Zaga 19 - Ndebele Bible (iBhayibhili Elingcwele) 1978

1Kungcono ukuba ngumyanga ohamba ngobuqotho

kulokuba yisinothi esiqamba amanga.

2Ukutshiseka okungelakwazi kakulunganga;

owalazelayo uzakuduha.

3Ubuthutha bomuntu buyamchitha,

abeseyithukuthelela iNkosi.

4Inotho iletha abangane abanengi,

kodwa ongumyanga utshiywa ngumngane wakhe.

5Ufakazi wamanga kayikuyekelwa,

ofakaza ngamanga kayikuphunyuka.

6Banengi abafuna ukuthandwa yizikhulu;

bonke bafisa ubungane bomuntu ophanayo.

7Bonke abazalwane bomyanga bayamzonda;

ngakho labangane bakhe bayamtshiya.

Uzama ukukhuluma labo, kodwa kabamnanzi.

8Ozuza ukuhlakanipha uthanda ukusila kwakhe;

onanzelela ukuqedisisa uzakuphumelela.

9Ufakazi wamanga kayikuyekelwa,

ofakaza ngamanga uzabhubha.

10Kakufanele ukuba isithutha sihlale sinothile;

ngokunjalo kakufanele ukuba isigqili sibuse izikhulu.

11Olokuhlakanipha uzakuphuza ukuthukuthela;

oyekela isiphambeko uzakuba lodumo.

12Ulaka lwenkosi lunjengokubhonga kwesilwane,

kodwa umusa wayo unjengamazolo otshanini.

13Indodana eyisithutha iyamchitha uyise;

ukuxabana komfazi kunjengamanzi athonta njalo.

14Umuzi lenotho iyilifa elivela kubokhokho bomuntu,

kodwa umfazi ohlakaniphileyo uvela eNkosini.

15Ubuvila buyehlisela umuntu ubuthongo obukhulu,

olivila uzakulamba.

16Ogcina imilayo uzakuphila,

kodwa odelela indlela zeNkosi uzakufa.

17Olomusa kumyanga weboleka iNkosi,

yona izamvuza ngesenzo sakhe.

18Laya umntanakho esengumntwana,

kodwa ungazimiseli ukumbulala.

19Umuntu ololaka oluvuthayo uzatshaywa ngenxa yalo;

uba wena umsiza, ng’khona umbangayo.

20Lalela izeluleko, uvume ukufundiswa,

ukuba uhlakaniphe ngesikhathi esizayo.

21Umuntu angaba lamacebo amanengi,

kodwa yintando yeNkosi ezakuma.

22Ubuhwaba bulihlazo emuntwini;

kungcono ukuba ngumyanga kulokuqamba amanga.

23Ukuyesaba iNkosi kuyikuphila,

olakho uzahlala ethokoza, evikelekile enhluphekweni.

24Ivila lithatha ukudla emganwini,

kodwa lehluleke ukukufaka emlonyeni walo.

25Tshaya isideleli ukuba ongelalwazi abe lengqondo ehlakaniphileyo;

laya oqedisisayo, afunde kuhle.

26Ophatha kubi uyise, axotshe lonina,

uyindodana ethelela inhloni lehlazo.

27Uba uyekela ukufunda, mntanami,

uzaswela amazwi okwazi.

28Ufakazi omubi udelela ukulunga;

abantu ababi baminza okubi.

29Ukutshaywa kulungiselwe izideleli,

ukutshaywa imivimvinya kulungiselwe izithutha.