2 Lan 20 - Ndebele Bible (iBhayibhili Elingcwele) 1978

UJehoshafati unqoba amaMowabi lamaAmoni

1Ngemva kwalokho amaMowabi lamaAmoni labanye bamaMewuni baphuma ukuyahlasela uJehoshafati.

2UJehoshafati wabikelwa ukuthi impi enkulu izemhlasela ivela eEdoma phetsheya kolwandle, isiseHazazoni‐Tamari, okutsho iEngedi.

3UJehoshafati wethuka, wazimisela ukuyidinga iNkosi uNkulunkulu, wamemezela ukuba kuzilwe ukudla kulo lonke lakoJuda.

4AbakoJuda baphuma kuyo yonke imizi yakoJuda babuthana ukucela iNkosi uNkulunkulu ukuba ibasize.

5UJehoshafati wema ebandleni lakoJuda lelaseJerusalema ethempelini, ngaphambi kweguma elitsha,

6wathi: Nkosi, Nkulunkulu wabokhokho, wena kawusuye uNkulunkulu osezulwini na? Kawubusi yonke imibuso yezizwe na? Esandleni sakho kukhona amandla wonke, ukuba kungabi khona ongamelana lawe.

7Wena, Nkulunkulu wethu, kawubaxotshanga yini abantu balelilizwe phambi kwabantu bakho uIsrayeli, walinika inzalo kaAbrahama umngane wakho ukuba libe ngelayo kuze kube nininini na?Isa 41:8; Jak 2:23

8Bahlala kilo, bakwakhela wena indawo engcwele ibe ngeyebizo lakho, bathi:

9Uba sisehlelwa yibubi, impi loba ukutshaywa loba umkhuhlane loba indlala, sizakuma phambi kwalindlu laphambi kwakho, ngoba ibizo lakho lidunyiselwa kulindlu, sikhale kuwe osizini lwethu, wena uzakusizwa usikhulule.

10Nampake abantu bamaAmoni labaseMowabi labasentabeni iSeyiri ongavumelanga wena abakoIsrayeli ukuba babahlasele ekuphumeni kwabo eGibithe, ababayekela ukubabulala;Dute 2:4–19

11khangelake, basibonga ngokuzasixotsha endaweni owasinika yona.

12Nkulunkulu wethu, wena kawuyikubahlulela na? Ngoba thina kasilawo amandla ukulwa lalimpi enkulu kangaka ezekusihlasela; kasikwazi esingakwenza, kodwa sikhangele kuwe.

13Bonke abakoJuda babemi phambi kweNkosi uNkulunkulu labomkabo labantwana babo.

14Umoya wayo wehlela kuJahaziyeli indodana kaZekariya kaBenaya kaJeyiyeli kaMathaniya, umLevi wakoAsafi, ephakathi kwebandla.

15Wathi: Lalelani lina lonke abakoJuda labaseJerusalema, lawe nkosi Jehoshafati; iNkosi ithi: Lingesabi litshaywe luvalo ngenxa yalimpi enkulu, ngoba ukulwa kakusikho okwenu, kungokukaNkulunkulu.Dute 20:1–4

16Kusasa phumani liyekulwa labo; bazakhwela ngomqanso waseZizi; lizabafumanisa ekupheleni kwesihotsha ngasempumalanga kwenkangala yaseJeruweli.

17Kakusini lodwa elizakulwa kulimpi; manini liqine, lizakubona ukunqoba iNkosi ezakulenzela khona, lina abakoJuda labaseJerusalema. Lingesabi litshaywe luvalo; kusasa phumani liyekulwa labo, iNkosi izakuba lani.

18UJehoshafati wathi mbo ngobuso phansi, labo bonke abakoJuda labaseJerusalema baziwisela phansi phambi kweNkosi uNkulunkulu, bayikhonza.

19AmaLevi abakoKohathi labakoKora asukuma ayidumisa iNkosi, uNkulunkulu kaIsrayeli, ngelizwi elikhulu.

