Efe 3 - Ndebele Bible (iBhayibhili Elingcwele) 1978

UPawuli umiselwe ukwambula imfihlakalo kaKristu

1Ngenxa yalokhu mina Pawuli ngiyisibotshwa sikaKristu Jesu ngenxa yenu lina abezizwe,

2uba kambe selizwile ngomsebenzi womusa kaNkulunkulu engiwuphiweyo ngenxa yenu

3ukuthi ngaziswa imfihlakalo ngesambulelo, njengalokhu sengake ngaloba ngokufitshane.

4Nxa libala lokhu, lingabona ukwazi kwami ngemfihlakalo kaKristu,Kol 1:26, 27

5imfihlakalo abangayaziswanga abantu ezizukulwaneni ezinye, njengalokhu isiyambuliwe khathesi kubaphostoli bakhe abangcwele labaprofethi ngoMoya,

6ukuthi abezizwe bayizindlalifa kanye lathi, lokuthi bangumzimba munye kanye lathi, bangabahlanganyeli besithembiso kuKristu Jesu ngevangeli.

7Mina ngenziwa isikhonzi salo ivangeli ngokwesipho somusa kaNkulunkulu engiwuphiwe ngokusebenza kwamandla akhe.

8Mina engimncinyane kulabo bonke abangcwele ngawuphiwa lowomusa wokutshumayela kwabezizwe ivangeli lenotho kaKristu engelakulinganiswa,

9lokubakhanyisela bonke abantu ukuthi liyini icebo lemfihlakalo ebifihliwe kuNkulunkulu owadala izinto zonke kusukela ekudatshulweni kwesikhathi,

10ukuze ngebandla imibuso lamandla asezulwini yaziswe konke ukuhlakanipha kukaNkulunkulu.

11Lokhu kwakusiya ngecebo elingelakuphela alenza ngoKristu Jesu iNkosi yethu,

12esilesibindi ngaye ukungena kuNkulunkulu ngokukholwa kuye.

13Ngakhoke ngiyalicela ukuba lingalahli ithemba ngenxa yezinhlupheko zami ngenxa yenu; ziludumo lwenu.

UPawuli ukhulekela ibandla ukuba likhule ekwazini uthando lukaNkulunkulu

14Ngenxa yalokhu ngiguqa ngamadolo kuYise,

15okubizwa ngebizo lakhe lonke usendo olusezulwini lolusemhlabeni,

16ukuba ngokwenotho yobukhosi bakhe liqiniswe ngamandla ngoMoya wakhe enhliziyweni;

17uKristu ahlale enhliziyweni zenu ngokukholwa. Lokhu selilempande, lesisekelo othandweni,

18kalibe lamandla okuqedisisa kanye labo bonke abangcwele ububanzi, lobude, lokudepha, lokutshona

19kothando lukaKristu, lokulwazi lanxa lusedlula ukwazi konke, ukuze ligcwaliswe ngakho konke ukugcwala kukaNkulunkulu.

20Ngakhoke yena olamandla okwenza okukhulu kakhulu ukwedlula konke esikucelayo lesikunakanayo ngamandla akhe asebenza kithi,

21kakube kuye udumo ebandleni lakuKristu Jesu ezizukulwaneni zonke kuze kube nini lanini. Ameni.