Mal 2 - Ndebele Bible (iBhayibhili Elingcwele) 1978

1Khathesike nanku owenu umlayo, bapristi.

2Uba lingalaleli, uba lingananzi ukulidumisa ibizo lami, kutsho iNkosi yamabandla, ngizalithumela isiqalekiso, ngiphendule izibusiso zenu zibe yiziqalekiso. Yebo, sengisenza njalo, ngoba kalinanzi ukwenza lokho.

3Ngizakhalimela inzalo yenu, ngilithele ngomswane ebusweni, umswane weminikelo yenu, ngilixotshe ebusweni bami.

4Ngalokho lizakwazi ukuba ngithumele lumlayo kini, ukuba isivumelwano sami loLevi sime, kutsho iNkosi yamabandla.Nani 3:11–13

5Isivumelwano sami laye sasingesokuphila lokuthula, ngamnika khona ukuba esabe; wangesaba, walesaba lebizo lami.Nani 25:12

6Ukufundisa kwakhe kwakuliqiniso, ububi bungafunyaniswa ekufundiseni kwakhe. Wahamba lami ngokuthula langobuqotho, waphendula abanengi ebubini.

7Ngoba umpristi umele agcine ukwazi okuqotho, labantu bamele badinge ukufundiswa kuye, ngoba uyisithunywa seNkosi yamabandla.

8Kodwa lina bapristi, liphambukile endleleni, lakhubekisa abanengi ngokufundisa kwenu; lasona isivumelwano sikaLevi, kutsho iNkosi yamabandla.

9Ngakhoke mina ngilenzile laba ngabadelelekayo labehliselwe phansi phambi kwabantu bonke, ngoba lingagcinanga indlela zami, kodwa libandlulule abantu ekufundiseni kwenu.

Ukukhohlisa kukaIsrayeli

10Kasilaye ubaba munye thina sonke na? Kasidalwanga nguNkulunkulu munye na? Phoke, kungani sikhohlisana, sisona isivumelwano uNkulunkulu asenze labokhokho na?

11UJuda ukhohlisile, kwenziwe amanyala koIsrayeli laseJerusalema; ngoba uJuda uyonile indawo engcwele ethandwa yiNkosi ngokuthatha indodakazi ekhonza unkulunkulu wezizweni.

12Kungathi iNkosi ingakhupha emathenteni kaJakobe umuntu owenza lokhu, loba owakhileyo khona, loba engowezizwe, lanxa eletha umnikelo eNkosini yamabandla.

13Lalokhu futhi liyakwenza. Lithela ialtare leNkosi ngenyembezi, likhale, libubule, ngoba ingasawunanzi umnikelo, ungasamukeleki kuyo.

14Liyabuza lithi: Kungani na? Kungoba iNkosi eyayingufakazi wesivumelwano sakho lomfazi wobutsha bakho iyakwazi ukuthi umkhohlisile wena, lanxa ebengumngane wakho lomfazi wakho wesivumelwano.

15UNkulunkulu kenzanga umuntu abe lenyama lomoya wokuphila na? UNkulunkulu ufunani kulokhu na? Ufuna ukuba umuntu azale abantwana abanikwe nguNkulunkulu. Ziqapheliseni ukuba omunye lomunye wenu angamkhohlisi umfazi wobutsha bakhe.

16Ngiyakuzonda ukwahlukana, kutsho iNkosi uNkulunkulu kaIsrayeli. Ngiyazonda futhi ukuba umuntu abe lesihluku esinje kumkakhe, kutsho iNkosi yamabandla. Ngakhoke ziqapheliseni ukuba lingakhohlisi.

Usuku lokwahlulela luyeza

17Liyidinisile iNkosi ngamazwi enu. Kanti lithi: Siyidinise kanjani na? Liyidinise ngokuthi: Bonke abenza okubi balungile eNkosini, bayayithokozisa; loba lithi: Ungaphi uNkulunkulu wokwahlulela na?