20Basebevuka ekuseni, baya enkangala yaseTekowa; ekuphumeni kwabo uJehoshafati wema wathi kibo: Ngilalelani lina abakoJuda labaseJerusalema. Thembani iNkosi uNkulunkulu wenu, lizakuqina; likholwe abaprofethi bayo, lizaphumelela.

21Kwathi esekhulumisene labantu wakhetha labo abazahlabelela iNkosi, bayidumise begqoke izambatho ezingcwele, behamba phambi kwebutho behlabela besithi:

Ibongeni iNkosi,

uthando lwayo olungapheliyo lumi kuze kube nininini.

22Kwathi lapho beqalisa ukuhlabela lokudumisa, iNkosi uNkulunkulu yabeka abantu bokucathamela abaseAmoni labaseMowabi labasentabeni iSeyiri ababezahlasela abakoJuda, babehlula.

23AbaseAmoni labaseMowabi basukela abasentabeni yaseSeyiri, bababulala babaqeda du; sebebabulele babaqeda abaseSeyiri, baphendukelana babulalana.

24AbakoJuda sebefikile enqabeni yokulinda esenkangala bayiqaza impi, babona izidumbu kuphela eziwele phansi; kakukho loyedwa owaphephayo.

25Kwathi uJehoshafati labantu bakhe sebezebutha impango bafumanisa inkomo ezinengi, lempahla, lezigqoko, lezinto eziligugu, bazithathela zona baze bahluleka ukuzithwala. Bathatha insuku ezintathu ukubutha impango ngoba yayinengi kakhulu.

26Ngosuku lwesine babuthana esihotsheni saseBeraka, bayibonga khona iNkosi; ngakho leyondawo yathiwa yisihotsha saseBeraka kuze kube lamhla.

27Basebebuyake bonke abantu bakoJuda labaseJerusalema beholwa nguJehoshafati, babuyela eJerusalema bethokoza, ngoba iNkosi uNkulunkulu yabanika ukuthokoza ngezitha zabo.

28Bangena eJerusalema betshaya amachacho lemihubhe lezimpondo zokukhaliswa, baya ethempelini.

29Ukuyesaba iNkosi uNkulunkulu kwehlela phezu kwayo yonke imibuso yamazwe lapho isiwile ukuba iNkosi yamlwela uIsrayeli ezitheni zakhe.

30Umbuso kaJehoshafati waba lokuthula, ngoba uNkulunkulu wakhe wamnika ukuthula inxa zonke.

Ukubusa kukaJehoshafati

31UJehoshafati wasebusake koJuda, wayeseleminyaka engamatshumi amathathu lanhlanu lapho eqalisa ukubusa; wabusa eJerusalema iminyaka engamatshumi amabili lanhlanu. Ibizo likanina lalinguAzuba indodakazi kaShilihi.

32Walandela indlela zikaAsa uyise, kaphambukanga kuzo, wenza okulungileyo phambi kweNkosi.

33Kodwa indawo eziphakemeyo zokukhonzela kazivalwanga; abantu babengazinikeli kuNkulunkulu wabokhokho babo.

34Ezinye indaba zikaJehoshafati, kusukela ekuqaleni kuze kube sekucineni, zilotshiwe ezingwalweni zezindaba zikaJehu indodana kaHanani ezibhalwe ogwalweni lwamakhosi akoIsrayeli.

35Emva kwalokho uJehoshafati inkosi yakoJuda wazihlanganisa loAhaziya inkosi yakoIsrayeli owayesenza okubi.

36Wahlangana laye ekwenzeni imikolo yokuya eTarshishi, bayakhela eEziyoni‐Geberi.

37UEliyezeri indodana kaDodavahu waseMaresha wakhuluma loJehoshafata esithi: Ngoba uzihlanganisile wena loAhaziya, iNkosi izakuchitha lokho okwenzileyo. Ngakho imikolo yephuka, yahluleka ukuya eTarshishi.