Nani 13 - Ndebele Bible (iBhayibhili Elingcwele) 1978

Abahloli abalitshumi lambili bathunyelwa ukuhlola eKanani

1INkosi yathi kuMose:

2Thuma abantu ukuba bahlole ilizwe laseKanani engibapha lona abakoIsrayeli; uthume umuntu waleso lalesosizwe saboyise, umuntu oyinduna.

3UMose wabathumake besuka enkangala yaseParani, njengokutsho kweNkosi; bonke babeyizinhloko zabakoIsrayeli.

4Nanka amabizo abo; owesizwe sakoRubeni, uShamuwa indodana kaZakuri.

5Owesizwe sakoSimeyoni, uShafati indodana kaHori.

6Owesizwe sakoJuda, uKalebi indodana kaJefune.

7Owesizwe sakoIsakari, uIgali indodana kaJosefa.

8Owesizwe sakoEfrayimi, uHosheya indodana kaNuni.

9Owesizwe sakoBenjamini, uPaliti indodana kaRafu.

10Owesizwe sakoZebuluni, uGadiyeli indodana kaSodi.

11Owesizwe sakoJosefa, ngitsho owesizwe sakoManase, uGadi indodana kaSusi.

12Owesizwe sakoDani, uAmiyeli indodana kaGemali.

13Owesizwe sakoAsheri, uSethuri indodana kaMikayeli.

14Owesizwe sakoNafitali, uNabi indodana kaVofisi.

15Owesizwe sakoGadi, uGewuweli indodana kaMaki.

16Nanka amabizo amadoda uMose awathumayo ukuhlola ilizwe. UMose wambiza uHosheya indodana kaNuni ngokuthi nguJoshuwa.

17UMose wabathuma ukuhlola ilizwe laseKanani, wathi kubo: Hambani liye eNegebi, likhuphukele ezintabeni,

18libone ukuthi ilizwe linjani, lokuthi abantu abakhileyo kulo balamandla kumbe babuthakathaka, balutshwana kumbe banengi yini,

19lokuthi ilizwe labo linjani, loba lihle loba libi, lokuthi imizi abahlala kiyo injani, loba yizihonqo loba yizinqaba,

20lokuthi ilizwe livundile loba lilugwadule, lokuthi lilezinkuni loba hayi. Manini isibindi, libuye lezithelo zelizwe. Kwasekuyisikhathi sezithelo zokuqala zevini.

21Basebehamba, balihlola ilizwe kusukela enkangala yaseZini kuze kube seRehobi, ngasekungeneni kweHamathi.

22Bahambake basukela eNegebi baze bafika eHebroni; kwakuhlala khona oAhimani loSheshayi loTalimayi, inzalo kaAnaki — IHebroni lakhiwa iminyaka eyisikhombisa lingakakhiwa iZowani laseGibithe —

23Bafika esihotsheni saseEshikoli; baquma khona ugatsha olulehlukuzo lezithelo zevini, ababili baluthwalisana ngesigodo, kanye lezithelo zamapomegranati lemikhiwa.

24Indawo leyo kwathiwa yisihotsha saseEshikoli, ngenxa yehlukuzo elaqunywayo ngabantu bakoIsrayeli.

25Ekupheleni kwensuku ezingamatshumi amane babuya bevela ekuhloleni kwabo ilizwe.

26Beza kuMose loAroni lakulo lonke ibandla labakoIsrayeli enkangala yaseParani, eKadeshi. Bababikela lebandla lonke, babatshengisa izithelo zelizwe.

27Bambikela uMose bathi: Safika elizweni owasithuma kulo; ligcwele uchago lenyosi; nanzi izithelo zalo.

28Kodwake abantu abakhona elizweni balamandla, lemizi ibiyelwe ngemithangala, mikhulu kakhulu; futhi sabona khona inzalo kaAnaki.

29AmaAmaleki akhile elizweni laseNegebi; amaHethi lamaJebusi lamaAmori akhile ezintabeni; amaKanani akhile ngasolwandle laseceleni kweJordani.

30UKalebi wacela abantu phambi kukaMose ukuba balalele, wathi: Asihambeni khathesi, silithumbe ilizwe, ngoba impela silamandla okulinqoba.

31Kodwa amadoda ayehambe laye athi: Kasilamandla okuhlasela labobantu, ngoba balamandla kulathi.

32Basebebikela abakoIsrayeli umbiko omubi ngelizwe ababelihlolile bathi: Ilizwe esalihlolayo yilizwe elidla abantu balo; labantu bonke esababona kulo bangabantu abakhulu kakhulu.

33Sabona lapho iziqhwaga — amadodana kaAnaki ayinzalo yeziqhwaga — Emehlweni ethu sasingangentethe phambi kwazo, sasinjalo lasemehlweni azo.