonke inceku zakhe: Eyami indodana uqobo ifuna ukungibulala; phoke, kuzakuba njani ngalo owakoBenjamini na? Myekeleni athuke, ngoba iNkosi uNkulunkulu imlayile ukuba akwenze lokhu.

12Mhlawumbe izabona usizi lwami, ingilethele okuhle ngalokhu ukuthukwa kwalamuhla.

13UDavida labantu bakhe bahamba ngendlela; uShimeyi wahamba eceleni kwentaba maqondana laye, wahamba ethuka, emjikijela ngamatshe, emthela ngothuli.

14Inkosi labo bonke abantu ababelayo bafika eJordani sebekhathele; baphumula khona.

15UAbisalomu labantu bonke bakoIsrayeli bafika eJerusalema, loAhithofeli wayelaye.

16Kwathi lapho uHushayi waseArki, umngane kaDavida, efika kuAbisalomu, wathi kuAbisalomu: Bayethe nkosi! Bayethe nkosi!

17UAbisalomu wathi kuHushayi: Yikho ukuthembeka kwakho lokhu kumngane wakho na? Kungani ungahambanga lomngane wakho na?

18UHushayi wasesithi kuAbisalomu: Atshi bo, kungoba ngizakuba ngowalowo okhethwe yiNkosi uNkulunkulu layilababantu layibo bonke abantu bakoIsrayeli, ngihlale laye.

19Futhi ngizakhonza bani na? Kangiyikukhonza indodana yakhe na? Njengoba ngakhonza uyihlo, lawe ngizakukukhonza ngokunjalo.

20UAbisalomu wasesithi kuAhithofeli: Ake useluleke, sizakwenza njani na?

21Wathike uAhithofeli kuAbisalomu: Ngena abanye abafazi bakayihlo abatshiywe ukuba balinde indlu; wonke uIsrayeli uzakuzwa ukuba usuyisinengiso kuyihlo, baqine bonke abakulandelayo.

22Basebemmisela ithente uAbisalomu phezu kophahla lwendlu; wangena abanye abafazi bakayise phambi kwabo bonke abakoIsrayeli.2 Sam 12:11–12

23Kulezonsuku iseluleko sikaAhithofeli sasinjengokungathi umuntu ubuza kuNkulunkulu; sasinjalo iseluleko sikaAhithofeli kuDavida lakuAbisalomu.