Josh 7 - Ndebele Bible (iBhayibhili Elingcwele) 1978

Icala likaAkani

1Kodwa abakoIsrayeli bawephula umthetho omayelana lezinto ezinikwe iNkosi ukuba zibhujiswe. Ngoba uAkani indodana kaKarmi kaZabidi kaZera owesizwe sakoJuda wathatha ezinye zazo; iNkosi yabathukuthelela abakoIsrayeli.

2UJoshuwa eseJeriko wathumela abantu eAyi eliseduze leBeti‐Aveni ngasempumalanga kweBetheli, wathi kibo: Hambani liyehlola ilizwe. Basebehamba bayahlola eAyi.

3Babuyela kuJoshuwa bathi kuye: Kakungaphumi bonke abantu, kodwa kakuphume nje izinkulungwane ezimbili loba ezintathu ukuhlasela iAyi. Ungakhathazi yonke impi ngokuya khona, ngoba abantu bakhona bayingcosana nje.

4Kwasekuphuma abantu abaphosa babe zinkulungwane ezintathu; babaleka phambi kwabantu baseAyi,

5labantu baseAyi babulala abangamatshumi amathathu lesithupha, baxotshana labo kusukela esangweni baze bafika emigodini, bababulalela ekwehleni. Abantu baphelelwa yisibindi, besaba.

6UJoshuwa labadala bakoIsrayeli basebedabula izigqoko zabo, bathi mbo ngobuso phansi phambi komtshokotsho weNkosi kwaze kwahlwa, bathela uthuli emakhanda abo.

7UJoshuwa wasesithi: Maye Nkosi Nkulunkulu! Ubachaphiseleni lababantu iJordani ukuba usinikele ezandleni zamaAmori ukusibhubhisa na? Kungathi ngabe saneliswa yikuhlala ngaphetsheya kweJordani!

8Nkosi, kambe ngingathini lapho uIsrayeli esebalekela izitha zakhe na?

9Ngoba amaKanani labo bonke abakhileyo elizweni bazakukuzwa, basihanqe, baliqede ibizo lethu emhlabeni. Phoke, wena uzakwenza njani ngebizo lakho elikhulu na?

10INkosi yasisithi kuJoshuwa: Vuka, uweleni ngobuso bakho na?

11UIsrayeli wonile; baseqile isivumelwano sami engabalaya sona, bathethe okunye kwezinto ezinikelwe eNkosini, bebile, baqamba amanga, bakubekile empahleni zabo.

12Ngalokhoke abakoIsrayeli kabalakuma phambi kwezitha zabo, bayazibalekela ngoba sebeyinto yokubhujiswa. Kangisayikuba lani futhi uba lingabhubhisi izinto ezinikelwe eNkosini phakathi kwenu.

13Suka, ubuthanise abantu, uthi kibo: Zihlambululeni ngenxa yosuku lwakusasa libe ngcwele; ngoba iNkosi, uNkulunkulu kaIsrayeli, ithi: Kukhona izinto ezinikelwe eNkosini eziphakathi kwenu, lina Israyeli; lingeke lime phambi kwezitha zenu lingakakhuphi phakathi kwenu izinto ezinikelweyo.

14Ngakhoke ekuseni lizasondela ngezizwe zenu, kuthi isizwe esizadliwa yinkatho yeNkosi sisondele ngensendo zaso, kuthi usendo oludliwa yinkatho yeNkosi lusondele ngezindlu zalo, kuthi indlu ezadliwa yinkatho yeNkosi isondele umuntu ngamunye ngamunye,

15kuthi lowo ozafunyaniswa elezinto ezinikelwe eNkosini atshiswe ngomlilo, lakho konke alakho, ngoba usaphule isivumelwano seNkosi, wenza into elihlazo koIsrayeli.

16UJoshuwa wasevuka ekuseni kakhulu, wasondeza uIsrayeli ngesizwe ngesizwe, inkatho yadla isizwe sakoJuda;

17wasesondeza insendo zakoJuda, kwadliwa usendo lwakoZera; wasesondeza izindlu zakoZera indlu nganye, kwadliwa indlu yakoZabidi;

18wasesondeza indlu yakhe ngamunye ngamunye, kwadliwa uAkani indodana kaKarmi kaZabidi kaZera, owesizwe sakoJuda.

19UJoshuwa wasesithi kuAkani: Ndodana yami, inike iNkosi, uNkulunkulu wakoIsrayeli, udumo, uvume isono sakho kuyo; ungitshele lokho okwenzileyo, ungangifihleli.

20UAkani wasemphendula esithi: Impela ngonile eNkosini, uNkulunkulu wakoIsrayeli, yilokhu engikwenzileyo;

21kwathi ngibona phakathi kwempango ingubo yaseBabiloni enhle, lamashekeli esiliva angamakhulu amabili, lomgqala wegolide ubunzima bawo bungamashekeli angamatshumi amahlanu, ngakuhawukela, ngakuthatha; ngikuthukuzile phansi ethenteni lami, lesiliva singaphansi.

22UJoshuwa wasethuma izithunywa, zaya ethenteni, zakufumanisa kufihliwe ethenteni, isiliva singaphansi.

23Bakukhupha ethenteni, bakuletha kuJoshuwa lebantwini bonke bakoIsrayeli, bakubeka phansi phambi kweNkosi.

24Kwathi uJoshuwa loIsrayeli wonke ayelaye sebemthethe uAkani indodana kaZera kanye lesiliva, lengubo, lomgqala wegolide, lamadodana lamadodakazi akhe, lenkabi zakhe, labobabhemi bakhe, lezimvu zakhe, lethente lakhe, kanye lakho konke ayelakho, bakusa esihotsheni saseAkori.

25UJoshuwa wathi kuye: Usihlupheleni na? INkosi kayikulethele inhlupheko lamuhla. Bonke abakoIsrayeli bamkhanda ngamatshe waze wafa; babakhanda ngamatshe abendlu yakhe, babatshisa ngomlilo.

26Babuthelela phezu kwakhe inqwaba enkulu yamatshe; isekhona lalamhla. Kwasekuphela ukuvutha kolaka lweNkosi. Ngakho leyondawo isabizwa ngokuthi yisihotsha saseAkori, okutsho inhlupheko.