Jer 47 - Ndebele Bible (iBhayibhili Elingcwele) 1978

Ilizwi ngamaFilistiya

1Ilizwi leNkosi elafika kuJeremiya umprofethi ngamaFilistiya, uFaro engakanqobi iGaza, lathi:

2INkosi ithi: Khangela, amanzi ayaphuma enyakatho,

azakuba ngumfula okhukhulayo,

akhukhule ilizwe lakho konke okukulo,

lemizi kanye labahlala kiyo.

Abantu bazakhala, bonke abakhileyo elizweni balile.

3Ngomsindo wokugidiza kwamasondo amabhiza akhe,

langomdumo wenqola zakhe zempi, langomdumo wamasondo azo,

oyise kabanyemukuli abantwana babo ngenxa yobuthakathaka babo,

4ngenxa yosuku oluzayo lokuchithwa kwawo wonke amaFilistiya,

lokuqeda eTire leSidoni bonke abasizi abaseleyo.

Ngoba iNkosi iyawachitha amaFilistiya, labaseleyo esihlengeni saseKafitori.

5IGaza ligelile ikhanda lalo, leAshikeloni liphelile.

Lina baseleyo bamaAnaki lizazisika kuze kube nininini na?

6Hawu, mkhonto weNkosi! koze kube nini ungakhawuli na?

Buyela emgodleni wakho, uhlale uphumule.

7Kodwa ungaphumula kanjani lapho iNkosi iwulayile na?

Iwumisele iAshikeloni lezinkumbi zolwandle.