Dute 13 - Ndebele Bible (iBhayibhili Elingcwele) 1978

1Uba kuvela phakathi kwenu umprofethi ingabe umphuphi wamaphupho, alitshengise isibonakaliso loba isimangaliso,

2besekusenzeka isibonakaliso loba isimangaliso alitshengise sona, athi: Asilandele abanye onkulunkulu elingabaziyo, sibakhonze;

3lingalaleli amazwi alowomprofethi loba lowomphuphi wamaphupho; ngoba iNkosi uNkulunkulu wenu iyalilinga ukuba yazi ukuthi liyayithanda yini iNkosi uNkulunkulu wenu ngenhliziyo yenu yonke langomphefumulo wenu wonke.

4Kodwa lizakulandela iNkosi uNkulunkulu wenu, liyesabe, ligcine imithetho yayo, lilalele ilizwi layo, liyikhonze, libambelele kuyo.

5Lowomprofethi loba lowomphuphi wamaphupho kabulawe, ngoba ulifundisile ukuba liyivukele iNkosi uNkulunkulu wenu, lokuba liphambuke endleleni elalaywa ukuhamba ngayo yiNkosi uNkulunkulu wenu, eyalikhupha eGibithe, yalikhulula endaweni yobugqili ngalokhu. Ngakho khuphani ububi obuphakathi kwenu.

6Uba umfowenu, indodana kanyoko, loba indodana yakho, loba indodakazi yakho, loba umkakho omthandayo, ingabe umngane wakho othandeka kakhulu kuwe, ekuyenga ensitha esithi: Asihambe, siyekhonza abanye onkulunkulu; ongabaziyo wena labokhokho bakho,

7onkulunkulu babantu abalizingelezeleyo, abaseduze lani labakhatshana lani, kusukela komunye umkhawulo womhlaba kuze kufike komunye,

8ungamvumeli, ungamlaleli; futhi ungamhawukeli, ungamyekeli, ungamfihli,

9kodwa umbulale; isandla sakho simtshaye kuqala ukumbulala, andubana zimtshaye izandla zabantu bonke.

10Mkhande ngamatshe aze afe, ngoba ubezama ukukuduhisa eNkosini uNkulunkulu wakho, eyakukhupha eGibithe, endaweni yobugqili.

11Wonke uIsrayeli uzakuzwa ngalokho, esabe, angabe esenza ububi obunjengalobo phakathi kwenu.

12Uba lisizwa komunye wemizi yakini, elinika yona iNkosi uNkulunkulu wenu ukuba lihlale kiyo,

13ukuthi abantu abathile ababi bavelile phakathi kwenu, bayenga abalowomuzi besithi: Asihambe siyekhonza abanye onkulunkulu elingabaziyo;

14lizakubuza ngalokhu, likuhlolisise. Uba kuliqiniso, uba kuqinisekile sibili ukuthi into enjalo eyisinengiso yenziwe phakathi kwenu,

15bulalani abantu balowomuzi ngomkhonto, liwuchithe impela, lakho konke okukuwo lezinkomo zakhona.

16Lizabuthela yonke impango yawo phakathi komdanga wawo, litshise umuzi lempango yawo yonke ngomlilo, kube ngumnikelo wokutshiswa eNkosini uNkulunkulu wenu; uzakuba lunxiwa kokuphela, ungabe usakhiwa futhi.

17Lingagcini lutho kwalokho okuqalekisiweyo, ukuba iNkosi iphenduke entukuthelweni yayo evuthayo, ilihawukele, ibe lobubele kini, ilandise, njengalokhu yafunga kubokhokho benu,

18uba lilalela ilizwi leNkosi uNkulunkulu wenu, ligcine yonke imithetho yayo engililaya yona lamuhla, lenze okulungileyo emehlweni ayo.