2 Lan 17 - Ndebele Bible (iBhayibhili Elingcwele) 1978

Ukuqiniswa kombuso kaJehoshafati

1UJehoshafati indodana kaAsa waba yinkosi esikhundleni sakhe; waziqinisela ukulwa loIsrayeli.

2Wabeka amabutho kuyo yonke imizi ebiyelweyo yakoJuda; wabeka lamabutho okulinda elizweni lakoJuda, lasemizini yakoEfrayimi eyayithunjwe nguyise uAsa.

3INkosi yaba laye uJehoshafati, ngoba wahamba ngendlela zikayise zokuqala, kabadinganga oBali,

4kodwa wadinga uNkulunkulu kayise, wahamba ngemilayo yakhe, kaze alingisa indlela zakoIsrayeli.

5Ngakhoke iNkosi uNkulunkulu yawuqinisa umbuso esandleni sakhe, labo bonke abakoJuda bathela kuye; waba lenotho enengi lodumo.

6Inhliziyo yakhe yaziqhenya ngendlela zeNkosi; futhi wavala indawo eziphakemeyo zokukhonzela, waqeda lensika ezimiselwe unkulunkulukazi uAshera koJuda.

7Ngomnyaka wesithathu wokubusa kwakhe wathumela izikhulu zakhe ukufundisa emizini yakoJuda, oBeni‐Hayili loObadiya loZekariya loNethaneli loMikaya,

8bahamba lamaLevi oShemaya loNethaniya loZebadiya loAsaheli loShemiramothi loJehonathani loAdonija loTobija loTobadonija, kanye labapristi oElishama loJehoramu.

9Bafundisa koJuda, belogwalo lomlayo weNkosi uNkulunkulu; bayihambela yonke imizi yakoJuda, befundisa abantu.

10Ukuyesaba iNkosi uNkulunkulu kwehlela phezu kwayo yonke imibuso yamazwe ayehanqe elakoJuda; kayimhlaselanga uJehoshafati.

11Abathile kumaFilistiya bamlethela uJehoshafati izipho, bathela langesiliva; lamaArabiya lawo aletha kuye inqama ezizinkulungwane eziyisikhombisa lamakhulu ayisikhombisa, lezimpongo ezizinkulungwane eziyisikhombisa lamakhulu ayisikhombisa.

12UJehoshafati waye lokhu ekhula njalo, waze waba lamandla amakhulu. Wakha koJuda izinqaba lemizi yokugcinela amabele;

13wayeleziphala ezinkulu emizini yakoJuda. Wayelamabutho, amaqhawe alamandla, eJerusalema,

14ayebuthwe ngezindlu zawo ngokunje; kwabakoJuda, induna zezinkulungwane, kwakunguAdina engumphathi, elamaqhawe alamandla azinkulungwane ezingamakhulu amathathu;

15elandelwa nguJohanani umphathi, elamabutho azinkulungwane ezingamakhulu amabili lamatshumi aficaminwembili;

16kulandele uAmasiya indodana kaZikiri, owayezinikelele umsebenzi weNkosi uNkulunkulu, elamaqhawe alamandla azinkulungwane ezingamakhulu amabili.

17KwabakoBenjamini kwakunguEliyada indoda eliqhawe, elamadoda azinkulungwane ezingamakhulu amabili, ehlome ngemitshoko langezihlangu;

18elandelwa nguJehozabadi elamadoda ahlomileyo azinkulungwane ezilikhulu lamatshumi aficaminwembili.

19Laba babesebenzela inkosi ngaphandle kwalabo inkosi eyayibabeke emizini ebiyelweyo kulo lonke lakoJuda.